بۇعان ناقتى جاۋاپ – جوق، بۇل شەشىمنەن ەشبىر ءتىلدىڭ، سونىڭ ىشىندە، ورىس ءتىلىنىڭ دە قۇقى شەكتەلمەيدى. نەگە؟ ويتكەنى كونستيتۋتسياداعى مەملەكەتتىك ءتىل مارتەبەسى بيلىكتىڭ جۇمىس ءتىلىن عانا رەتتەيدى. ول نورمانىڭ قاراپايىم ادامداردىڭ قاتىناس تىلىنە قاتىسى جوق. ياعني، مەملەكەتتىك ءتىل – مەملەكەتتىك ورگاندار مەن جەرگىلىكتى ءوزىن-ءوزى باسقارۋ ۇيىمدارى جۇمىس ىستەيتىن ءتىل دەگەن ءسوز. بۇل شەشىم ورىسشا سويلەيتىندەردىڭ قۇقىعىن شەكتەمەيدى، ورىسشا سويلەۋگە تىيىم سالمايدى.

قاراپايىم ادامدار ۇيىندە، قوعامدىق ورىنداردا، بيزنەستە، مەديا مەن مادەنيەت وشاقتارىندا قالاعان تىلىندە سويلەي دە، جۇمىس ىستەي دە الادى. بۇعان كونستيتۋتسيانىڭ باسقا باپتارى ناقتى كەپىل بولىپ وتىر.

ال جاڭا كونستيتۋتسيادا 9-باپتىڭ 2-تارماعى قازىرگى كۇيىندە قالسا، بۇل – قازاق ءتىلىنىڭ قۇقىعىن شەكتەيدى. سەبەبى مەملەكەتتىك ورگاندار قۇجاتتاردى وزدەرى ۇيرەنگەندەي الدىمەن ورىسشا جازىپ، قاجەت بولسا عانا قازاقشاعا اۋدارىپ جۇرە بەرەدى. ياعني 9-باپتىڭ 2-تارماعى سول كۇيى قالسا، بيۋروكراتيالىق اپپاراتقا ورىسشا قۇجات جاساي بەرۋگە سىلتاۋ بولادى. سەبەبى بيۋروكراتيا ورىسشا جۇمىس جاساپ ۇيرەنگەن، ال ەشكىم ۇيرەنگەن وڭاي جولىنان ءوز ەركىمەن باس تارتپايدى. بىلايشا ايتقاندا، 9-باپتىڭ 2-تارماعى – قۇقىقتىق تۇرعىدا قازاق ءتىلىن شەكتەپ تۇرعان نورما.

ەڭ دۇرىسى: مەملەكەتتىك ورگاندار جۇمىس ىستەيتىن مەملەكەتتىك تە، رەسمي دە ءتىل – قازاق ءتىلى ەكەنىن ناقتى بەكىتۋ. ال ورىس ءتىلى قاجەت بولعان جاعدايدا ازاماتتارمەن قاتىناس ءتىلى بولادى دەپ جازىپ قويۋ.

بۇل نورما ادام قۇقىقتارىن تولىق ساقتايدى، ال مەملەكەتتىك ءتىلدىڭ مارتەبەسىن ناقتى بەكىتىپ قويادى.