Qazaq medicinası qwndı zertteu eñbegimen tolıqtı
kerey.kz
Nwrgül Jambılqızı
Almatı qalası OKJ-niñ №4 kitaphanasında Astanadağı «Şipalı» emdeu ortalığınıñ bas därigeri, densaulıq saqtau salasınıñ üzdigi, m.ğ.k. Qayrat Aydarhanwlınıñ tört birdey kitabınıñ twsaukeseri boldı. Keş barısında Qayrat Aydarhanwlınıñ jeke öziniñ «Qazaq emşiligi», «Arqa törinde», «Sır men Sauır arası» jäne jazuşı Jädi Şäkenwlımen birlesken «Altay alıptarı» attı kitaptarı köpşilikke tanıstırılıp, keş qonaqtarına da taratıldı. Därigerdiñ kitaptarı türli taqırıpqa bağıttalğan. Mäselen, «Qazaq emşiligi» kitabına Qayrat Aydarhanwlınıñ wzaq jıldarğı eñbekteri men zertteuleri engizilgen. Odan bölek, atalğan kitapta qazaq emşiliginde wdayı qoldanılatın däriler, tabiği emdeu joldarı toptastırılğan. 
Keşke maytalman aqın-jazuşılar, elimizge belgili baspagerler, BAQ ökilderi men qalalıq kitaphana meñgeruşileri qatıstı. Sonıñ işinde, belgili ğalım, medicina ğılımdarınıñ doktorı, akademik Maqswt Temirbaev, medicina ğılımdarınıñ doktorı, professor Uatqan Säyfilwlı, medicina ğılımdarınıñ kandidatı Isatay Äzimwlı, jazuşı, Qazaqstan Jazuşılar odağınıñ jäne Euraziya Jazuşılar odağınıñ müşesi Jädi Şäkenwlı, aqın, Qazaqstan Jazuşılar Odağınıñ müşesi Amanhan Älimwlı, Almatı qalası OKJ-niñ direktorı Roza Qasımbekqızı sındı qonaqtar arnayı söz söylep, jılı lebizderin bildirdi. «Atadan balağa jalğasqan asıl sözimiz qwnın joymay ğasırlar qoynauınan bizge jetti. Biz endi bwl mwranı bayıtıp, onı bügingi künniñ ozıq tehnologiyasımen birlestirip, keler wrpaqqa jetkizuimiz kerek» , – degen Qayrat Aydarhanwlı wzaq jılğı eñbekteri men izdenisterin özgelermen de bölisip äri şığarmaşılıqpen baylanıstırudı maqsat etken. Qazirde onıñ joğarıda atalğan kitaptarı Astana men Almatı qalalarındağı kitaphanalardıñ barlığına tegin taratılğan.
“The Qazaq Times”
Pikir qaldıru