“Orıstildi qalalıq qazaqtarğa qarap aytamın. Ana tilderiñde akcentpen söyletinderiñ mañızdı emes. Jartı Amerika ağılşın tilinde akcentpen söyleydi. Bwl senderdiñ tilderiñ, ata-balalarıñnıñ tili. Biz ana tilimizdi qorğauımız kerek”, – dep sözin bastadı Tayjan.

Qoğam belsendisi orıstildilerdi qazaqşa dwrıs söyley almaymın degen kompleksten arıluğa şaqırdı.

“Orıstildimin degen kompleksten arılu kerek. Şınımen nietteriñ bolsa, üyrenesiñder, men siyaqtı! Ana tilimiz qanımızda bar… Iman – jüregimizde! Jürekteriñ qazaq bolsa, ana tiline, diline oralasıñdar, amandıq bolsa!”, – dep keñes berdi Tayjan.

Mwhtar Tayjan qazaq tiliniñ jağdayın jaqsartu joldarın wsındı.

“Orıstildi patriot qazaqtar, sauatı jäne uaqıtı bar qazaqtar qaladağı qazaq tili üşin küres bastauı kerek. Auılda tilimizden eşqanday mäsele tuındap twrğan joq. Alayda qaladağı ana tilimizge bizdiñ kömek qajet. Onıñ jağdayın köteru üşin biz bar emespiz be?”, – deydi ol.

Qoğam belsendisi zañ bizdiñ jaqta ekenin alğa tarttı.

“Zañ da bizdiñ jaqta. Tilder turalı, twtınuşılar qwqığı turalı zañ bar. Ol zañdarğa säykes, biz, Qazaqstan azamattarı qazaq tilinde qızmet körsetuin talap etuge qwqılımız. Qazaq tilinde söylep, qazaqşa qızmet körsetudi talap etiñder”, – deydi Tayjan.

Tayjan qazaq tilinde söylegeni üşin qısım körgen kez-kelgen twrğınğa kömektesuge äzir ekenin alğa tarttı.

“Eger qalada sizge qalauıñız boyınşa qazaq tilinde qızmet körsetpese, mağan Facebook paraqşama jazularıñızdı swraymın. Men jeke özim kelip, sotqa olardıñ üstinen şağım tüsiretin bolamın. Swrauıñız boyınşa qazaqşa jauap bermegen kez-kelgen kafege birneşe mln teñge ayıppwl salatın bolsaq, özderi-aq bizge memlekettik tilde qızmet körsetetin boladı”, – dep tüydi ol.