2020 жылдың 28 мамырында, Мәскеуден жіберілген менің жүгім Қызылордаға келді. CDEK фирмасы, тапсырыс нөмірі 1173341109 жіберілім. Қос чемодан. Менің құжаттарым, базарлықтарым, киім-кешек, ұялы телефондарым өз орнында. Неміс тіліндегі Гёте жинағы,  орыс классиктерінің кітаптары, КСРО журналдары  мен басқа әдебиет те өз орнында. Бірақ, Қыдырбек Рыспекұлы құрастырған, жұдырықтасу жұлдыздарының қолтаңбаларына толы “Қазақ боксшылары” атты кітап жоғалған. Сонымен қатар, тарихшымыз Кәрішал Асан Атаның қос кітабы да жоқ. Әрине, бәрі болуы мүмкін. Алайда, қазақи кітаптарымды орыс жүк тасушысы немесе ресейлік шекарашы жымқырды деп ойламаймын. Погон таққан жергілікті хайуандардың сасық әрекеті болса керек.

Барып тұрған оңбағандар ғой! Мысалы, бокс кітабымда маған арналған Ермахан Ыбырайымов пен Жандос Көкімовтың ізгі тілектері жазылған. Сонда не? Офицер атағымен жамылған қылмыскер ұстарамен менің атымды жойып, өз есімін қоя ма? Ал, Кәрішал Асан Атаның туындылары  -  олар тіпті марқұм жазушы отбасының сыйлығы. Айтпақшы, сыншыл қаламгер болса да, Карекең “Призрак независимости” кітабында сол кездегі сыртқы істер министріміз Қасым-Жомарт Тоқаевты жас, дарынды жетекші ретінде мақтайды.

Менің жеке меншігімде үй-пәтер, автокөлік, зергерлік бұйымдар және басқа құнды бұйымдар жоқ. Жалғыз байлығым  -  осындай кітаптар, рухани байлықтар. Енді не? Қомағай, жемкор жендеттер  маған арналған ардақты ағаларымыздың қолтаңбаларын ұрлаудан тайынбай ма? Осындай ұрлық ақшалай пайданы да онша келтірмейді. Қазақ боксшыларының тарихы мен Кәрішал Асан Атаның жазбаларын “Сотбис”,  “Кристис” аукционынан сатпайтыны да анық. Бұндай қылмыс мәдениет пен  рухани байлықтарымызды аяқ асты ететін пасық әрекет емей немене?!

Сондықтан, президент Тоқаевқа ашық хатымды жолдауға тура келеді.

Құрметті Қасым-Жомарт Кемелұлы! Сіз бен бізді біріктіретін нәрсе  -  шетел тілдері мен кітаптарға қарай құмарлық. Бала кезімде, інішегіңіз Бақытбек Шабарбаевтың көршісі болдым. Алматы аймағындағы Кировский (қазіргі Балпық би) елді мекенінде орын тепкен тұрғын үйінде пәтерлеріміз тіпті жапсарлас болды бір қабатта. Кейде, әкеңіз, жазушы Кемел Тоқаевты да көретінмін. Бақытбек пен Кәбисаның балалары  -  Әсемгүл, Әнел мен кенжесі Шыңғыспен ойнайтынмын. Өкінішке орай, Қасеке, сізді онша көрмейтінмін. Өйткені, сіз сексенінші жылдардың басында да, маңызды дипломатиялық жұмыстармен шұғылданып, көбінесе жырақта жүретінсіз.

Құрметті Қасым-Жомарт Кемелұлы! Күзет пен бейнебақылау бар қоймалардан жұмбақты түрде жоғалған кітаптарымның қайтаруына қолғабыс беріңізші.

РЕДАКЦИЯ ҮШІН. Менің www.facebook.com/nauryz.daniyar парақшамда бірнеше танымал боксшылармен телефон сұхбаттарым жарияланған: Серік Қонақбаев, Патрицио Олива, Александр Лебзяк… Демек, жұдырықтасу өнеріне ақпараттық қолдау көрсетуге өзімше тырысамын.