جازۋشى-پۋبليتسيست

مارات ءبايدىلداۇلى (توقاشباەۆ):

قر پرەزيدەنتتىگىنە كانديدات رەتىندە ۇسىنىلعان حايرۋللا عابجاليلوۆتى وسك سايلاۋ تۋرالى زاڭعا سايكەس كەلمەيدى-مىس دەگەن جەلەۋمەن تىزىمنەن سىزىپ تاستاعانى ءمالىم. 11- قازاندا «ورالمانداردىڭ «اسار» بىرلەستىگى» رەسپۋبليكالىق قوعامدىق بىرلەستىگى ۇسىنعان حايرۋللا عابجاليلوۆ قر پرەزيدەنتتىگىنە كانديدات رەتىندە تىركەلۋ ءۇشىن ءتيىستى بارلىق قۇجاتتارىن تاپسىرعان. بىراق وسك ءتۇرلى ايلا-شارعىلار ارقىلى ءوز دەگەندەرىنە جەتتى. ايتار ۋاجدەرى: «حايرۋللا عابجاليلوۆ قر ازاماتى ەمەس جانە قازاقستاندا سوڭعى 24 جىل تۇرماعان». حايرۋللانىڭ تەك الماتىدا 46 جىلدان بەرى تۇراتىنى قۇجات بويىنشا دالەلدەندى.

وسك-نىڭ تاعى ءبىر شارتى مۇلدە قيسىنسىز ەكەندىگى بايقالادى. قر پرەزيدەنتتىگىنە ۇمىتكەرگە «سايلاۋ تۋرالى» زاڭعا سايكەس قويىلاتىن تالاپتاردىڭ ىشىندە «كانديداتتىڭ مەملەكەتتىك قىزمەتتە نە بولماسا سايلانبالى مەملەكەتتىك لاۋازىمدا كەمىندە 5 جىل ەڭبەك ءوتىلى بولۋعا ءتيىس» دەگەن ەرەجە بار. ءىس جۇزىندە بۇل تالاپ قازاقستان كونستيتۋتسياسىنىڭ 14-بابىنىڭ 1-تارماعىندا: «زاڭ مەن سوت الدىندا جۇرتتىڭ ءبارى تەڭ» ەكەندىگى باياندى ەتىلگەن قاعيداعا قايشى. ال وسى باپتىڭ 2-تارماعىندا: “تەگىنە، الەۋمەتتىك، لاۋازىمدىق جانە مۇلىكتىك جاعدايىنا، جىنىسىنا، ناسىلىنە، ۇلتىنا، تىلىنە، دىنگە كوزقاراسىنا، نانىمىنا، تۇرعىلىقتى جەرىنە بايلانىستى نەمەسە كەز كەلگەن وزگە جاعداياتتار بويىنشا ەشكىمدى ەشقانداي كەمسىتۋگە بولمايدى» دەپ كورسەتىلگەن.

ياعني پرەزيدەنتتىكككە ۇمىتكەردەن بەس جىل مەملەكەتتىك قىزمەتتە بولۋىن تالاپ ەتۋ بۇل لاۋازىمدىق نەگىزدە كەمسىتۋشىلىككە سوقتىرىپ تۇر. «سايلاۋ تۋرالى» زاڭ ەرەجەلەرى قولدانىستاعى كونستيتۋتسياعا قايشى بولعاندىقتان بۇل تالاپتار ءۇزىلدى-كەسىلدى زاڭسىز بولىپ تابىلادى. سوندىقتان زاڭ تالاپتارىن ورىنداۋدان بۇرىن الدىمەن ول زاڭداردىڭ اتا زاڭعا سايكەستىگى تەكسەرىلۋگە ءتيىس!