الماتىدا 200 دارىگەر ۆيرۋس جۇقتىردى دەگەن نە سۇمدىق!
kerey.kz
الماتىدا 200 دارىگەر ۆيرۋس جۇقتىردى دەگەن نە سۇمدىق! ەشقانداي ەلدە بولماعان جاعداي عوي. قالاداعى ەڭ ۇلكەن 12 اۋرۋحانا تۇتاس جابىلدى. كوپ سالالى 4 اۋرۋحانا ول دا جابىلۋدىڭ الدىندا دەيدى. سوندا، كوزگە كورىنبەيتىن جاۋمەن سوعىستا الدىڭعى شەپتە تۇرۋعا ءتيىستى اسكەر قيراپ تۇسسە، قالعان جۇرت نە ىستەيدى؟.. ەگەر 200 دارىگەردىڭ ارقايسىسىنىڭ وتباسىندا ورتاشا ەسەپپەن 5-6 ادام بار دەسەك، “كونتاكتنىيلاردىڭ” سانى قانشا بولىپ كەتەدى؟ مۇمكىن تەست-سيستەما قاتە كورسەتىپ تۇرماسا… قالاي بولعاندا دا 200 دەگەن وتە كوپ… ەندى، سوزىلمالى دەرتتەرى بار نەمەسە حيرۋرگيالىق كومەككە مۇقتاج ناۋقاستارعا دا قيىن بولادى-اۋ… ءبىر عانا الماتىدا 200 دارىگەردىڭ اۋرۋى – بىرىنشىدەن، ۆيرۋس الماتىعا ەرتەرەك، ياعني، اقپان ايىندا كەلگەن دەگەندى بىلدىرەدى. اقپان-ناۋرىز ايىندا ءبىرتالاي ادام وتە سوزىلمالى، جازىلۋى قيىن بولعان تۇماۋمەن اۋىردى. وندا، سول ۋاقىتتا اۋىرعان ادامدارعا پتسر جاساۋ كەرەك. سوندا كوپ جايتقا كوز جەتەدى. مۇمكىن اۋىرىپ، تۇرعانداردا انتيتەلا قالىپتاسقان شىعار. ەكىنشىدەن، 200 دارىگەردىڭ سىرقاتتانۋى ءبىزدىڭ مەديتسينا سالاسىنىڭ ۆيرۋسقا دايىندىعىنىڭ السىزدىگىن كورسەتەدى. ۇشىنشىدەن، دارىگەرلەر قورعانىس جابدىقتارىمەن قامتاماسىز ەتىلمەگەن جانە وزدەرى دە ۆيرۋسقا قارسى قورعانۋدى ۇيرەنىپ، قامدانباعان. قالاي بولعاندا دا، دارىگەرلەرگە مەملەكەت، حالىق تاراپىنان ۇلكەن قولداۋ كەرەك. مۇمكىن، قازىرگى ساتتە الدىڭعى ساپتا، ينفەكتسيالىق بولىمدەردە جۇمىس جاساپ جاتقان دارىگەرلەردىڭ اتى-ءجونىن، جەكە ەسەپ-شوتتارىن دەنساۋلىق ساقتاۋ مينيسترلىگىنىڭ رەسمي سايتىندا جاريالاۋ كەرەك شىعار. ەل-جۇرت تانىپ، ءبىلىپ، تىلەكتەس بولىپ وتىرار. جاعدايلى ازاماتتار جەكە ەسەپ شوتتارىنا ادرەستى قارجىلىق قولداۋ كورسەتەر. قازىرگى ۋاقىتتا بىرلىك، تۇتاستىق، ەلدىڭ ەرتەڭى دەگەن ۇعىمداردى بىلاي قويعاندا، ءاربىر ادام باستىڭ اماندىعى، دەننىڭ ساۋلىعى ءۇشىن دارىگەرلەردى قولداۋ كەرەك. ءبىزدىڭ ەلدەگى ىلگەرىدە قاتتى بىلىققان سالانىڭ ءبىرى مەديتسينا ەدى. ول بارىمىزگە ءمالىم، سول سەبەپتى بۇگىنگى تاڭداعى قيىندىقتان كوررۋپتسيالىق تىزبەكتىڭ باسىندا تۇرعان سالالىق “باستىقتار” ەمەس، جەكەلەگەن، قاراپايىم دارىگەرلەردىڭ جانكەشتىلىگى عانا الىپ شىعادى. جاساندى ۆيرۋستىڭ بەتىن دارىگەر-ادامنىڭ ەرلىگى مەن وعان رۋحاني – ماتەريالدىق كومەك كورسەتەتىن ويى ءتۇزۋ، ساناسى تۇنىق حالىق قايتارا الادى. وعان كۋا الەمدەگى ۆيرۋسپەن كۇرەستەگى ازىرشە جالعىز جەڭىمپاز – قىتايداعى جاعداي.
پىكىر قالدىرۋ