“Украина әскерінің Ресей аннексиялап алған Қырымға соққы жасау мүмкіндігі болуы тиіс, бұл Киевке болашақ келіссөздерде қоятын шарттарының салмағын арттыруға жағдай жасайды. АҚШ президенті Джо Байден әкімшілігінің пікірі осы жаққа қарай ойысып барады” деп жазды New York Times (NYT) басылымы.

Газеттің жазуынша, Ресей басқыншылығы басталғалы бері әкімшілік өкілдері қақтығыс ушығып кетпес үшін Киевке түбекке соққы жасайтын қару беруден бас тартқан.

Енді басылымның мәліметінше, Байден әкімшілігі украин шенеуніктерімен мәселені талқылағаннан кейін Киевке мұндай қару-жарақ керек екеніне көзі жете бастаған тәрізді.

Басылымның жазуынша, Америка шенеуніктері мен сарапшыларының Ресей ядролық қару қолданады деген күдігі де сейіле бастаған. Дегенмен мұндай қатер әлі жойылмаған.

Бірақ мәселе Украинаға алысқа ұшатын ракеталарды беру жөнінде болып отырған жоқ. Түбекті жабдықтап отырған жолдарға шабуыл жасау үшін HIMARS ракета қондырғылары мен Bradley бронды техникасын пайдалану мүмкіндігі талқыланып жатыр.

NYT дерегінше, бұл мәселе жуырда Ақ үйдегі кездесу кезінде де талқыланған.

• Ресейдің Краснодар өлкесін түбекпен жалғап тұрған Қырым көпірінде былтыр 8 қазанда жарылыс болған. Көпірдің бір бөлігі қираған. Ресей жағы оқиғаға украин арнайы қызметін айыптаған, ал Киев Қырым көпірін жаруға қатысы барын ресми түрде мойындаған жоқ.

Азат Еуропа / Азаттық радиосы