Aqköñil bastıq
kerey.kz
İlgeride “Qaz bilim jäne ğılım” deytin mekemege ministrlik köz aşqalı äkimdikte istegen şeneunikti bastıq qılıp jiberdi.
Älgi mekeme özine tiesili jwmıstı ğana istep tıp-tınış jatır edi.
Jaña bastıq iske qattı kiristi.
– Narıqqa, örkenietke say bolu kerek!- dedi. Dereu jaña adamdardı jwmısqa aldı.
Bir küni kabinetimizge qılday qara galstuk, qara kästöm-şalbar kigen eñgezerdey jas jigit kirip keldi.
- Pälenşe Tölenşeeviç degen siz be? Qanday tamaq işesiz?
Qolında bes-altı tamaqtıñ tizimi twr.
Söytsek bastıqtıñ “wjımdı tüski aspen qamtamasız etu jönindegi kömekşisi” eken. Öziniñ aytuınşa – menedjer – marketing.
Tüste kabinetterdi aralap tapsırıs qabıldaydı da, tamaqtı aldırıp beredi.
Kez kelgen tamaqtı üş qaytalap işseñ – şığasıñ ğoy. Biz onday astan tez şıqtıq. Eki-üş ay sıqiıp, sendelip jürip älgi jigit te jwmıstan şığıp ketti.
Tüsiniksiz jwmısqa kirip, tüsiniksiz jwmıs istep ketip jatqandar jalğız ol emes edi.
Ştat aşıp, ştat jauıp, şabılıp jürgen de bastıqtıñ özi.
Jaña bastıq bir küni “baspasözben jwmıs isteu kerek, öz-özimizdi tanıtu kerek, ol üşin tanımal ğalımdardı şaqırıp, ğılımi-praktikalıq konferenciya ötkizu kerek” degen tapsırma berdi.
Bizdiñ jwmısqa negizi ondaydıñ dımğa keregi joq edi. Ğalımdardı bosqa äurelep wyat boladı-au dep oyladıq.
Söytsek konferenciyalar men döñgelek üstelderdi şeksiz süyetin qolı bos ğalım köp eken. Otızğa juıq ğalım kelip, bastıq törde otırıp marqayıp qaldı.
Konferenciya taqırıbı “Täuelsiz Qazaqstannıñ damu strategiyasındağı Abılay han men twñğış prezidenttiñ röli” bolatın. Şamamen osılay.
Ğalımdar bastıqqa, onıñ artında Nazarbaevtıñ portretine qarap köp söyledi. Keyde Abılay handı qosıp qoyadı sözderine.
Abılay han men Nazarbaev turalı ğılımi konferenciyağa memlekettik telearnalar jaqsı keledi eken.
Keybir jurnalister sartıldatıp stendap jasaydı. Mä, mınau bizdi aytıp twr ma dep öziñ tañğalasıñ. “Ğılımi-praktikalıq konferenciya!” dep taq-taq etedi. “Ortalıq Aziya!”, “TMD!” dep qoyadı.
Sodan ne kerek, bwyığı mekememizdiñ atı şığa bastadı. Bir-eki jıl işinde qaşqanğa da, quğanğa da qosıla şabatın äygili belsendi mekemege aynaldı. Neşe türli is-şara, konferenciya, forum…
Söytip jürip öziniñ sonau kezderi tıp-tınış jasap jürgen jwmısın wmıtıp qala jazdadı.
Mına jwmısıñnıñ sapası nege bwlay dep ministrlik te swramaytın. Bastıq bärimen jaqsı edi.
Bastıqtıñ özi de aqköñil, jaqsı adam bolatın.
Pikir qaldıru