اقكوڭىل باستىق
kerey.kz
ىلگەرىدە “قاز ءبىلىم جانە عىلىم” دەيتىن مەكەمەگە مينيسترلىك كوز اشقالى اكىمدىكتە ىستەگەن شەنەۋنىكتى باستىق قىلىپ جىبەردى.
الگى مەكەمە وزىنە تيەسىلى جۇمىستى عانا ىستەپ تىپ-تىنىش جاتىر ەدى.
جاڭا باستىق ىسكە قاتتى كىرىستى.
– نارىققا، وركەنيەتكە ساي بولۋ كەرەك!- دەدى. دەرەۋ جاڭا ادامداردى جۇمىسقا الدى.
ءبىر كۇنى كابينەتىمىزگە قىلداي قارا گالستۋك، قارا كاستوم-شالبار كيگەن ەڭگەزەردەي جاس جىگىت كىرىپ كەلدى.
- پالەنشە تولەنشەەۆيچ دەگەن ءسىز بە؟ قانداي تاماق ىشەسىز؟
قولىندا بەس-التى تاماقتىڭ ءتىزىمى تۇر.
سويتسەك باستىقتىڭ “ۇجىمدى تۇسكى اسپەن قامتاماسىز ەتۋ جونىندەگى كومەكشىسى” ەكەن. ءوزىنىڭ ايتۋىنشا – مەنەدجەر – ماركەتينگ.
تۇستە كابينەتتەردى ارالاپ تاپسىرىس قابىلدايدى دا، تاماقتى الدىرىپ بەرەدى.
كەز كەلگەن تاماقتى ءۇش قايتالاپ ىشسەڭ – شىعاسىڭ عوي. ءبىز ونداي استان تەز شىقتىق. ەكى-ءۇش اي سىقيىپ، سەندەلىپ ءجۇرىپ الگى جىگىت تە جۇمىستان شىعىپ كەتتى.
تۇسىنىكسىز جۇمىسقا كىرىپ، تۇسىنىكسىز جۇمىس ىستەپ كەتىپ جاتقاندار جالعىز ول ەمەس ەدى.
شتات اشىپ، شتات جاۋىپ، شابىلىپ جۇرگەن دە باستىقتىڭ ءوزى.
جاڭا باستىق ءبىر كۇنى “باسپاسوزبەن جۇمىس ىستەۋ كەرەك، ءوز-ءوزىمىزدى تانىتۋ كەرەك، ول ءۇشىن تانىمال عالىمداردى شاقىرىپ، عىلىمي-پراكتيكالىق كونفەرەنتسيا وتكىزۋ كەرەك” دەگەن تاپسىرما بەردى.
ءبىزدىڭ جۇمىسقا نەگىزى وندايدىڭ دىمعا كەرەگى جوق ەدى. عالىمداردى بوسقا اۋرەلەپ ۇيات بولادى-اۋ دەپ ويلادىق.
سويتسەك كونفەرەنتسيالار مەن دوڭگەلەك ۇستەلدەردى شەكسىز سۇيەتىن قولى بوس عالىم كوپ ەكەن. وتىزعا جۋىق عالىم كەلىپ، باستىق توردە وتىرىپ مارقايىپ قالدى.
كونفەرەنتسيا تاقىرىبى “تاۋەلسىز قازاقستاننىڭ دامۋ ستراتەگياسىنداعى ابىلاي حان مەن تۇڭعىش پرەزيدەنتتىڭ ءرولى” بولاتىن. شامامەن وسىلاي.
عالىمدار باستىققا، ونىڭ ارتىندا نازارباەۆتىڭ پورترەتىنە قاراپ كوپ سويلەدى. كەيدە ابىلاي حاندى قوسىپ قويادى سوزدەرىنە.
ابىلاي حان مەن نازارباەۆ تۋرالى عىلىمي كونفەرەنتسياعا مەملەكەتتىك تەلەارنالار جاقسى كەلەدى ەكەن.
كەيبىر جۋرناليستەر سارتىلداتىپ ستەنداپ جاسايدى. ءما، مىناۋ ءبىزدى ايتىپ تۇر ما دەپ ءوزىڭ تاڭعالاسىڭ. “عىلىمي-پراكتيكالىق كونفەرەنتسيا!” دەپ تاق-تاق ەتەدى. “ورتالىق ازيا!”، “تمد!” دەپ قويادى.
سودان نە كەرەك، بۇيىعى مەكەمەمىزدىڭ اتى شىعا باستادى. ءبىر-ەكى جىل ىشىندە قاشقانعا دا، قۋعانعا دا قوسىلا شاباتىن ايگىلى بەلسەندى مەكەمەگە اينالدى. نەشە ءتۇرلى ءىس-شارا، كونفەرەنتسيا، فورۋم…
ءسويتىپ ءجۇرىپ ءوزىنىڭ سوناۋ كەزدەرى تىپ-تىنىش جاساپ جۇرگەن جۇمىسىن ۇمىتىپ قالا جازدادى.
مىنا جۇمىسىڭنىڭ ساپاسى نەگە بۇلاي دەپ مينيسترلىك تە سۇرامايتىن. باستىق بارىمەن جاقسى ەدى.
باستىقتىڭ ءوزى دە اقكوڭىل، جاقسى ادام بولاتىن.
پىكىر قالدىرۋ