بيىلدىڭ ءتورت ايى بويىنشا قازاقستان «ورتا تابىس تۇزاعىنان» قۇتىلىپ وتىر. ەگەر وسى كورسەتكىشتى جىل اياعىنا دەيىن ۇستاي الساق، وندا مۇناي باعاسى قۇلاعان ۋاقىتتا ىشكى جالپى ءونىمدى 6 پايىزعا وسىرە العان «فەنومەنالدى ەكونوميكا» يەسى اتانامىز.

بىزگە مۇناي كومەكتەسپەسە، ءوسىم نەنىڭ ەسەبىنەن كەلدى؟

2025 جىلعى قاڭتار-ءساۋىر ارالىعىندا قازاقستان ەكونوميكاسىنىڭ ءوسۋى 6% بولدى. ەڭ مىقتى ءيمپۋلستى كولىك جانە تاسىمال سالاسى بەرىپ وتىر. وسى سالا 22,4 پايىزعا وسكەن. ءبىز جاڭا تەمىر جولدارىن پايدالانۋعا بەرۋ ارقىلى تەمىرجولداعى جۇك تاسىمالىن جاقسى ارتتىرعانبىز. ياعني كوبىرەك جۇك تاسي باستادىق. بۇل ەلىمىزدىڭ ترانزيتتىك لوگيستيكالىق بيزنەستى جاقسى جولعا قويعانىن بايقاتادى. ونىمەن قاتار، ترانزيتتىك قۇبىر ارقىلى شيكىزات تاسۋدى دا جاقسى دامىتتىق.

تاسىمالدان كەيىن قاتتى وسكەنى – قۇرىلىس سالاسى. ونداعى ناقتى جۇمىس كولەمىنىڭ يندەكسى 16,2 پايىزعا ارتقان. قۇرىلىس توقتاپ تۇرعان جوق. كوپتەگەن وڭىرلەردە نىساندار بوي كوتەرىپ كەلەدى. قۇرىلىستىڭ مۋلتياسەرى اۋقىمدى ەكەنىن ەسكەرسەك، وسى سالانىڭ دامۋى وتاندىق ماتەريال وندىرىسىنە دە قولداۋ كورسەتۋدە.

ءبىز ءۇشىن شيكىزاتتىق ەكونوميكادان كەتىپ، مۇنايعا دەگەن تاۋەلدىلىكتەن قۇتىلۋدىڭ نەگىزگى مۇمكىندىگىن وڭدەۋ ونەركاسىبى عانا بەرە الادى. وڭدەۋ سالاسىنداعى ءوسىم 7,2% بولدى. ونىڭ ىشىندە تاماق ونىمدەرىن وڭدەۋ 12%-عا، تەمەكى ونىمدەرىن شىعارۋ 26,3%-عا، حيميالىق ونىمدەردى ءوندىرۋ 11,2%-عا جانە ماشينا جاساۋ 11,2%-عا ارتىپ وتىر.

حيميادا جاقسى وسۋىمىزگە الەمدىك الپاۋىت Henkel كومپانياسىنىڭ ءوز كەڭسەسىن رەسەيدەن قازاقستانعا كوشىرۋى كادىمگىدەي ىقپال ەتتى. الپاۋىتتىڭ قوناەۆ قالاسىنداعى حيميا زاۋىتى وندىرىستىك قۋاتىن ارتىرىپ، قازىرگى تاڭدا قازاقستاندا شىعارىلعان ءونىم بۇكىل ورتالىق ازيا مەن كاۆكازدى قامتىپ وتىر.

تەمەكىدە فيليپپ مورريس الماتى وبلىسىنداعى زاۋىتىندا IQOS ستيكتەرىن وندىرە باستادى. ءدال وسى الماتى وبلىسىندا الەمدەگى ءتورتىنشى ءىرى ويىنشى KT&G ءوز زاۋىتىن اشىپ، جۇمىسقا كىرىسىپ كەتتى.

ولجاس بەكتەنوۆتىڭ داۋىرىندە قازاقستان مۇنايعا دەگەن باسى ءبۇتىن تاۋەلدىلىكتەن اقىرىنداپ قۇتىلا باستاعان سياقتى. ءبىز 30 جىل بويى «وسىنى نەگە ىستەمەسكە» دەپ كەلدىك. ەندى مۇناي عاسىرىنىڭ اياقتالۋىنا دەگەن دايىندىعىمىزدى جالعاستىرا بەرۋ قاجەت. جاقىن جىلدارى ءبىزدىڭ ەكونوميكالىق قۇرىلىمدا شيكى مۇناي ۇلەسىن 15 پايىز دەڭگەيىنە دەيىن تۇسىرە الساق، شيكىزاتتىق باعىتتان وڭدەۋشى باعىتقا ترانسفورماتسيانى ءساتتى اياقتادىق دەپ ەسەپتەي الامىز. بىراق ول ءۇشىن ءالى كوپ شارۋا تىندىرۋ قاجەت.

ايبار ولجاەۆ