قازاقستان سىرتقى ىستەر ءمينيسترىنىڭ ورىنباسارى رومان ۆاسيلەنكو نەمىستىڭ Deutsche Welle باسىلىمىنا بەرگەن سۇحباتىندا قازاقستاننىڭ سىرتقى ساياساتى تۋرالى ايتا كەلە، “رەسپۋبليكا رەسەيدىڭ دە، اقش-تىڭ دا، قىتايدىڭ دا كوزقاراسىن ۇستانبايدى” دەپ مالىمدەپ، قازاقستاننىڭ كوپۆەكتورلى ساياساتتان اينىمايتىنىن اتاپ وتكەن.
ونىڭ سوزىنشە، قازاقستان ۋكرايناداعى جاعدايعا بايلانىستى ۇستانىمىن ناقتى بەلگىلەپ العان.
“ول – مەملەكەتتەردىڭ اۋماقتىق تۇتاستىعى قۇرمەتتەلۋگە ءتيىس دەپ كورسەتىلگەن بۇۇ جارعىسى. ونىڭ ىشىندە، ارينە، ۋكراينا دا بار. بۇل ۇستانىم بارلىق سەرىكتەسىمىزگە تۇسىنىكتى. ءبىز رەسەيدىڭ دە، اقش-تىڭ دا، قىتايدىڭ دا ۇستانىمىن العا شىعارمايمىز. ءبىز قازاقستانىڭ ۇستانىمىندامىز، سىرتقى ساياساتىمىزدىڭ نەگىزىندە ءوزىمىزدىڭ ۇلتتىق مۇددەمىز جاتىر” دەيدى سىرتقى ىستەر ءمينيسترىنىڭ ورىنباسارى.
ونىڭ سوزىنشە، قازاقستان “قىتاي ۇسىنعان 12 پۋنكتتەن تۇراتىن “بەيبىت جوسپارعا” دا قولداۋ بىلدىرگەن. ءمينيستردىڭ ورىنباسارى “ەگەر وسى جوسپار نەمەسە حالىقارالىق قاۋىمداستىقتىڭ وزگە دە كۇش-جىگەرى قانتوگىستى توقتاتىپ، جانجالدى ديپلوماتيالىق جولمەن رەتتەۋگە مۇمكىندىك تۋعىزاتىن بولسا، تەك قۋانامىز. ەكى تاراپ قاجەت ەتسە، ءوز ءرولىمىزدى اتقارۋعا دايىنبىز” دەگەن.
قازاقستان رەسەيدىڭ ۋكرايناعا اشقان سوعىسىن رەسمي تۇردە ايىپتاماعان، بىراق ۋكراينانىڭ اۋماقتىق تۇتاستىعىن مويىنداعان.
بيىل اقپاندا بۇۇ-عا مۇشە ەلدەر رەسەي اسكەرىن ۋكراينادان اكەتۋگە ءتيىس دەگەن ماسەلە بويىنشا قارارعا داۋىس بەرگەندە، قازاقستان قالىس قالعان.
ازات ەۋروپا / ازاتتىق راديوسى
پىكىر قالدىرۋ