رۋحانيات

اللاعا دەگەن سەنىمىنە سەلكەۋ تۇسىرمەگەن باتىرحان شۇكەنوۆ

kerey.kz

 |  Apr 30, 2015

ەردىڭ جاسى – 52-دە جۇرەگى سىر بەرىپ، دۇنيەدەن وزعان، ەلدىڭ سۇيىكتىسىنە اينالعان “ا’ستۋديو” توبىنىڭ دارىندى ءانشىسى باتىرحان شۇكەنوۆ ءومىرىنىڭ سوڭعى كەزىندە بەس ۋاقىت ناماز وقىماققا نيەتتەنگەنىن بىرەۋ بىلسە، بىرەۋ بىلمەس. ورنى ويسىراپ قالعان، قازاق ونەرىنىڭ قۇيرىقتى جۇلدىزىنداي اعىپ وتە شىققان، قازاسىمەن قالىڭ ەلدىڭ قابىرعاسىن قايىستىرىپ كەتكەن باتىرحان شۇكەنوۆتىڭ ناماز وقيتىنىن مارقۇمنىڭ كوزى تىرىسىندە قازاقستاننىڭ ساز پورتالىنا بەرگەن سۇحباتىنان بىلدىك. «ەگەر ءبىز ءدىن جايىندا ايتساق، يمان كەلتىرسەك – بۇل ويلانىپ بارىپ جاسالعان قادام دەر ەدىم. سوڭعى ەكى-ءۇش جىلدىڭ كولەمىندە مەنىڭ توڭىرەگىمدەگى ادامدار بۇرىننان تۋرا جولعا تۇسكەن ادامدار بولدى. ولارمەن ديدارلاسىپ، تىلدەسۋدىڭ ءوزى ءبىر عانيبەت، كوكىرەك كوزىمدى اشتى. ءوزىم دە يسلام ءدىنىن ۇلكەن قىزىعۋشىلىقپەن زەردەلەي باستادىم. بۇل تاقىرىپتا ماعلۇمات الۋ مۇمكىندىگى پايدا بولدى – كەڭەستىك كەزەڭدە بۇل مۇمكىن ەمەس ەدى»،- دەگەن ەدى مارقۇم اعىنان اقتارىلىپ. ول بىرتە-بىرتە نامازعا جىعىلاتىنىن ايتىپ جۇرگەن ەكەن. «ناماز وقۋدى باستاۋ، ءدىني پارىزداردى ناقتى ورىنداۋ – شەشۋشى قادام. ءالى شەشىم قابىلداماسام دا، جاقىن ارادا دەن قوياتىنىما ءۇمىت ارتامىن. قانشا دەگەنمەن مەنىڭ ءومىرىم وسىعان كەلىپ تىرەلدى. مەن مۇسىلمان وتباسىندا ومىرگە كەلدىم. ماعان يسلام جات ەمەس. بۇل انا سۇتىمەن سىڭگەن، تۋعاننان بار سەنىم»،- دەگەن ەدى ول ءسوزىن ساباقتاپ.

Islam.kz پورتالىنىڭ ۇجىمى باتىرحان شۇكەنوۆتىڭ قازاسىنا قايعىرىپ، تۋعان-تۋىستارىنا، ەلىمىزدىڭ ازاماتتارىنا كوڭىل ايتادى. الدى – جارىق، ارتى – كەنىش بولعاي مارقۇمنىڭ. پەيىشتە نۇرى شالقىسىن.

islam.kz