“ۋكراينا اسكەرىنىڭ رەسەي اننەكسيالاپ العان قىرىمعا سوققى جاساۋ مۇمكىندىگى بولۋى ءتيىس، بۇل كيەۆكە بولاشاق كەلىسسوزدەردە قوياتىن شارتتارىنىڭ سالماعىن ارتتىرۋعا جاعداي جاسايدى. اقش پرەزيدەنتى دجو بايدەن اكىمشىلىگىنىڭ پىكىرى وسى جاققا قاراي ويىسىپ بارادى” دەپ جازدى New York Times (NYT) باسىلىمى.

گازەتتىڭ جازۋىنشا، رەسەي باسقىنشىلىعى باستالعالى بەرى اكىمشىلىك وكىلدەرى قاقتىعىس ۋشىعىپ كەتپەس ءۇشىن كيەۆكە تۇبەككە سوققى جاسايتىن قارۋ بەرۋدەن باس تارتقان.

ەندى باسىلىمنىڭ مالىمەتىنشە، بايدەن اكىمشىلىگى ۋكراين شەنەۋنىكتەرىمەن ماسەلەنى تالقىلاعاننان كەيىن كيەۆكە مۇنداي قارۋ-جاراق كەرەك ەكەنىنە كوزى جەتە باستاعان ءتارىزدى.

باسىلىمنىڭ جازۋىنشا، امەريكا شەنەۋنىكتەرى مەن ساراپشىلارىنىڭ رەسەي يادرولىق قارۋ قولدانادى دەگەن كۇدىگى دە سەيىلە باستاعان. دەگەنمەن مۇنداي قاتەر ءالى جويىلماعان.

بىراق ماسەلە ۋكرايناعا الىسقا ۇشاتىن راكەتالاردى بەرۋ جونىندە بولىپ وتىرعان جوق. تۇبەكتى جابدىقتاپ وتىرعان جولدارعا شابۋىل جاساۋ ءۇشىن HIMARS راكەتا قوندىرعىلارى مەن Bradley بروندى تەحنيكاسىن پايدالانۋ مۇمكىندىگى تالقىلانىپ جاتىر.

NYT دەرەگىنشە، بۇل ماسەلە جۋىردا اق ۇيدەگى كەزدەسۋ كەزىندە دە تالقىلانعان.

• رەسەيدىڭ كراسنودار ولكەسىن تۇبەكپەن جالعاپ تۇرعان قىرىم كوپىرىندە بىلتىر 8 قازاندا جارىلىس بولعان. كوپىردىڭ ءبىر بولىگى قيراعان. رەسەي جاعى وقيعاعا ۋكراين ارنايى قىزمەتىن ايىپتاعان، ال كيەۆ قىرىم كوپىرىن جارۋعا قاتىسى بارىن رەسمي تۇردە مويىنداعان جوق.

ازات ەۋروپا / ازاتتىق راديوسى