Қазақстан ІІД әкімшілік ювеналды полиция комитеті бөлімінің басшысы Әсет Оспанов қоғамда кеңінен талқыланып жүрген педофилдерді химиялық піштіру мәселесі үкімет деңгейінде қарастырылып жатқанын мәлімдеді.

Бұл туралы Оспанов Орталық коммуникация қызметінің брифингісінде айтты деп хабарлады 24.kz.

Оспановтың айтуынша, Қылмыстық кодекстің жаңа редакциясында кәмелетке толмағандарға қатысты қылмысқа барғандардың жазасы қатайтылды. 2010 жылғы түзетулерден кейін кәмелетке толмағандарды зорлағаны үшін азаматқа ең көбі 10 жыл емес, 15 жыл қамауға алу жазасы тағайындалатын болды. Ал 14 жасқа жетпегендерді зорлағаны үшін қылмыскер 20 жылға дейін темір торға тоғытылады.

“Ана мен баланы қорғауға қатысты елбасының тапсырмасы шеңберінде ағымдағы жылдың қаңтарынан күшіне енген жаңа Қылмыстық кодексте де кәмелетке толмағандарға қатысты қылмыс жасағандардың жазасы қатайтылды. Ал химиялық піштіруге келетін болсақ, бұл мәселе парламент деңгейінде қарастырылып жатыр. Әзірге бұл мәселе тек талқылау деңгейінде”, – деп мәлімдеді Оспанов.

Ал заңгер Сергей Уткин болса, “Астана” арнасына берген сұхбатында әлсіз құқық қорғау жүйесі әзірге Қазақстанда педофилдерді химиялық піштіру жазасын енгізуге мүмкіндік бермейтінін айтты. Дегенмен, Конституция мұндай заңды қабылдауға тыйым салмайды.

Уткиннің айтуынша, егер педофилдерді күштеп піштіру жазасы енгізілсе, тергеу органдары тарапынан “қателіктер” орын алуы ғажап емес. Полицейлер қылмыстың ашылу деңгейін көтеру мақсатымен кінәсіз адамдарға жала жабуы мүмкін дегенді заңгер жоққа шығармады. Оның ойынша, қазіргі тергеу мен соттың деңгейінде зорлыққа барғандарды піштіру жазасын енгізу дұрыс емес.

“Конституцияда педофилдерді піштіруге болмайды деген ереже жоқ. Демек, Конституция қарсы шықпайды. Ал өркениетті қоғам өлім жазасына қашанда қарсы. Себебі, қателік кетуі ғажап емес. Себебі, сот пен тергеу деңгейін ескере отырып, кінәсіз жанды осындай жазаға кесу дұрыс па деген сауал туады. Орынсыз айыпталған адамды өлім жазасына кесетін боламыз. Ал 5 жылдан кейін мұның бәрі жазықсызға кінә арту болып шығады. Сонда орынсыз өмірі қиылған адамды қайта тірілту мүмкін болмайды. Ең қорқыныштысы да осы”, – дейді заңгер.

Уткин зорлау орын алған жағдайда екі тараптың бітімге келу мәселесіне де өз пікірін айтты. Оның ойынша, Қазақстанда бұл, тіпті ауыр қылмыс кезінде де рұқсат етілуі тиіс.

“Тараптардың келісімге келуі – бұл қалыпты инстуитут. Жәбірленуші тарап татуласқысы келсе, ондай мүмкіндіктен айырудың не қажеті бар? Менің ойымша, олай етуге болмайды. Тіпті осындай жағдайда келісімге келу мүмкіндігі болуы қажет”, – деп санайды Уткин.