|  |  | 

Саясат Сұхбаттар

Америка генералы Бен Ходжес: Ресей Ираннан дрон алады, ал Украинаға 50 ел көмектесіп жатыр


Ресей ракетасы түскен Днепрдегі көпқабатты тұрғын үй. 14 қаңтар 2023 жыл.

Ресей ракетасы түскен Днепрдегі көпқабатты тұрғын үй. 14 қаңтар 2023 жыл.

АҚШ армиясының отставкадағы генералы Бен Ходжес Азаттыққа берген сұхбатында Ресей әскерінің жүйесіз қимылдап жатқанын атап өтіп, Батыстың жаңа қару-жарағы Украинаға соғысты қалай өзгертуге мүмкіндік беретінін айтты.

Отставкадағы генерал Бен Ходжес 2014-2017 жылдары АҚШ-тың Еуропадағы құрлық әскерін басқарған. Қазір Вашингтондағы Еуропа саясатын талдау орталығының стратегиялық зерттеулер кафедрасына жетекшілік етеді. Генерал Азаттықтың Грузин қызметіне сұхбатында Украинаға жаңа әскери техника жеткізу соғыс барысын өзгертуге қалай көмектесетінін айтып, Ресей операциясында жүйе жоғын түсіндірді.

Азаттық: Украинаның Бахмут және Соледар қалалары “Вагнер” жалдамалы әскерінің үздіксіз шабуылына ұшырап отыр. Елдің шығысындағы Бахмутты алу неге сонша маңызды? «Вагнер» тобының басшысы Евгений Пригожин Бахмутта қандай нәтижеге қол жеткізгісі келеді?

Бен Ходжес: Ресей, әсіресе Пригожин бастаған әскер Бахмутқа неге айрықша басымдық беріп отырғанын түсінуге біраз уақыт кетті. Бұл жерден символизм белгісін көріп отырмын. Пригожин үшін Бахмутты алу мансапқұмарлық жобасы сияқты. Оған қанша адам өлгені маңызды емес. Олар бес айдан бері соғысып жатыр, бірақ әлі Бахмутты жаулап ала алған жоқ. Ресей әскери дайындықтан өтпеген, жақында ғана қатарға қосылған жауынгерлерін майданға салып жатыр.

АҚШ армиясының отставкадағы генералы Бен Ходжес

АҚШ армиясының отставкадағы генералы Бен Ходжес

Жақында өңірде ірі тұз және гипс шахталары бары белгілі болды. Пригожин бұл жерлерден кен өндіргісі келетінін айтты. Оған стратегиялық маңызды торапта орналасқан қала емес, гипс шахталары керегі Ресей шабуылынан қаза тапқан мыңдаған адамның жақындарын жұбата ала ма, білмеймін.

Бахмут операциясы Ресей әскері өзара ақылдасып әрекет етпейтінін көрсетеді. Пригожин [генерал Сергей] Суровикиннің бұйрығын орындап, генерал [Валерий] Герасимовқа (11 қаңтарда Украинадағы бірлескен орыс әскерінің қолбасшысы болып тағайындалды) бағынады деп ойламаймын. Сонда басшы кім?…. Оларда нақты әрі жүйелі жоспар жоқ. Бір жақсысы, Ресей ақпан-наурызда байқалған институционалды қателіктерін әлі түзеткен жоқ.

Азаттық: Мүмкін олар соғысқа мейлінше көп адам салсақ, ерте ме, кеш пе, нәтиже болады деген ескі стратегиясына сүйеніп отырған шығар?

Бен Ходжес: Ресейліктер кімнің әскері көп болса, сол жеңеді деген стратегияға сүйеніп келді. Ғасырлар бойы барлық соғысты осы әдіспен жүргізді. Түбінде Украинаны жауынгерлер санының көптігімен жеңіп шығамыз деп ойлады. Бірақ бұл ойлары жүзеге аспады, украиндардың кәсібилігі жоғары болып шықты. Шын мәнінде шеберлігі жеткілікті және оны қалай қолдану керегін білетін әскер өзінен әлдеқайда көп жауды жеңе алады. Украина әртүрлі құралдар көмегімен қарсыластың көлік желілерін, қару-жарақ қоймаларын анықтап отыр.

Бахмут маңында зенит кешендерінен атып жатқан украин әскері. 10 қаңтар 2023 жыл.

Бахмут маңында зенит кешендерінен атып жатқан украин әскері. 10 қаңтар 2023 жыл.

Азаттық: Өткен аптада Батыс елдері Украинаға заманауи қару-жарақ, оның ішінде АҚШ-тан Bradley бронды техникасын, Германиядан Marder әскери көліктерін, Франциядан жеңіл соғыс машиналарын жіберетінін мәлімдеді. Украина аталған техникаларсыз көп шығынға ұшырады ма? Киевтің жағдайы енді қалай өзгереді?

Бен Ходжес: Әрине, Bradley, Marder, AMX-10RC және басқа да жүйелерді жіберу туралы шешімнің ертерек қабылданғаны жақсы еді. Бірақ түбінде осындай шешім қабылданды, ол да жаман емес. Өткен аптада естіген негізгі ақпаратым танк бригадасының құрамы туралы болды. Чехиядан келген өздігінен жүретін артиллерия батальоны бар. Француздың AMX-10RC — мобильділігі жоғары, зеңбірегі үлкен көлік. Marder батальоны да — жақсы жүйе. Bradley әлемде жаяу әскерге арналған ең жақсы машина саналады.

Украина осының бәрін қолына жинап, өзінің танк батальоны мен инженерлерін ортаға салса, жаудың жанын алатын құрылым шығады. Дұрыс қолдау көрсетсе, бұл техника орыс окоптарын жарып өтетін темір жұдырыққа айналады. Мен осыны көріп отырмын. Көлік санына емес, мүмкіндігіне қараймын… Алдағы бірнеше ай қару-жарақты қабылдап алып, жаттығып, логистикалық жоспар құруға кетеді. Украинаның бас штабы дайын болғанда, бұл қару-жарақты нағыз күш ретінде қолдануға көшеді.

Азаттық: Батыс елдерінің қауіпсіздік саласындағы сарапшылары бұған күмәнмен қарайды. Олар қару-жарақ берілгені жақсы, бірақ Украинаға M1 Abrams сияқты нағыз танкілер керек деп есептейді. Бұл пікірге қосыласыз ба? Украинаға осындай қару-жарақ берілуі мүмкін бе?

Бен Ходжес: Әрине, оларға Abrams немесе «Леопард» берілсе, тіптен жақсы болар еді. Алдағы уақытта мұндай техникалар да беріледі деп ойлаймын, білмеймін… Бірақ өткен аптада көргеніміз де бос нәрсе емес. Украиндар қарсы шабуылдың келесі шешуші кезеңіне дейін әскердің әлеуетін арттыруға күш салып жатыр. Олар Қырымды азат етеді деп ойлаймын.

Донецк облысына кетіп бара жатқан украин танкілері. Украина, 12 қаңтар 2023 жыл.

Донецк облысына кетіп бара жатқан украин танкілері. Украина, 12 қаңтар 2023 жыл.

Азаттық: Қырым мәселесіне ораламыз, әзірге танк туралы сөйлесейік. Бірнеше мемлекет, оның ішінде Польша мен Ұлыбритания Украинаға танк жіберуге дайын. Бұл соғыс барысын өзгертуге қалай көмектеседі?

Бен Ходжес: Шынайы мүмкіндіктер тұрғысынан алғанда, бұл маңызды. Бірақ оларға техникалық көмек, оқ-дәрі қоры беріліп, жауынгерлерді дайындықтан өткізу керек. Сонда бұл көмек шынайы мүмкіндікке айналады. Мұндай шешімдер батыс елдерінің келесі қадамға өткенін, бұрынғыдай Ресей соғыс қарқынын күшейтеді деп қорықпайтынын көрсетеді. Бұл дер кезінде қабылданған шешім болмаса да, соғыс барысын өзгертуге әлі де кеш емес. Соғыс мұнымен аяқталмайды, Украина Қырымды босатып алғаннан кейін, оған әлі ұзақ қорғануға тура келеді. Қазір жаңа қару-жарақ болмаса да, бірнеше айдан кейін осындай көмек қажет болады. Сондықтан сарапшылар идеясын толықтай қолдаймын…

Азаттық: Қару-жарақ санына қарамаймын дедіңіз. Сонда да Киевке берілген әскери көмек пен Украина қарулы күштерінің қолбасшысы Валерий Залужный сұраған қару-жарақ көлемінің арасында үлкен айырмашылық бар. Ол 700 бронды машина мен 300 танк сұрап еді. Оның өтініші толық орындала ма?

Бен Ходжес: Білмеймін. Көп нәрсе ашық айтылмайды… Ресей Ираннан дрон, Солтүстік Кореядан қысқы әскери форма алып отыр. Украинаға 50 мемлекет көмектесіп жатыр. Біз Украина қалағандай жедел көмек бердік пе? Жоқ. Жеткілікті көмектесіп жатырмыз ба? Жоқ. Тағы көмек бола ма? Болады деп үміттенемін. Қазір Кремльде отырсам, «Немістер Marder мен тағы бір Patriot батареясын беріпті, «Леопард» туралы айтылып жатыр екен» деген ақпарат естір едім. Бұл Ресейдің өз күшіне деген сенімін азайтады.

Азаттық: Осыған дейін украин әскері 2022 жылдың соңына қарай қарсыласын 24 ақпанға дейінгі позициясына қайтарады деп едіңіз. Болжамыңыз неге орындалмады?

Бен Ходжес: Тым оптимистік көзқараста болған сияқтымын. Украинаға ATACMS сияқты алыс қашықтыққа жететін зымыран жүйелерін бере алмаймыз деп ойлаған жоқпын. Батыс елдері барынша көмектеседі деп күттім. Осы жерден жаңылдым. Ресей Бахмут маңында сонша адамын құрбан етіп, кескілескен соғыс жүргізеді деп ойламадым. Қатты болмаса да, қателескенім анық. Қазір Украинаның жағдайға қаншалық бейімделгені, батыс елдерінің жеткілікті көмек бергені маңызды.

Олар Қырымды азат етеді деп ойлаймын. Қырымға Керчь көпірі мен құрлық жол ғана апарады. Бір жол бүлінген, екіншісі де соққыға ұшырайды. Алдағы бірнеше айда солай болады. Украинаға ойын жүзеге асыруға көмектесуіміз керек.

Соледар маңында жасырылған немістің Panzerhaubitze гаубицасы. Украина, 11 қаңтар 2023 жыл.

Соледар маңында жасырылған немістің Panzerhaubitze гаубицасы. Украина, 11 қаңтар 2023 жыл.

GMLRS сияқты алыс қашықтыққа жететін зымыран жүйесін немесе HIMARS-қа арналған 90 километрге дейін ұшатын зымыран бермесек, Ресейдің жеңуіне жағдай жасаймыз. Мәскеу Қырымнан, Ресей мен Беларусьтен соққы жасап, бейбіт халықты қырады. Сондықтан Украинаға алысқа жететін зымырандар, Қырым түбегін жаудан тазартатын техника беруіміз керек.

Азаттық: Демек Украинаның қарсы шабуылдағы жеңісі Батыс елдерінің қолдауына байланысты ма?

Бен Ходжес: Дәл солай. Батыс елдері Украинаны қолдауды жалғастыруы керек. Тым болмаса, осыған дейін берген уәделерімізді орындауға тиіспіз.

Азаттық: Тиісті қолдау көрсетілсе, Украина қалай әрекет етеді?

Бен Ходжес: Ресейдің Бахмут пен оның айналасындағы елдімекендерді басып алуына жол бермеуге тырысады. Солтүстікте Беларусьтің әрекетін қадағалайды. Тағы да қателесетін шығармын, бірақ ол жақтан салмақты соққы бола қоюы екіталай. Ресей әскерінің бір бөлігін Беларуське шоғырландыруы мүмкін, бірақ олар Киевке қауіп төндіре алмайды. Бұған сенбеймін. Сонда да Украинаның бас штабы бәрін бақылауда ұстауы тиіс.

Украина Батыстан алған және өздерінде бар танк күштерін біріктіріп, Қырымды азат етудегі шешуші күшке айналдырады. Бірақ оған дейін бірнеше ай бойы Керчь көпірінде диверсия ұйымдастырып, Мариуполь мен Мелитопольден келетін көлік желісін бұзуға тура келеді.

Жеңіске көмектесетін жағдай қалыптастыру үшін көп жұмыс істеу қажет. Бар іс-қимыл Перекопский мойнағы арқылы (Қырымды құрлықтағы Украинамен байланыстыратын жер. — Ред.) үлкен шабуыл жасаумен ғана шектелмейді. Алыстан зымыран атқылап, арнаулы жасақты жұмылдырып, соңында құрлық әскерін жіберу керек. Украинаның бас штабының өз ақылы өзіне жетеді деп ойлаймын. Украиндар адам шығынын азайтып, барынша ұтымды соғысуымен таңғалдырды.

Азаттық

Related Articles

  • …Трамп пен Масктың ештеңесі кетпейді.

    …Трамп пен Масктың ештеңесі кетпейді.

    Азаттық радиосы қызметін тоқтатса, Трамп пен Масктың ештеңесі кетпейді. Екі миллиардер арзан, уақытша саяси ұпай жинайды. Ал Қазақстанның жоғалтатыны өте көп. Азаттық радиосы қызметін тоқтатса, елімізде “Заң мен тәртіп диктатурасының” көкесі сонда болады. Ол отызға жуық саяси тұтқынның қазіргі шарасыз күйін алда бүкіл қазақ қоғамы кешеді деген сөз. Мүмкін сол кезде сөз еркіндігінің құнын ел болып түсінетін шығармыз. Бірақ, ашығын айтқанда, оған да күмәнім бар. Азаттық радиосы жабылады деп бүгін бөркін аспанға атып жатқандар, “Тәртіпке бағынған құл болмайды” деп “Азаттықсыз” Қазақстанда саяси режимнің репрессиясын ақтап алады. Оған менің еш күмәнім жоқ. Shalkar Nurseitov

  • Қазақстан әскерінің қауқары қандай? Министрлік өкілі мен сарапшының айтқаны

    Қазақстан әскерінің қауқары қандай? Министрлік өкілі мен сарапшының айтқаны

    Мейірім БАҚЫТЖАН “Батыл тойтарыс-2023″ стратегиялық командалық-штабтық әскери оқу-жаттығуына қатысып жатқан қазақстандық сарбаздар. 2023 жылдың қыркүйек айы. Қорғаныс министрлігінің телеграм-арнасынан алынған сурет. Биыл Қазақстанда екі әскери колледж ашылмақ. 27 ақпанда Астанада журналистерге осы жаңалықты жеткізген қорғаныс министрлігінің өкілі Мұрат Олжабаев қазіргі кезде Қазақстан армиясында жоғары деңгейдегі офицерлер жеткілікті, кадр тапшылығы жоқ деді. Бұл сөзге бірқатар депутаттар да қосылады. Ал кейбір сарапшы ел армиясына кәсіби білікті маман мен қорғаныс саласына түбегейлі реформа жүргізу қажет деп есептейді. “АРМИЯДА ЖОҒАРЫ БІЛІКТІ МАМАН ЖЕТКІЛІКТІ” Астана, Щучинск пен Шымкент қалаларында әскери колледждер бұрыннан бар, енді олардың саны беске жетпек. Қорғаныс министрлігі әскери білім және ғылым департаментінің бастығы Мұрат Олжабаевтың айтуынша, жақында Алматы мен Қарағанды қалаларында жаңадан

  • Зеленский мен Трамптың дау-дамайы: төрт түйін

    Зеленский мен Трамптың дау-дамайы: төрт түйін

    Стив ГУТТЕРМАН АҚШ президенті Дональд Трамп (сол жақта) пен Украина президенті Владимир Зеленскийдің суреттерінен коллаж Бұдан нашар болуы мүмкін емес… Владимир Зеленскийдің Ақ үйге сапары біраз мүмкіндікке жол ашатындай көрінген. Кездесу нәтижелі болған жағдайда, шартты түрде Украина мен АҚШ-ты байланыстыратын сирек кездесетін металдар туралы келісімге қол қойылуы мүмкін еді. Сонымен бірге Дональд Трамп үшін Киевті Ресейдің шабуылынан қорғауға қосымша ынталандыру болар еді. Бұған қоса, ел басшыларының кездесуі Ресеймен бітімге келу немесе бейбіт келісімге қол қою жағдайында Вашингтон Киевке қандай қауіпсіздікке кепіл бола алатынын көрсетіп, жалпы кепіл бола ала ма, жоқ па, соны анықтап берер еді. Тіпті мұның ешбіріне қол жетпеген күннің өзінде, таяуда ғана бір-біріне сын айтқан Зеленский мен Трамп кемінде достық

  • Жин Нода: Қазақ хандары мен Цинь империясының байланысы тым терең

    Жин Нода: Қазақ хандары мен Цинь империясының байланысы тым терең

    Өткен жылы қолыма Токио шет тілдер университетінің профессоры Жин Ноданың «Ресей мен Цин империялары арасындағы Қазақ хандықтары: XVIII-XIX ғасырлардағы Орталық Еуразия халықаралық қатынастары» атты зерттеу еңбегі түсті. Өз тарихымызға қатысты болған соң, бір деммен оқып шықтым. Аталған кітапта қазақ ханы Абылай мен өзге сұлтандардың Цин императорына жазған хаттары туралы баяндалады. Жақында Жин Нодамен хабарласып, көкейімізде жүрген сұрақтарды қойдық. – Ғылыми зерттеу кітабыңыз ерте­дегі Қазақ-Цинь империясы қатына­сын өзгеше тануға арналған академия­лық еңбек екен. Бұндай зерттеуге бет бұруға не түрткі болды? – Мен Орталық Азияны зерттеу барысында Ресей және Цинь империясы туралы көзқарастарда үлкен алшақтық бар екенін байқадым. Осы алшақтықты жою мақсатында мен қазақтардың тарихын ресейлік және қытайлық дереккөздер негізінде зерттеуге кірістім.

  • Этникалық қазақтарға 65 «Ата жолы» картасы берілді

    Этникалық қазақтарға 65 «Ата жолы» картасы берілді

    Этникалық қазақтарға – басқа елдердің азаматтарына Қазақстанда 10 жыл өмір сүруге және жұмыс істеуге құқық беретін 65 «Ата жолы» картасы берілді. Елімізде өз ісін дамытуға дайын бизнес-иммигранттар 27 карта алды, ал сұранысқа ие мамандар осындай 38 картаның иегері атанды. «Қазақтар қай жерде өмір сүрсе де, олардың жалғыз Отаны – Қазақстан. Сондықтан біз үшін шетелде тұратын отандастарымызды қолдау әрқашан маңызды», – деді Қазақстан Республикасының Президенті Қасым-Жомарт Тоқаев. «Ата жолы» картасын алушылар ішінде инженер-физик, инженер-математик, химиялық технологтар, жақ-бет хирургиясының дәрігерлері, педиатрлар және т.б. мамандар бар, олар Ресей, Германия, Моңғолия, Қытай, Ұлыбритания, АҚШ, Израиль, Франция, Нидерланды, Финляндия, Қырғызстан және Өзбекстан секілді шет елдерден келді. «Ата жолы» картасының иегерлері елге кірген кезде 10 жыл

Пікір қалдыру

Электорнды поштаңыз сыртқа жарияланбайды. Белгі қойылған өрісті толтыру міндетті *

Аты-жөні *

Email *

Сайты

Kerey.kz/Керей.кз

Біз туралы:

Тел: +7 7071039161
Email: kerey.qazaq@gmail.com

Kerey.kz тің бұрынғы нұсқасын http://old.kerey.kz тен оқи аласыздар!

KEREY.KZ

Сайт материалдарын пайдаланғанда дереккөзге сілтеме көрсету міндетті. Авторлар пікірі мен редакция көзқарасы сәйкес келе бермеуі мүмкін. Жарнама мен хабарландырулардың мазмұнына жарнама беруші жауапты.

Сайт санағы: