كوز قاراس مادەنيەت رۋحانيات قازاق ءداستۇرى
ءتىل جونىندە تالاي جازىلدى عوي…
kerey.kz
بىراق بۇرىننان ايتىلاتىن ەكى پرينتسيپ سول باياعى وزگەرمەيدى. سەبەبى ونى ۋاقىت جانە وزگە ەلدەردىڭ تاجىريبەسى دالەلدەدى:
1. زاڭ، جارلىق، ەرەجە، شەشىمدەرمەن تىلگە سۇرانىس تۋعىزۋ. ونسىز ءتىل ەشكىمگە كەرەك ەمەس. ءتىل اقشا تابۋعا، ءبىلىم الۋعا، وزگەمەن بايلانىسقا تۇسۋگە قاجەت بولعاندا عانا سۇرانىسقا يە بولادى، سوندا عانا ادامدار ءماجبۇرلى تۇردە ۇيرەنەدى.
شەتەلدە وقىعىڭ كەلە مە، IELTS, TOEFL تاپسىر. ول ءۇشىن اعىلشىن وقى. حالىقارالىق كومپانيادا ىستەپ، كوپ جالاقى العىڭ كەلە مە، الدىڭعى سويلەمدە جازىلعان شارتتاردى ورىندا. سۇرانىس تۋعىزۋ مەحانيزمى وسىلاي جۇمىس ىستەيدى.
2. ءتىل يەسى سانالاتىن ۇلت وكىلدەرىنىڭ پرينتسيپشىلدىك تانىتۋى. ياعني، ءتىلىڭ كەڭ تاراسىن دەسەڭ، ونى كەڭ قولدان. ۇيدە، تۇزدە، باسقا جاقتا.
انگليادا تۇرىكتىڭ كافەسىنە كىرسەڭ، ءوزارا تۇرىكشە سويلەسەتىن. استانادا ءۇي جوندەيمىز دەپ وزبەك، تاجىك قۇرىلىسشىلارىن جالدادىق. ءوزارا تەك انا تىلىندە سويلەسەدى.
قازىر قازاقستاننان تالاي وتباسى اقش-قا كوشىپ جاتىر. كوشىن، بارعان جەرىن جەلىگە سالىپ وتىرادى. ەت اسادى، دومبىرادا ويناۋى مۇمكىن، ناۋرىز تويلايدى – ءبارى قازاقى. بىراق ءوزارا تەك ورىسشا سويلەسەدى. بالا-شاعا اعىلشىن ءتىلىن ۇيرەنەتىنى حاق، ەندى قازاقشاسىن ۇمىتپاسىن، ۇيدە قازاقشا سويلەسەيىك دەيتىن پرينتسيپ جوق. وعان قوسا، انا تىلىنە قاجەتتىلىك تە جوق. سەبەبى سونداعى باسقا قازاقتار دا ورىسشا ارالاسادى.
شەتەلگە شىقساڭىز دا، شەتەلدەن ۇيگە ورالايىن دەپ اۋەجايعا كەلسەڭىز دە، بىرەن-ساران بولماسا، قازاقتىڭ باسىم بولىگى نەگىزىنەن ورىسشا سويلەسەدى.
قالادا زۋمەر بۋىنعا جاتاتىن جاستاردى ءجيى كورەم. فيتنەس، جۇمىس، دۇكەن، ساياباق، باسقا جەردە. قارىم-قاتىناس ءتىلى ورىسشا. كەيدە ورىسشا قينالىپ كەتكەندە عانا امالسىز قازاقشاعا وتەدى. ياعني، ولارعا انا ءتىلى كۇندەلىكتى ومىردە اسا كەرەك بولماي تۇر.
مەن اۋىلدان الماتىعا 2005 جىلى كەلگەندە جاعداي شامامەن وسىنداي ەدى. بىراق 2025 جىلى استاناداعى جاعداي ءدال سونداي بولعانىنا تاڭىم بار…
پىكىر قالدىرۋ