ماگنۋمدى ءوزىم مۇلدە ۇناتپايدى ەكەنمىن. ۇنەمى بارسام، ەسى دۇرىس كوكونىس تاپپايتىنمىن. ەسكىرگەن، شىرىگەن. ازىق-تۇلىكتى تەك بازاردان الامىن. بىراق ماگنۋمگە بايكوتتى توقتاتپاۋ كەرەك! سونىمەن بىرگە، ءورىستىلدى كينو، فيلمدەرگە دە بايكوت جاريالاۋ كەرەك. بىراق، ودان كۇشتىسى، بالالارىڭدى تەك قازاقشا وقىتىپ، قازاقشا تاربيەلەۋ كەرەك. بىراق، بالاڭدى قازاقشا تاربيەلەيىن دەسەڭ، تاعى ءبىر كەدەرگى شىعىپ جاتىر. عالىمداردىڭ ايتۋىنشا، بالانى 13 جاسقا دەيىن قازاق تىلىندە وقىتىپ، ۇلتتىق قۇندىلىقتاردى بويىنا، ويىنا ءسىڭىرۋ كەرەك. ەندى سولاي ىستەپ جاتساق، 7-8 جاسار قاپ-قازاقشا ءوسىپ كەلە جاتقان بالاڭدى مەكتەپتە ورىس ءتىلىن ۇيرەتىپ ميىن اشىتۋعا تۋرا كەلىپ وتىر. ياعني، 2-سىنىپتان باستاپ ورىس ءتىلى مەكتەپ باعدارلاماسىندا تۇر. بجب، تجب-سىندا ورىس ءتىلى مۇعالىمدەرى بالانىڭ ورىسشا مازمۇنداماسىن (گوۆورەنيە) تەكسەرەدى. تالاپ ەتەدى. سوندا، ءبىز بايعۇس قازاق، ءوز ەلىمىزدە تۇرىپ، بالالارىمىزدىڭ ساۋاتىن قازاقشا اشار-اشپاستان ورىس تىلىنە ۇيرەتۋگە ءماجبۇرمىز. ۇرپاقتى اياۋ كەرەك قوي. قويىرتپاق، ءدۇبارا بولماي قايتەدى؟ ءبىز وزىمىزشە كۇرەسىپ جاتىرمىز. بىراق، وسىنى ايتار ەشكىم تابىلمادى. بايكوت دەسەڭدەر، بايكوتتى وسىعان جاريالاڭدار، وزگە ءتىلدى ۇيرەنگەننىڭ نەسى جامان دەيتىندەر تابىلار، بىراق، ءوز تاجىريبەمدە بۇل دۇرىس ەمەس ەكەنىن ءتۇسىندىم. تۇڭعىش بالام قازاقشاسى سۋداي بولدى، 2-سىنىپتان ورىس ءتىلى قوسىلدى، سودان ونى مەڭگەرۋ كەرەك ەكەنبىز دەپ ونى قوسىمشاعا بەردىك، قىسقاسى ورىس ءتىلىن مەڭگەرتۋگە تىرىستىق. قازىر ۇلكەن قىزىم نە ورىسشا تازا سويلەمەيدى، نە قازاقشا تازا سويلەمەيدى. اڭگىمە ايتىپ جاتسا، قازاقشا ايت، قازاقشا ايت دەپ وتىراتىن بولدىق. ال، ەندى قازىر 2-سىنىپتا وقيتىن قىزىما تەك ەرەجە جاتتاتىپ، گرامماتيكاسىن مەڭگەرتۋگە كۇش سالىپ جاتىرمىن. بىراق،اپايلارى تجبلاردا ورىسشا سويلەۋدى تالاپ ەتىپ جاتىر.

بۇل ەندى بەر جاعى، تۇڭعىش قىزىم 5-سىنىپقا كەلگەن كەزدە ورىس ءتىلى اپايى ورىس ادەبيەتىنىڭ كلاسسيگى تۇرگەنەۆتىڭ “مۋمۋ” دەگەن اڭگىمەسىن وقىسىن دەپ تاپسىرما بەردى. ونى ءوزىم وقىپ تۇسىنە المادىم. تالاپ قاتتى. سوندا، 5-سىنىپتىڭ بالاسى ورىس ءتىلىن ادەبي دەڭگەيدە مەڭگەرۋ كەرەك پە؟ الدە ورىس ءتىلىن اسىرا ۇيرەتكىش مۇعالىمنىڭ تالابى ما بۇل؟

كوتەرسەڭدەر وسى ماسەلەنى كوتەرىڭدەر! ورىس ءتىلى 5-سىنىپتان باستاپ وقىتىلسىن! ۇرپاقتى ءدۇبارا قىلۋعا جول بەرمەيىك!

Shynargul Onashbay