الداعى 20 جىلدا بارشا قازاقتىڭ بولاشاعى وسى شۆەد ازاماتىنا تىكەلەي بايلانىستى بولماق.

شۆەتسيادا تىركەلگەن، ەۋرووداقتىڭ جاسىل ەنەرگەتيكاداعى الپاۋىت كومپانياسى – “SVEVIND Energy Group” توراعاسى ۆولفگانگ كرووپ الەمدەگى ينۆەستورلاردى قازاقستاندا مىڭداعان جەل مەن كۇن گەنەراتورلارىن قويىپ، ودان كەلەتىن ەكولوگيالىق تازا ەلەكتر ەنەرگياسىنا “جاسىل” گيدروگەن (سۋتەگى) وندىرەتىن زاۋىت جاساۋعا كوندىردى. قازاق دالاسىندا، كاسپي تۇبىنە قويىلاتىن زاۋىت “HYRASIA ONE” دەپ اتالاتىن بولادى.

ماڭعىستاۋ جازىعىندا شىڭعىسحاننىڭ اسكەرىنەن دە كوپ كۇن باتارەيالارى مەن جەل گەنەراتورى سالىنادى. ولار 40 گيگاۆاتت قۋات بەرەدى. وسى ەنەرگيا كاسپي تەڭىزىنىڭ جاعالاۋىنداعى ەلەكتروليزەرلەردى اينالدىرادى. سوندا زاۋىت جىلىنا ەكى ميلليون توننا جاسىل گيدروگەن (سۋتەگى) وندىرەدى. بۇل 2030 جىلى ەۋرووداق تۇتىنۋى مۇمكىن بارلىق سۋتەگى كولەمىنىڭ 20 پايىزى. ءبىر سوزبەن ايتقاندا، بۇل سۋتەگى الەمىندەگى جاڭا قاشاعان، تەڭىز كەن ورىندارىنا پارا-پار. دەمەك، ەرتەڭ مۇناي بىتسە دە، قازاقتىڭ بەرەكەسى بىتپەيدى دەگەن ءسوز. ءبىز جاڭا مۇناي – گيدروگەننىڭ الەمدەگى ءىرى ويىنشىسىنا اينالامىز.

50 ميلليارد دوللار تۇراتىن جوبانى الەم ينۆەستورلارىنىڭ پۋلى قارجىلاندىرادى. بۇل ءبىزدىڭ ۇلتتىق قورمەن تەڭ. ءبىز ءوزىمىز ونداي ەشتەڭە سالا الماس ەدىك. تەحنولوگيامىز دا، اقشامىز دا جوق. سوندىقتان ءبىزدى تاڭداعان، ءبىزدىڭ پەرسپەكتيۆامىزعا سەنىپ وتىرعان كروپپ سىندى ازاماتتاردى باعالاۋىمىز كەرەك.

2022 جىلدىڭ قازان ايىندا HYRASIA ONE قازاقستان ۇكىمەتىمەن ينۆەستيتسيالىق كەلىسىمگە قول قويدى. بيىل جوبانى ازىرلەۋدىڭ ءبىرىنشى كەزەڭى ءساتتى اياقتالدى. “ILF Consulting Engineers” پەن “Roland Berger” ينجەنەرلەرى كونتسەپتسيالىق زەرتتەۋ جۇمىستارىن ءبىتىرىپ، ينۆەستورلارعا تاپسىردى.

جوسپار بويىنشا قازاقستان 2030 جىلى العاش رەت گيدروگەن وندىرمەك. ال 2032 جىلى بىزدەگى تەڭدەسسىز تەحنولوگيالىق زاۋىت ءوزىنىڭ تولىق قۋاتىنا شىعاتىن بولادى.

وسى جۇمىس ورىندالسا، وندا ءبىز (كومىر مەن مۇناي جاقپايتىن) جاڭا داۋىرگە اۋىساتىن بولامىز.

ايبار ولجاەۆ