“Ukraina äskeriniñ Resey anneksiyalap alğan Qırımğa soqqı jasau mümkindigi boluı tiis, bwl Kievke bolaşaq kelissözderde qoyatın şarttarınıñ salmağın arttıruğa jağday jasaydı. AQŞ prezidenti Djo Bayden äkimşiliginiñ pikiri osı jaqqa qaray oyısıp baradı” dep jazdı New York Times (NYT) basılımı.

Gazettiñ jazuınşa, Resey basqınşılığı bastalğalı beri äkimşilik ökilderi qaqtığıs uşığıp ketpes üşin Kievke tübekke soqqı jasaytın qaru beruden bas tartqan.

Endi basılımnıñ mälimetinşe, Bayden äkimşiligi ukrain şeneunikterimen mäseleni talqılağannan keyin Kievke mwnday qaru-jaraq kerek ekenine közi jete bastağan tärizdi.

Basılımnıñ jazuınşa, Amerika şeneunikteri men sarapşılarınıñ Resey yadrolıq qaru qoldanadı degen küdigi de seyile bastağan. Degenmen mwnday qater äli joyılmağan.

Biraq mäsele Ukrainağa alısqa wşatın raketalardı beru jöninde bolıp otırğan joq. Tübekti jabdıqtap otırğan joldarğa şabuıl jasau üşin HIMARS raketa qondırğıları men Bradley brondı tehnikasın paydalanu mümkindigi talqılanıp jatır.

NYT dereginşe, bwl mäsele juırda Aq üydegi kezdesu kezinde de talqılanğan.

• Reseydiñ Krasnodar ölkesin tübekpen jalğap twrğan Qırım köpirinde bıltır 8 qazanda jarılıs bolğan. Köpirdiñ bir böligi qirağan. Resey jağı oqiğağa ukrain arnayı qızmetin ayıptağan, al Kiev Qırım köpirin jaruğa qatısı barın resmi türde moyındağan joq.

Azat Europa / Azattıq radiosı