BİLİM JÄNE ĞILIM MINISTRİ A.SÄRİNJİPOV MIRZANIÑ NAZARINA!

 Juırda «Abai.kz» aqparattıq portalı bastağan sayttar men «Qazaqstan Zaman» gazetinde «Mwğalimderdiñ  müşkil hali. Olardı biliktiñ qolbalası boludan qalay qwtqaramız?» attı maqala jarıq kördi (http://abai.kz/post/view?id=3435) .

Maqalada mwğalimderdiñ qızmetke ornalasuı üşin para beruinen bastap, äkimşilik qwrılım qızmetkerlerine tiisti jwmıstardıñ barlığı derlik mwğalimderge artılğanı, elimizde saylau nauqanı bola qalsa, ügit-nasihat jwıstarına, üy-üydi aralap, meken-jay boyınşa adam tügendeude, mektepke bala sanın anıqtauğa, äskerge  şaqırtuğa, jılqı-siır, qoy-eşki, tauıq-qazdı, tipti, qanşa tüp qiyar-pomidor egilgenin sanauğa, mıltığıñ bar ma, qanşa üyiñ, köligiñniñ markası men nömiri qanday ekenin tügendeuge jappay mwğalimder jegiletini, mağınasız, mänsiz, qaltanıñ qamı ğana közdeletin qaptağan änşilerdiñ koncertterine biletin ötkizu mwğalimderge jükteletini, qarsı bolsa basşılıqtıñ tağı da «jwmıstan ket» dep qorqıtatını köterilgen edi.

Sonımen qatar, Almatı oblısı,  Qarasay audanındağı Jañatwrmıs orta mektebiniñ direktorı – Leyla Kigizbaevanıñ öz qaramağındağı mwğalimderdi säuirdiñ 4-nen 13-ne deyin on kün boyı senbilikke şığarğanı, oğan narazılıq bildirgen Ayman Sağidullaevağa (SURETTE) basşılıq tarapınan kinä artılğanı jazılğan bolatın.

Alğaş ret mwğalim tarapınan aşı şındıqtıñ bayandalğanı köpşilikti tañqaldırıp, kürdeliligi men mañızdılığıına baylanıstı maqala köp oqılıp, jan-jaqtı talqılauğa tüsti. Sayttardağı keybir pikirlerge toqtalıp ötsek:

«Bäken jm, 24/04/2015

Ayman qarındasım, rahmet aynalayın! Aman bol, saulığıñdı tileymiz! Jazıp otırğandarıñnıñ bäri de ras! Endi estir qwlaq, sezer jürek bolsa, bas jaqtağılardan…

Nwrjan sb, 25/04/2015

Nağız wstaz, Ayman! Kötergen mäseleñ orındı, qajetti. Öziñdey talay wstazdar qauımınıñ ökili «aytar sözin, estir qwlaqqa» nebir tüsinikti-tüsiniksiz sebeptermen jetkize almauda. Alğaşqı qadamıñ qwttı bolsın! Jeñis, alda!

Wyat-ay! Sb, 25/04/2015

Diplomdı qolğa alıp, 2012-2013 eki jıl mwğalim boldım… Qayırşı bolıp ketuge az qaldım, «qoy» dedim de satuşı bolıp kettim, qazir bäri jaqsı – aqşa bar, basımdı da auırtpaymın…

Jaqsı  jm, 24/04/2015

Keşke deyin ötirik özimizdi aldamay osılay aşı bolsa da şındıqtı jazıp twrğanımız dwrıs. Sın aytılmay, min tüzelmeydi

 Jaña oqırman jm, 24/04/2015

…Osılay, bireuler şığıp, köptiñ kökeyindegi aşı şındıqtı sırtqa batıl şığarıp, jariyalamasa, jüre beremiz ğoy sümetilip. Qaytemiz endi, bala-şağanı asırau kerek, qızmetten ayırılıp qalmau kerek sol üşin… Qorquın qorqamız… Bwl da şındıq.

Nazım dn, 27/04/2015

Aymandı jwmıstan şığaru mäselesi de köterilip jatqan şığar. Eger onday amaldar jasalatın bolsa, dereu aqparat qwraldarına habar beriñiz, Ayman! Öytkeni şındıq aytqan adamnan tezirek qwtılğısı keledi ğoy qay jerde de. Sizdiñ mäseleñiz jeke bastıñ emes, mıñdağan mwğalimderdiñ janayqayı. Halqımızdıñ sanalı azamattarınıñ barlığı sizdiñ jağıñızda bolatınına senimdi bolıñız! Sizdiñ bwl batıl äreketiñiz köpke ülgi boldı.

Reke düysenbi, 27/04/2015

Aytılğandardıñ bäri şındıq, bwl «indet» barlıq jerde bar eken, tek bizdiñ mektep pe desem…»

Osılayşa öz pikirin bildiruşi jandar bwl jayttardıñ barlığı şındıq ekenine qosıluda.

Biz keyipkerimiz – Ayman Sağidullaevanıñ jwmısındağı jağdaydan habardar bolıp otırdıq. Prezident saylauı ötkenge deyin, yağni 26 säuirge deyin basşılıqtan eşkim onıñ mazasın alğan joq edi.

Biraq, 2 mamır küni, osılay bolarına sezik bildirgen oqırmandardıñ oyı da rasqa aynalıp, Ayman Sağidullaevanı mektep direktorı Leyla Kigizbaeva men onıñ orınbasarları şaqırıp alıp, «Seniñ jwmısıñda kemşilikter köp, kezekti eñbek demalısına ötinişiñdi jaz. Kelisimşartqa bir jılğa ğana otırğanbız, merzimi bitti, kelesi oqu jılına deyin uaqıtıñ bar, basqa jerden jwmıs izdey ber» degendi aytqan.

Ayman mwğalimniñ şındıqtı aytıp, öziniñ, qala berdi barlıq wstazdar qauımınıñ qwqığı taptalmauına qarsı bas kötergen äreketi mektep işinde osımen üşinşi ret jinalısta söz bolğanğa wqsaydı. Degenmen, ol mektep basşılığınıñ auır sözderine de, özgelerdiñ özinen bölektengenine de şıdap, boyına bitken qaysar minezimen «käsibi bilimim men biliktiligim jetilgen, al qızmet ötilimnen qatelik taba almaysızdar. Meni jwmıstan ketiruge negiz joq» dep qarsı twrıp bağuda. Qalay bolğanda da mwnıñ bäri jüykege tietini ras. Sağattap sozılğan jinalısta öz atına aytılğan nebir auır sözderdi tıñdaudan bwrınğı jürek derti qayta asqınıp, qan qısımınan auırıp qalğan.

Eger audandıq äkimdik, bilim basqarmasındağılar, mektep basşılığı Ayman Sağidullaevanı qızmetinen ketiruge tağı da amal-ayla jasaytın bolsa, onda bwl isti adam qwqın qorğaytın qoğamdıq wyımdarmen birlese otırıp, ülken deñgeyde köteretinimizdi eskertkimiz keledi. Qazirdiñ özinde alğaşqı maqala qoğamğa qozğau salıp, wstazdarğa ümit sıylap, bilim basqarmasındağılardıñ ortasında dürbeleñ tudırdı.

Bwl jayt – tığırıqqa tirelgen, qoğamnıñ nazarın audarğan mäseleni şeşudiñ bastı amalı mwğalimder qwqığın qorğaytın arnayı zañnıñ qabıldanuın talap etip otır. Zañda mwğalimder jalaqısınıñ ösui, baspanalı boluı siyaqtı äleumettik jağdaylarımen qosa, qızmettik mindettemeleri de anıq körsetilui kerek. Äytpese,  bayağı jartas sol jartas küyinde qala bermek.

Janna IMANQWL,

Abai.kz