كەيىنگى كەزدە «قازاق راديوسىنان» نەمەسە «شالقاردان» «ءبىزدىڭ اعاي تاماشا» ءانىن ءتۇرلى انشىلەردىڭ ورىنداۋىندا ءجيى بەرىلەتىنىن بايقاپ ءجۇرمىن. بۇل ءان ءبىزدىڭ جاس كەزىمىزدە، وتكەن عاسىردىڭ جەتپىسىنشى جىلدارىندا شىققان بولاتىن. ول كەزدە «ايەل قۇقىعى» دۇرىلدەپ تۇرعان كەز. ءازىل-ءاجۋاسى بار ء(سوزى وسپانحان اعانىكى), اۋەنى ادەمى (ن.تىلەنديەۆ) ءان جۇرت اراسىنا تەز تارادى. ءوزى سول زاماننىڭ، سول ۋاقىتتىڭ تالابىمەن جازىلعان شىعارما بولاتىن. ەركەكتەردىڭ ايەلدەرىنە قولعابىس جاساۋى، كومەكتەسۋى وزەكتى بولعان تۇس شىعار. ونى ۇلكەن دە ايتتى، كىشى دە ايتتى: جەڭگەي كەتسە قىدىرىپ كەش كەلەدى كۇن ءجۇرىپ اعاي ۇيدە وتىرادى شىلپىلداتىپ كىر جۋىپ ءبىزدىڭ اعاي، ءبىزدىڭ اعاي ءبىزدىڭ اعاي تاماشا! وسى سياقتى اندەردىڭ تاربيەسى مەن ىقپالى بولار، بۇگىنگى گەندەرلىك ساياسات تۇسىندا بىرقاتار ەركەكتەر شىن مانىندە «شىلپىلداتىپ كىر جۋىپ»، «كەسپە كەسىپ، نان يلەپ»، «قۇرت قايناتىپ، ماي شايقاپ» كەتتى. ارادا وتىز-قىرىق جىل وتكەن سوڭ راديودان بەرىلەتىن وسى ءان قازىر قۇلاعىما تۇرپىدەي تيەتىن بولىپ ءجۇر. انگە ەشقانداي «پرەتەنزيام» جوق. بىراق بۇگىندە قازاق قوعامى «شىلپىلداتىپ كىر جۋاتىن» ەركەككە ەمەس، بالا-شاعا اسىرايتىن، قوعامنىڭ جۇگىن كوتەرەتىن، ۇلتتىڭ نامىسىن قورعايتىن ازاماتتارعا مۇقتاج. «شىلپىلداتىپ كىر جۋاتىن» جىگىتتەر وكىنىشكە قاراي اليمەنت تولەۋگە دە قاۋقارسىز. ءاننىڭ ءوزى دە – ساياسات، ءسوزى دە ساياسات. وتكەن عاسىردىڭ 30-شى جىلدارى گەرمانيادا ۇكىمەت باسىنا كەلگەن گيتلەر راديودان اسكەري اندەردى تۇراقتى بەرگىزۋدىڭ ارقاسىندا ەكى جىلدىڭ ىشىندە بۇكىل نەمىس حالقى قولداعان فاشيستىك رەجيم قۇرعانى ەستە. ءاننىڭ ءسوزى مي استارىندا (پودسوزنانيە) قالادى. ال بىزدە بۇكىل قوعام بولىپ ەركەك تاربيەلەيتىن، ازامات قالىپتاستىراتىن تۇستا «قازاق راديوسى» مەن «شالقاردان» قازاق ازاماتتارىنىڭ «وريەنتاتسياسىن» «كىر جۋعا» باعىتتايتىن اندەر بەرۋدىڭ قاجەتى جوق دەپ ەسەپتەيمىن. مەنىڭ پىكىرىم كەيبىرەۋلەرگە ۇناماۋى دا مۇمكىن. بىراق ۇلت تاعدىرىنا قاتىستى ۇساق-تۇيەك بولمايدى دەپ ەسەپتەيمىن!