2020 جىلدىڭ 28 مامىرىندا، ماسكەۋدەن جىبەرىلگەن مەنىڭ جۇگىم قىزىلورداعا كەلدى. CDEK فيرماسى، تاپسىرىس ءنومىرى 1173341109 جىبەرىلىم. قوس چەمودان. مەنىڭ قۇجاتتارىم، بازارلىقتارىم، كيىم-كەشەك، ۇيالى تەلەفوندارىم ءوز ورنىندا. نەمىس تىلىندەگى گيوتە جيناعى،  ورىس كلاسسيكتەرىنىڭ كىتاپتارى، كسرو جۋرنالدارى  مەن باسقا ادەبيەت تە ءوز ورنىندا. بىراق، قىدىربەك رىسپەكۇلى قۇراستىرعان، جۇدىرىقتاسۋ جۇلدىزدارىنىڭ قولتاڭبالارىنا تولى “قازاق بوكسشىلارى” اتتى كىتاپ جوعالعان. سونىمەن قاتار، تاريحشىمىز كارىشال اسان اتانىڭ قوس كىتابى دا جوق. ارينە، ءبارى بولۋى مۇمكىن. الايدا، قازاقي كىتاپتارىمدى ورىس جۇك تاسۋشىسى نەمەسە رەسەيلىك شەكاراشى جىمقىردى دەپ ويلامايمىن. پوگون تاققان جەرگىلىكتى حايۋانداردىڭ ساسىق ارەكەتى بولسا كەرەك.

بارىپ تۇرعان وڭباعاندار عوي! مىسالى، بوكس كىتابىمدا ماعان ارنالعان ەرماحان ىبىرايىموۆ پەن جاندوس كوكىموۆتىڭ ىزگى تىلەكتەرى جازىلعان. سوندا نە؟ وفيتسەر اتاعىمەن جامىلعان قىلمىسكەر ۇستارامەن مەنىڭ اتىمدى جويىپ، ءوز ەسىمىن قويا ما؟ ال، كارىشال اسان اتانىڭ تۋىندىلارى  -  ولار ءتىپتى مارقۇم جازۋشى وتباسىنىڭ سىيلىعى. ايتپاقشى، سىنشىل قالامگەر بولسا دا، كارەكەڭ “پريزراك نەزاۆيسيموستي” كىتابىندا سول كەزدەگى سىرتقى ىستەر ءمينيسترىمىز قاسىم-جومارت توقاەۆتى جاس، دارىندى جەتەكشى رەتىندە ماقتايدى.

مەنىڭ جەكە مەنشىگىمدە ءۇي-پاتەر، اۆتوكولىك، زەرگەرلىك بۇيىمدار جانە باسقا قۇندى بۇيىمدار جوق. جالعىز بايلىعىم  -  وسىنداي كىتاپتار، رۋحاني بايلىقتار. ەندى نە؟ قوماعاي، جەمكور جەندەتتەر  ماعان ارنالعان ارداقتى اعالارىمىزدىڭ قولتاڭبالارىن ۇرلاۋدان تايىنباي ما؟ وسىنداي ۇرلىق اقشالاي پايدانى دا ونشا كەلتىرمەيدى. قازاق بوكسشىلارىنىڭ تاريحى مەن كارىشال اسان اتانىڭ جازبالارىن “سوتبيس”،  “كريستيس” اۋكتسيونىنان ساتپايتىنى دا انىق. بۇنداي قىلمىس مادەنيەت پەن  رۋحاني بايلىقتارىمىزدى اياق استى ەتەتىن پاسىق ارەكەت ەمەي نەمەنە؟!

سوندىقتان، پرەزيدەنت توقاەۆقا اشىق حاتىمدى جولداۋعا تۋرا كەلەدى.

قۇرمەتتى قاسىم-جومارت كەمەلۇلى! ءسىز بەن ءبىزدى بىرىكتىرەتىن نارسە  -  شەتەل تىلدەرى مەن كىتاپتارعا قاراي قۇمارلىق. بالا كەزىمدە، ىنىشەگىڭىز باقىتبەك شابارباەۆتىڭ كورشىسى بولدىم. الماتى ايماعىنداعى كيروۆسكي (قازىرگى بالپىق بي) ەلدى مەكەنىندە ورىن تەپكەن تۇرعىن ۇيىندە پاتەرلەرىمىز ءتىپتى جاپسارلاس بولدى ءبىر قاباتتا. كەيدە، اكەڭىز، جازۋشى كەمەل توقاەۆتى دا كورەتىنمىن. باقىتبەك پەن كابيسانىڭ بالالارى  -  اسەمگۇل، انەل مەن كەنجەسى شىڭعىسپەن وينايتىنمىن. وكىنىشكە وراي، قاسەكە، ءسىزدى ونشا كورمەيتىنمىن. ويتكەنى، ءسىز سەكسەنىنشى جىلداردىڭ باسىندا دا، ماڭىزدى ديپلوماتيالىق جۇمىستارمەن شۇعىلدانىپ، كوبىنەسە جىراقتا جۇرەتىنسىز.

قۇرمەتتى قاسىم-جومارت كەمەلۇلى! كۇزەت پەن بەينەباقىلاۋ بار قويمالاردان جۇمباقتى تۇردە جوعالعان كىتاپتارىمنىڭ قايتارۋىنا قولعابىس بەرىڭىزشى.

رەداكتسيا ءۇشىن. مەنىڭ www.facebook.com/nauryz.daniyar پاراقشامدا بىرنەشە تانىمال بوكسشىلارمەن تەلەفون سۇحباتتارىم جاريالانعان: سەرىك قوناقباەۆ، پاتريتسيو وليۆا، الەكساندر لەبزياك… دەمەك، جۇدىرىقتاسۋ ونەرىنە اقپاراتتىق قولداۋ كورسەتۋگە وزىمشە تىرىسامىن.