ELBASIĞA ESKERTKİŞ QOYUĞA BOLADI, EGER…
kerey.kz
Qazaqstanda Nwrswltan Nazarbaevqa közi tirisinde Almatıda, Astanada, eskertkiş aşılğan. Endi, mine, Taldıqorğanda kädimgidey äydik eskertkiş ornatılıptı. Bwğan deyin mwnday eskertkişter Resey men Türkiyada da qoyılğan. Qarap otırsaq, bwl etek alıp bara jatqan ürdis pe qalay…
Ayırıqşa eñbek siñirgen adamdarğa közi tirisinde eskertkiş qoyu täjiribesi ömirde bwrınnan bar. Mısalı, Mäskeu tübindegi Bogorodsk (Noginsk) qalaşığında V.I.Leninge közi tirisinde eñ alğaşqı eskertkiş qoyılğan. Tura sol eskertkiş aşılatın küni 1924 jılğı 22-qañtarda Lenin qaytıs bolıp ketken. Al bwdan basqa Buenos-Ayreste äygili futbolşı Maradonağa, AQŞ-ta Arnol'd Şvarceneggerge (Ogayo ştatında), Sil'vester Stalonege (Filadel'fiyada öziniñ zakazımen qoyılğan), Vudi Allenge (N'yu-Yorkte) qoyılğan şağın eskertkişter bar. Reseydiñ Pskov degen qalasında V.V.Putinge eskertkiş ornatılğan eken, alayda VVP ärtis emestiginen wyalğan bolu kerek, bir täulikten soñ onı aldırtıp tastaptı.
Söz joq, N.Nazarbaevtıñ Qazaqstanğa siñirgen eñbegi bar. Bwl eñ aldımen el kindigin batıl türde Almatıdan Aqmolağa köşirui jäne körşi eldermen şekaramızdı delimitaciyalauı, eldiñ tınıştığın saqtauı der edik. Al ekonomikada eren jetistikterge jete qoymadıq. Täuelsizdik alğanımızğa şirek ğasır ötse de birde bir MÖZ salınbadı, azıq-tülik pen kündelikti twtınu zattarı, kiim-keşek basım böleginde şetelderden tasıladı. Auılşaruaşılığı öndirisi bayağı 1990 jılğı deñgeyge äli jete qoyğan joq. JİÖ jan basına şaqqanda $13 mıñ degenimizben bwl «qwlağınan süyrelgen» cifr siyaqtı körinedi. Öytkeni şirek ğasır türli basşılıq qızmetterde jürgenime qaramastan meniñ jıldıq tabısım (pensiyamdı qosqanda) älgi cifrdıñ jartısınan säl asadı.
Ädette Prezidentke öziniñ mindetin orındağanı üşin eskertkiş qoyılmaydı. Eskertkiş ayırıqşa qızmeti üşin qoyıladı.
Iä, biz şınımen közi tirisinde eskertkiş qoyudı qalaymız, eger Prezident:
–qazaq halqınıñ qamqor äkesine aynalıp, qazaq wlttıq memlekettiligin nığaytsa (Atatürik siyaqtı),
–Qazaqstan paydasız äldebir ekonomikalıq odaqtarğa baylanbasa,
–şetelderdegi qandastarımızdan keminde tağı 5 millionın köşirtip aldırtıp halıq sanın 25 millionğa jetkizse,
–memlekettik til öz märtebesine qonsa,
–körşi memleket tili basımdıq jasamasa,
–körşi eldiñ aqparattıq ekspansiyası üstemdik jasamasa,
–JİÖ jan basına şaqqanda eñ bolmasa Kanada, Daniya, Germaniya, Bel'giya siyaqtı keminde 40 mıñ dollarğa jetse,
–bilikke tuıstarın aralastırmasa,
–elde sayasi twtqındar bolmasa,
–Korrupciya men jağımpazdıq joyılsa,
–elde taza, demokratiyalıq qoğam ornata alsa!
Mwnıñ bäri qazir arman bolıp twr. Halıqtıñ armanı älbette, kez-kelgen programmadan joğarı. Halıqtıñ osı armandarına jetu jolında kündelikti mindetin atqarıp otırğan Prezidentke eskertkiş qoyu meniñşe tım erte siyaqtı. Jüzege aspağandı jüzege astı dep körsetu – jağımpazdıqtıñ jarqın körinisi. Mwnı Elbasınıñ özi de qalamaydı.
Sondıqtan halıqtıñ atalğan armandarı jüzege asıp, Prezidentke şınayı eskertkiş qoyatın künge jeteyik!
P.S. Kez kelgen sayasi, äleumettik, ekonomikalıq jañalıqtı Prezidentpen baylanıstıru – bwl jeke basqa tabınuşılıq bolıp tabıladı!
Marat Tokaşbaevtıñ facebook paraqşasınan alındı
Pikir qaldıru