Paris kazak spor فۋتبول كومانداسى ماۋسىمنىڭ 9-ى كۇنى استاناعا كەلىپ، “جاس باتىر” سپورت كەشەنىندە ەكى ويىن وتكىزدى. استانا فۋتبول كلۋبىنىڭ 1997 جىلى تۋعان جاستار قۇراماسىمەن جانە استاناداعى جۋرناليستەر كومانداسىمەن جولداستىق كەزدەسۋ وتكىزگەن ولار ەكى ويىندى دا تەڭ اياقتادى. پاريجدەن قازاقستانعا 17 مەن 20 جاس ارالىعىنداعى 15 فۋتبولشى، بەس ۇلكەن كىسى كەلگەن. ولاردىڭ بىرەۋىنەن باسقاسى – پاريجدە تۇراتىن ەتنيكالىق قازاقتار.

“فۋتبول – قۇدالىققا دا سەپ”

ازاتتىقتىڭ تىلشىسىمەن فرانتسۋز تىلىندە سويلەسكەن Paris kazak spor ويىنشىسى ەدۋارد كاتريان (ەتنيكالىق قازاق – رەد.) جەرگىلىكتى كوماندانىڭ دوپ ويناۋ شەبەرلىگىن “جوعارى” دەپ باعالادى جانە وزدەرىنىڭ ۇشاقتان شارشاپ كەلگەندەرىن ءتۇسىندىردى. فرانتسيا قازاقتارى ەندى ماۋسىمنىڭ 11-ءى كۇنى قاراعاندىداعى “شاحتەر” فۋتبول كلۋبىنىڭ جاستارىمەن، ودان كەيىن شىمكەنت جانە الماتىعا بارىپ جەرگىلىكتى فۋتبول كلۋبتارىنىڭ جاستار قۇراماسىمەن جولداستىق كەزدەسۋلەر وتكىزبەك.

پاريجدەگى قازاق جاستارىن قازاقستانعا اكەلگەن كاسىپكەر ەرلان ءاشىم:

– مۇستافا شوقايعا بىلتىر ءمۇسىن قويىلعاندا فرانتسياعا بارعان ەدىم. سول جەردە جەرگىلىكتى قازاقتارمەن تانىسىپ، اڭگىمەلەرىن تىڭداسام، وزدەرىنىڭ ۇل-قىزدارىن فۋتبول ارقىلى ءبىر-بىرىمەن تانىستىرىپ، ارالاستىرىپ وتىرعاندارىن ايتتى. سودان، نەگە سول جاستارعا قازاقستاندى فۋتبول ارقىلى كورسەتپەسكە دەگەن وي كەلدى. 15 ويىنشى، بەس ۇلكەن كىسىنى الىپ كەلدىم، – دەيدى.

ويىنشىلارمەن بىرگە كەلگەن فرانتسيا تۇرعىنى زەينەل سويەر ازاتتىقتىڭ تىلشىسىمەن قازاقشا سويلەستى. ول بۇعان دەيىن قازاقستاندا ەكى رەت بولعان. ونىڭ ايتۋىنشا، قازىر پاريجدە تۇركيادان شىققان 270 قازاق وتباسى، ءۇش مىڭعا جۋىق ەتنيكالىق قازاق تۇرادى. پاريجدە تۋىپ وسكەن جاس ۇرپاققا قازاق ءتىلىن ۇيرەتۋ قيىنداعان. “ۇلتتىق بايلانىستى” ءۇزىپ الماس ءۇشىن ەۋروپا قازاقتارىنىڭ ءداستۇرلى قۇرىلتايىنا جاستارىن قالدىرماي الىپ بارىپ، ءبىر-بىرىمەن تانىستىرادى ەكەن. ول “پاريجدەگى ۇلكەن كىسىلەردىڭ كەيىنگى ۇرپاقتى ءوزارا ۇيلەندىرىپ، قازاقتىقتى ساقتاۋعا تىرىساتىنىن” دا ايتىپ قالدى.

– قۇرىلتاي مەن توي-دۋماننان وزگە، جاستاردىڭ باسى وسى فۋتبولدا جاقسى بىرىگەدى. پاريج قازاقتارىنىڭ وزدەرى قۇرعان Paris kazak spor كومانداسى بار. ونىڭ سىرتىندا ءوزىمىز وينايتىن ءۇش كوماندا، 70-تەي ويىنشىمىز جانە بار. ءبارى – جاستار. فۋتبول ارقىلى باسىمىز بىرىگەدى، بايلانىس ورنايدى. سىيلاستىعىمىز ارتادى. قازاقستانعا الىپ كەلگەن دە وسى فۋتبول، – دەيدى زەينەل سويەر.

ء“تىل ۇيرەتۋ قيىن”

ازاتتىقتىڭ تىلشىسىنە ءوزىن ماكي دەپ تانىستارعان، تۇرىكشە-قازاقشا ارالاستىرىپ سويلەگەن جىگىت اعاسى تۇركيانىڭ ستامبۋل قالاسىندا تۋعانىن، 1980-جىلدارى پاريجگە كوشكەنىن ايتادى. تەرى وڭدەۋ ءىسىنىڭ مامانى. ءۇش بالاسى بار. ول وزىمەن بىرگە قازاقستانعا فۋتبول ويناۋعا كەلگەن جاستاردىڭ ء“تىل بىلمەگەندەرى ءۇشىن ۇيالىپ جۇرگەنىن” ايتتى.

– فرانتسيادا جاستارعا ءتىل ۇيرەتۋ قيىن. قولدانىس اياسى جوق. ءتىل، دومبىرا ۇيرەتەتىن مامانعا ءزارۋمىز. ەستىگەندەر بولسا، ۇيرەتەمىز دەگەندەرگە ەسىگىمىز اشىق. ۇيرەتەتىن جەرىمىز [ساباق وتەتىن ورىن] بار. مىنا جاستار ءتىل بىلمەگەندەرى ءۇشىن ۇيالىپ ءجۇر. ءتىل بىلسە، بارىس-كەلىستەرى، تانىستىقتارى كوبەيەر ەدى، – دەيدى ماكي.

پاريجدە تۋىپ وسكەن ستۋدەنت ەدۋارد كاتريان “ۇيىندە اكە-شەشەسىمەن فرانتسۋزشا سويلەسەتىنىن” ايتادى. فرانتسيادا وقىپ جۇرگەن قازاقستاندىق ستۋدەنتتەرمەن ءالى تانىسىپ، ارالاسپاعان.

– قازاق دوستارىم كوپ. بىراق ولاردىڭ ءبارى پاريجدە نە ەۋروپادا تۋعان، ۇنەمى فرانتسۋزشا، ازداپ تۇرىكشە سويلەيدى. قازاقستانعا ءبىرىنشى رەت كەلىپ تۇرمىن. مۇمكىن جاڭا دوستارمەن تانىسارمىن. سولاردان ءتىل ۇيرەنەرمىن، – دەيدى ەدۋارد كاتريان.

پاريج  جاستارىمەن الاڭدا بىرگە فۋتبول ويناعان سپورت ءجۋرناليسى تولەۋبەك قادىرموللا مۇنداي جولداستىق كەزدەسۋدىڭ پايداسى كوپ دەپ سانايدى.

– Paris kazak spor كومانداسى فرانتسيانىڭ 7-ليگاسىندا وينايدى. سوعان قاراماستان، شەبەرلىكتەرى ەرەكشە ەكەن. جاس جىگىتتەرى كوپ. قانشا دەگەنمەن فرانتسيا فۋتبولىنىڭ دەڭگەيى جوعارى عوي، سول جاقتا تاربيەلەنگەن وسىنداي قازاق جاستارىن ەلدەگى كلۋبتارعا شاقىرتۋعا بولار ما ەدى، – دەيدى ول.

Paris kazak spor كومانداسى 1986 جىلى قۇرىلعان. بيىل فرانتسيانىڭ 7-فۋتبول ليگاسىندا 3-ورىن العان. بۇدان بولەك، پاريج چەمپيوناتىندا، ءپاريجدىڭ ايماقتىق چەمپيوناتىندا 1-ورىن العان كەزدەرى دە بولعان. كوماندادا 44 ويىنشى بولسا، ونىڭ 30-ى – ەتنيكالىق قازاق.