الماتى قالالىق اكىمدىگىنىڭ مالىمەتى بويىنشا، 23 شىلدە تاڭ الدىندا ناۋرىزباي اۋدانى اۋماعىندا سەل جۇرگەن.

“تۇنگى ساعات ۇشتە قارعالى وزەنىندە سۋ دەڭگەيى كوتەرىلگەنى تۋرالى حابار ءتۇستى. تاسقىننان الماتىنىڭ ىرگەسىندەگى كامەنكا مەن قاراعايلى اۋىلدارىنىڭ، ناۋرىزباي اۋدانىندا ءبىراز ۇيلەردى سۋ العان” دەپ مالىمدەدى الماتى توتەنشە جاعدايلار دەپارتامەنتى باستىعىنىڭ ورىنباسارى ەرلان نۇرپەيىسوۆ.

رەسمي مالىمەت بويىنشا، قارعالى وزەنى بويىندا ورنالاسقان ايماقتاردان 200-دەن اسا ادام ەۆاكۋاتسيالانىپ، 176-مەكتەپ جانە ناۋرىزباي اۋداندىق اكىمدىگىنە ورنالاستىرىلعان.

الماتىنىڭ شەتىندەگى ىرگەلى مەن العاباس اۋىلدارى جانە تاعى بىرقاتار ەلدىمەكەندەردە سەل تۋرالى سۋىت حاباردان دۇرلىككەن تۇرعىندار ۇيلەرىن تاستاپ، سىرتقا قاشقان.

ازاتتىق ءتىلشىسى الماتى-تاراز اۆتوكولىك جولىنداعى “التىن وردا” بازارى ماڭىندا جۇزدەگەن كولىك كەپتەلىستە تۇرعانىن كوردى.

قالالىق توتەنشە جاعدايلار دەپارتامەنتى سەلدەن مەرت بولعان ادامدار جوق دەپ حابارلادى.

دەپارتامەنت وكىلى ەرلان نۇرپەيىسوۆ الەۋمەتتىك جەلىدە تاراعان “سۋ تاسقىنى قايتالانۋى مۇمكىن” دەگەن اقپاراتتى جوققا شىعاردى.

“تەك سۋ دەڭگەيى كوتەرىلگەن، بوگەنگە زاقىم كەلمەگەن. ەكىنشى رەت سەل ءجۇرۋ قاۋپى جوق، جاعدايدى باقىلاپ وتىرمىز” دەگەن .

تجد  وقيعا ورنىندا 400-دەن اسا قۇتقارۋشى مەن 85 تەحنيكا جۇمىس ىستەپ جاتقانىن حابارلادى.

قازاقستان ىشكى ىستەر مينيسترلىگىنىڭ بەيسەنبى كۇنى جاريالاعان مالىمەتى بويىنشا، الماتىداعى قارعالى وزەنى بويىنداعى قاۋىپتى ايماقتان 900-گە جۋىق ادام ەۆاكۋاتسيالانعان.

سەلدەن ءۇش اۋدان زارداپ شەككەن

الماتىنىڭ ناۋرىزباي اۋدانى اكىمى قۋانىش قاشقىمباەۆ بەيسەنبى كۇنى بريفينگتە سەلدەن زارداپ شەككەن تۇرعىندار ماتەريالدىق جاردەم سۇراپ جەرگىلىكتى ءتيىستى ورىندارعا ءوتىنىش بەرە الاتىنى تۋرالى مالىمدەدى.

«ءاربىر زارداپ شەككەن ادام زاڭعا سايكەس 100 ايلىق ەسەپتىك كورسەتكىش كولەمىندە ماتەريالدىق كومەك سۇراپ الەۋمەتتىك جاردەم ورىندارىنا ءوتىنىش بەرە الادى. باسقا ماتەريالدىق شىعىندار سۋ تاراعان سوڭ ەسەپتەلەدى. ەگەر مۇلىكتەر ساقتاندىرىلعان بولسا، وعان تولەم ماسەلەسىن ساقتاندىرۋ كومپانيالارى شەشەدى. ناۋرىزباي اۋدانىن ۇلتتىق گۆارديا تولىق كۇزەتكە الدى. ۇرلىق-قارلىققا جول بەرىلمەيدى» دەگەن اكىم.

سەل جۇرگەن قاراعايلى ەلدى مەكەنى. الماتى، 23 شىلدە 2015 جىل.

جەرگىلىكتى بيلىك وكىلدەرىنىڭ ايتۋىنشا، سالدارىنان الماتىداعى ناۋرىزباي، اۋەزوۆ جانە الاتاۋ اۋدانىندا ورنالاسقان بىرقاتار تۇرعىن ۇيلەردى سۋ باسقان. اسىرەسە ناۋرىزباي اۋدانى كوبىرەك زارداپ شەككەن.

2014 جىلى قىركۇيەكتە الماتىنىڭ قۇرامىندا جاڭادان سەگىزىنشى اۋدان بولىپ قۇرىلعان، قالانىڭ باتىس بولىگىن قامتيتىن بۇل اۋدان اۋماعىنداعى تۇرعىن-جايدىڭ دەنى – جەر ۇيلەر.

«قارعالى وزەنىندە سۋ دەڭگەيى تۇسكەن سوڭ تاسقىننان قاتتى زارداپ شەككەن ناۋرىزباي اۋدانىنداعى تۇرعىن ۇيلەردى ارالاپ، كەلگەن شىعىن كولەمى ەسەپتەلەدى» دەدى الماتى قالاسى اكىمىنىڭ ورىنباسارى يۋري يلين شىلدەنىڭ 23-ءى كۇنگى بريفينگتە.

ونىڭ سوزىنشە، الماتىدا سەلگە قارعالى وزەنىندەگى بوگەتتىڭ جوعارى جاعىندا، ياعني تاۋ ىشىندەگى ەرىگەن مۇزدىق پەن جاڭبىردان جينالعان كولشىك سۋىنىڭ كوتەرىلۋى سەبەپ بولعان.

سەل وتكەن قاراعايلى ەلدى مەكەنى تۇرعىندارى. الماتى، 23 شىلدە 2015 جىل.

«كۇننىڭ قاتتى ىسۋىنان قارعالى مۇزدىعىنىڭ استىنداعى اتى جوق كولشىك سۋى كوبەيىپ، كولەمى 40 مىڭ تەكشە مەترگە جەتكەن. سالدارىنان كول تابانىن بۇزىپ اققان سۋدىڭ نەگىزگى ماسساسىن قارعالى وزەنىنىڭ سۋ بوگەتى ۇستاپ قالعان. بوگەت بۇزىلعان جوق. قازىر سۋدى ەكى شليۋز ارقىلى تومەن قاراي اعىزىپ جاتىر» دەگەن يۋري يلين.

ول قازىر قارعالى وزەنىندە سۋ دەڭگەيى جوعارى قالىپ وتىرعانىن، سۋ سەكۋندىنا 10-12 مەتر جىلدامدىقپەن اعىپ جاتقانىن حابارلادى.

ازاتتىق راديوى