كوز قاراس

ەلباسىعا ەسكەرتكىش  قويۋعا بولادى، ەگەر…

kerey.kz

 |  Dec 1, 2016

قازاقستاندا نۇرسۇلتان نازارباەۆقا كوزى تىرىسىندە الماتىدا، استانادا، ەسكەرتكىش اشىلعان. ەندى، مىنە، تالدىقورعاندا كادىمگىدەي ايدىك ەسكەرتكىش ورناتىلىپتى. بۇعان دەيىن مۇنداي ەسكەرتكىشتەر رەسەي مەن تۇركيادا دا قويىلعان. قاراپ وتىرساق، بۇل ەتەك الىپ بارا جاتقان ءۇردىس پە قالاي…

ايىرىقشا ەڭبەك سىڭىرگەن ادامدارعا كوزى تىرىسىندە ەسكەرتكىش قويۋ تاجىريبەسى ومىردە بۇرىننان بار. مىسالى، ماسكەۋ تۇبىندەگى بوگورودسك (نوگينسك) قالاشىعىندا ۆ.ي.لەنينگە كوزى تىرىسىندە ەڭ العاشقى ەسكەرتكىش قويىلعان. تۋرا سول ەسكەرتكىش اشىلاتىن كۇنى 1924 جىلعى 22-قاڭتاردا لەنين قايتىس بولىپ كەتكەن. ال بۇدان باسقا بۋەنوس-ايرەستە ايگىلى فۋتبولشى مارادوناعا، اقش-تا ارنولد شۆارتسەنەگگەرگە (وگايو شتاتىندا), سيلۆەستەر ستالونەگە (فيلادەلفيادا ءوزىنىڭ زاكازىمەن قويىلعان), ۆۋدي اللەنگە (نيۋ-يوركتە) قويىلعان شاعىن ەسكەرتكىشتەر بار. رەسەيدىڭ پسكوۆ دەگەن قالاسىندا ۆ.ۆ.پۋتينگە ەسكەرتكىش ورناتىلعان ەكەن، الايدا ۆۆپ ءارتىس ەمەستىگىنەن ۇيالعان بولۋ كەرەك، ءبىر تاۋلىكتەن سوڭ ونى الدىرتىپ تاستاپتى.

ءسوز جوق، ن.نازارباەۆتىڭ قازاقستانعا سىڭىرگەن ەڭبەگى بار. بۇل ەڭ الدىمەن ەل كىندىگىن باتىل تۇردە الماتىدان اقمولاعا كوشىرۋى جانە كورشى ەلدەرمەن شەكارامىزدى دەليميتاتسيالاۋى، ەلدىڭ تىنىشتىعىن ساقتاۋى دەر ەدىك. ال ەكونوميكادا ەرەن جەتىستىكتەرگە جەتە قويمادىق. تاۋەلسىزدىك العانىمىزعا شيرەك عاسىر وتسە دە بىردە ءبىر ءموز سالىنبادى، ازىق-تۇلىك پەن كۇندەلىكتى تۇتىنۋ زاتتارى، كيىم-كەشەك باسىم بولەگىندە شەتەلدەردەن تاسىلادى. اۋىلشارۋاشىلىعى ءوندىرىسى باياعى 1990 جىلعى دەڭگەيگە ءالى جەتە قويعان جوق. ءجىو جان باسىنا شاققاندا $13 مىڭ دەگەنىمىزبەن بۇل «قۇلاعىنان سۇيرەلگەن» تسيفر سياقتى كورىنەدى. ويتكەنى شيرەك عاسىر ءتۇرلى باسشىلىق قىزمەتتەردە جۇرگەنىمە قاراماستان مەنىڭ جىلدىق تابىسىم (پەنسيامدى قوسقاندا) الگى تسيفردىڭ جارتىسىنان ءسال اسادى.

ادەتتە پرەزيدەنتكە ءوزىنىڭ مىندەتىن ورىنداعانى ءۇشىن ەسكەرتكىش قويىلمايدى. ەسكەرتكىش ايىرىقشا قىزمەتى ءۇشىن قويىلادى.
ءيا، ءبىز شىنىمەن كوزى تىرىسىندە ەسكەرتكىش قويۋدى قالايمىز، ەگەر پرەزيدەنت:

–قازاق حالقىنىڭ قامقور اكەسىنە اينالىپ، قازاق ۇلتتىق مەملەكەتتىلىگىن نىعايتسا (اتاتۇرىك سياقتى),
–قازاقستان پايداسىز الدەبىر ەكونوميكالىق وداقتارعا بايلانباسا،
–شەتەلدەردەگى قانداستارىمىزدان كەمىندە تاعى 5 ميلليونىن كوشىرتىپ الدىرتىپ حالىق سانىن 25 ميلليونعا جەتكىزسە،
–مەملەكەتتىك ءتىل ءوز مارتەبەسىنە قونسا،
–كورشى مەملەكەت ءتىلى باسىمدىق جاساماسا،
–كورشى ەلدىڭ اقپاراتتىق ەكسپانسياسى ۇستەمدىك جاساماسا،
ء–جىو جان باسىنا شاققاندا ەڭ بولماسا كانادا، دانيا، گەرمانيا، بەلگيا سياقتى كەمىندە 40 مىڭ دوللارعا جەتسە،
–بيلىككە تۋىستارىن ارالاستىرماسا،
–ەلدە ساياسي تۇتقىندار بولماسا،
–كوررۋپتسيا مەن جاعىمپازدىق جويىلسا،
–ەلدە تازا، دەموكراتيالىق قوعام ورناتا السا!

مۇنىڭ ءبارى قازىر ارمان بولىپ تۇر. حالىقتىڭ ارمانى البەتتە، كەز-كەلگەن پروگراممادان جوعارى. حالىقتىڭ وسى ارماندارىنا جەتۋ جولىندا كۇندەلىكتى مىندەتىن اتقارىپ وتىرعان پرەزيدەنتكە ەسكەرتكىش قويۋ مەنىڭشە تىم ەرتە سياقتى. جۇزەگە اسپاعاندى جۇزەگە استى دەپ كورسەتۋ – جاعىمپازدىقتىڭ جارقىن كورىنىسى. مۇنى ەلباسىنىڭ ءوزى دە قالامايدى.
سوندىقتان حالىقتىڭ اتالعان ارماندارى جۇزەگە اسىپ، پرەزيدەنتكە شىنايى ەسكەرتكىش قوياتىن كۇنگە جەتەيىك!

P.S. كەز كەلگەن ساياسي، الەۋمەتتىك، ەكونوميكالىق جاڭالىقتى پرەزيدەنتپەن بايلانىستىرۋ – بۇل جەكە باسقا تابىنۋشىلىق بولىپ تابىلادى!

مارات توكاشباەۆتىڭ facebook پاراقشاسىنان الىندى