ءبىلىم جانە عىلىم ءمينيسترى ا.ءسارىنجىپوۆ مىرزانىڭ نازارىنا!
جۋىردا «Abai.kz» اقپاراتتىق پورتالى باستاعان سايتتار مەن «قازاقستان زامان» گازەتىندە «مۇعالىمدەردىڭ مۇشكىل ءحالى. ولاردى بيلىكتىڭ قولبالاسى بولۋدان قالاي قۇتقارامىز؟» اتتى ماقالا جارىق كوردى (http://abai.kz/post/view?id=3435) .
ماقالادا مۇعالىمدەردىڭ قىزمەتكە ورنالاسۋى ءۇشىن پارا بەرۋىنەن باستاپ، اكىمشىلىك قۇرىلىم قىزمەتكەرلەرىنە ءتيىستى جۇمىستاردىڭ بارلىعى دەرلىك مۇعالىمدەرگە ارتىلعانى، ەلىمىزدە سايلاۋ ناۋقانى بولا قالسا، ۇگىت-ناسيحات جۇىستارىنا، ءۇي-ءۇيدى ارالاپ، مەكەن-جاي بويىنشا ادام تۇگەندەۋدە، مەكتەپكە بالا سانىن انىقتاۋعا، اسكەرگە شاقىرتۋعا، جىلقى-سيىر، قوي-ەشكى، تاۋىق-قازدى، ءتىپتى، قانشا ءتۇپ قيار-پوميدور ەگىلگەنىن ساناۋعا، مىلتىعىڭ بار ما، قانشا ءۇيىڭ، كولىگىڭنىڭ ماركاسى مەن ءنومىرى قانداي ەكەنىن تۇگەندەۋگە جاپپاي مۇعالىمدەر جەگىلەتىنى، ماعىناسىز، ءمانسىز، قالتانىڭ قامى عانا كوزدەلەتىن قاپتاعان انشىلەردىڭ كونتسەرتتەرىنە بيلەتىن وتكىزۋ مۇعالىمدەرگە جۇكتەلەتىنى، قارسى بولسا باسشىلىقتىڭ تاعى دا «جۇمىستان كەت» دەپ قورقىتاتىنى كوتەرىلگەن ەدى.
سونىمەن قاتار، الماتى وبلىسى، قاراساي اۋدانىنداعى جاڭاتۇرمىس ورتا مەكتەبىنىڭ ديرەكتورى – لەيلا كيگيزباەۆانىڭ ءوز قاراماعىنداعى مۇعالىمدەردى ءساۋىردىڭ 4-نەن 13-نە دەيىن ون كۇن بويى سەنبىلىككە شىعارعانى، وعان نارازىلىق بىلدىرگەن ايمان ساعيدۋللاەۆاعا (سۋرەتتە) باسشىلىق تاراپىنان كىنا ارتىلعانى جازىلعان بولاتىن.
العاش رەت مۇعالىم تاراپىنان اششى شىندىقتىڭ باياندالعانى كوپشىلىكتى تاڭقالدىرىپ، كۇردەلىلىگى مەن ماڭىزدىلىعىىنا بايلانىستى ماقالا كوپ وقىلىپ، جان-جاقتى تالقىلاۋعا ءتۇستى. سايتتارداعى كەيبىر پىكىرلەرگە توقتالىپ وتسەك:
«باكەن جم، 24/04/2015
ايمان قارىنداسىم، راحمەت اينالايىن! امان بول، ساۋلىعىڭدى تىلەيمىز! جازىپ وتىرعاندارىڭنىڭ ءبارى دە راس! ەندى ەستىر قۇلاق، سەزەر جۇرەك بولسا، باس جاقتاعىلاردان…
نۇرجان سب، 25/04/2015
ناعىز ۇستاز، ايمان! كوتەرگەن ماسەلەڭ ورىندى، قاجەتتى. وزىڭدەي تالاي ۇستازدار قاۋىمىنىڭ وكىلى «ايتار ءسوزىن، ەستىر قۇلاققا» نەبىر تۇسىنىكتى-تۇسىنىكسىز سەبەپتەرمەن جەتكىزە الماۋدا. العاشقى قادامىڭ قۇتتى بولسىن! جەڭىس، الدا!
ۇيات-اي! سب، 25/04/2015
ديپلومدى قولعا الىپ، 2012-2013 ەكى جىل مۇعالىم بولدىم… قايىرشى بولىپ كەتۋگە از قالدىم، «قوي» دەدىم دە ساتۋشى بولىپ كەتتىم، قازىر ءبارى جاقسى – اقشا بار، باسىمدى دا اۋىرتپايمىن…
جاقسى جم، 24/04/2015
كەشكە دەيىن وتىرىك ءوزىمىزدى الداماي وسىلاي اششى بولسا دا شىندىقتى جازىپ تۇرعانىمىز دۇرىس. سىن ايتىلماي، ءمىن تۇزەلمەيدى
جاڭا وقىرمان جم، 24/04/2015
…وسىلاي، بىرەۋلەر شىعىپ، كوپتىڭ كوكەيىندەگى اششى شىندىقتى سىرتقا باتىل شىعارىپ، جاريالاماسا، جۇرە بەرەمىز عوي سۇمەتىلىپ. قايتەمىز ەندى، بالا-شاعانى اسىراۋ كەرەك، قىزمەتتەن ايىرىلىپ قالماۋ كەرەك سول ءۇشىن… قورقۋىن قورقامىز… بۇل دا شىندىق.
نازىم دن، 27/04/2015
ايماندى جۇمىستان شىعارۋ ماسەلەسى دە كوتەرىلىپ جاتقان شىعار. ەگەر ونداي امالدار جاسالاتىن بولسا، دەرەۋ اقپارات قۇرالدارىنا حابار بەرىڭىز، ايمان! ويتكەنى شىندىق ايتقان ادامنان تەزىرەك قۇتىلعىسى كەلەدى عوي قاي جەردە دە. ءسىزدىڭ ماسەلەڭىز جەكە باستىڭ ەمەس، مىڭداعان مۇعالىمدەردىڭ جانايقايى. حالقىمىزدىڭ سانالى ازاماتتارىنىڭ بارلىعى ءسىزدىڭ جاعىڭىزدا بولاتىنىنا سەنىمدى بولىڭىز! ءسىزدىڭ بۇل باتىل ارەكەتىڭىز كوپكە ۇلگى بولدى.
رەكە دۇيسەنبى، 27/04/2015
ايتىلعانداردىڭ ءبارى شىندىق، بۇل «ىندەت» بارلىق جەردە بار ەكەن، تەك ءبىزدىڭ مەكتەپ پە دەسەم…»
وسىلايشا ءوز پىكىرىن ءبىلدىرۋشى جاندار بۇل جايتتاردىڭ بارلىعى شىندىق ەكەنىنە قوسىلۋدا.
ءبىز كەيىپكەرىمىز – ايمان ساعيدۋللاەۆانىڭ جۇمىسىنداعى جاعدايدان حاباردار بولىپ وتىردىق. پرەزيدەنت سايلاۋى وتكەنگە دەيىن، ياعني 26 ساۋىرگە دەيىن باسشىلىقتان ەشكىم ونىڭ مازاسىن العان جوق ەدى.
بىراق، 2 مامىر كۇنى، وسىلاي بولارىنا سەزىك بىلدىرگەن وقىرمانداردىڭ ويى دا راسقا اينالىپ، ايمان ساعيدۋللاەۆانى مەكتەپ ديرەكتورى لەيلا كيگيزباەۆا مەن ونىڭ ورىنباسارلارى شاقىرىپ الىپ، «سەنىڭ جۇمىسىڭدا كەمشىلىكتەر كوپ، كەزەكتى ەڭبەك دەمالىسىنا ءوتىنىشىڭدى جاز. كەلىسىمشارتقا ءبىر جىلعا عانا وتىرعانبىز، مەرزىمى ءبىتتى، كەلەسى وقۋ جىلىنا دەيىن ۋاقىتىڭ بار، باسقا جەردەن جۇمىس ىزدەي بەر» دەگەندى ايتقان.
ايمان مۇعالىمنىڭ شىندىقتى ايتىپ، ءوزىنىڭ، قالا بەردى بارلىق ۇستازدار قاۋىمىنىڭ قۇقىعى تاپتالماۋىنا قارسى باس كوتەرگەن ارەكەتى مەكتەپ ىشىندە وسىمەن ءۇشىنشى رەت جينالىستا ءسوز بولعانعا ۇقسايدى. دەگەنمەن، ول مەكتەپ باسشىلىعىنىڭ اۋىر سوزدەرىنە دە، وزگەلەردىڭ وزىنەن بولەكتەنگەنىنە دە شىداپ، بويىنا بىتكەن قايسار مىنەزىمەن «كاسىبي ءبىلىمىم مەن بىلىكتىلىگىم جەتىلگەن، ال قىزمەت وتىلىمنەن قاتەلىك تابا المايسىزدار. مەنى جۇمىستان كەتىرۋگە نەگىز جوق» دەپ قارسى تۇرىپ باعۋدا. قالاي بولعاندا دا مۇنىڭ ءبارى جۇيكەگە تيەتىنى راس. ساعاتتاپ سوزىلعان جينالىستا ءوز اتىنا ايتىلعان نەبىر اۋىر سوزدەردى تىڭداۋدان بۇرىنعى جۇرەك دەرتى قايتا اسقىنىپ، قان قىسىمىنان اۋىرىپ قالعان.
ەگەر اۋداندىق اكىمدىك، ءبىلىم باسقارماسىنداعىلار، مەكتەپ باسشىلىعى ايمان ساعيدۋللاەۆانى قىزمەتىنەن كەتىرۋگە تاعى دا امال-ايلا جاسايتىن بولسا، وندا بۇل ءىستى ادام قۇقىن قورعايتىن قوعامدىق ۇيىمدارمەن بىرلەسە وتىرىپ، ۇلكەن دەڭگەيدە كوتەرەتىنىمىزدى ەسكەرتكىمىز كەلەدى. قازىردىڭ وزىندە العاشقى ماقالا قوعامعا قوزعاۋ سالىپ، ۇستازدارعا ءۇمىت سىيلاپ، ءبىلىم باسقارماسىنداعىلاردىڭ ورتاسىندا دۇربەلەڭ تۋدىردى.
بۇل جايت – تىعىرىققا تىرەلگەن، قوعامنىڭ نازارىن اۋدارعان ماسەلەنى شەشۋدىڭ باستى امالى مۇعالىمدەر قۇقىعىن قورعايتىن ارنايى زاڭنىڭ قابىلدانۋىن تالاپ ەتىپ وتىر. زاڭدا مۇعالىمدەر جالاقىسىنىڭ ءوسۋى، باسپانالى بولۋى سياقتى الەۋمەتتىك جاعدايلارىمەن قوسا، قىزمەتتىك مىندەتتەمەلەرى دە انىق كورسەتىلۋى كەرەك. ايتپەسە، باياعى جارتاس سول جارتاس كۇيىندە قالا بەرمەك.
جاننا يمانقۇل،
Abai.kz
پىكىر قالدىرۋ