Almatı qalalıq äkimdiginiñ mälimeti boyınşa, 23 şilde tañ aldında Naurızbay audanı aumağında sel jürgen.

“Tüngi sağat üşte Qarğalı özeninde su deñgeyi köterilgeni turalı habar tüsti. Tasqınnan Almatınıñ irgesindegi Kamenka men Qarağaylı auıldarınıñ, Naurızbay audanında biraz üylerdi su alğan” dep mälimdedi Almatı tötenşe jağdaylar departamenti bastığınıñ orınbasarı Erlan Nwrpeyisov.

Resmi mälimet boyınşa, Qarğalı özeni boyında ornalasqan aymaqtardan 200-den asa adam evakuaciyalanıp, 176-mektep jäne Naurızbay audandıq äkimdigine ornalastırılğan.

Almatınıñ şetindegi İrgeli men Alğabas auıldarı jäne tağı birqatar eldimekenderde sel turalı suıt habardan dürlikken twrğındar üylerin tastap, sırtqa qaşqan.

Azattıq tilşisi Almatı-Taraz avtokölik jolındağı “Altın Orda” bazarı mañında jüzdegen kölik kepteliste twrğanın kördi.

Qalalıq tötenşe jağdaylar departamenti selden mert bolğan adamdar joq dep habarladı.

Departament ökili Erlan Nwrpeyisov äleumettik jelide tarağan “su tasqını qaytalanuı mümkin” degen aqparattı joqqa şığardı.

“Tek su deñgeyi köterilgen, bögenge zaqım kelmegen. Ekinşi ret sel jüru qaupi joq, jağdaydı baqılap otırmız” degen .

TJD  oqiğa ornında 400-den asa qwtqaruşı men 85 tehnika jwmıs istep jatqanın habarladı.

Qazaqstan işki ister ministrliginiñ beysenbi küni jariyalağan mälimeti boyınşa, Almatıdağı Qarğalı özeni boyındağı qauipti aymaqtan 900-ge juıq adam evakuaciyalanğan.

SELDEN ÜŞ AUDAN ZARDAP ŞEKKEN

Almatınıñ Naurızbay audanı äkimi Quanış Qaşqımbaev beysenbi küni brifingte selden zardap şekken twrğındar materialdıq järdem swrap jergilikti tiisti orındarğa ötiniş bere alatını turalı mälimdedi.

«Ärbir zardap şekken adam zañğa säykes 100 aylıq eseptik körsetkiş köleminde materialdıq kömek swrap äleumettik järdem orındarına ötiniş bere aladı. Basqa materialdıq şığındar su tarağan soñ esepteledi. Eger mülikter saqtandırılğan bolsa, oğan tölem mäselesin saqtandıru kompaniyaları şeşedi. Naurızbay audanın wlttıq gvardiya tolıq küzetke aldı. Wrlıq-qarlıqqa jol berilmeydi» degen äkim.

Sel jürgen Qarağaylı eldi mekeni. Almatı, 23 şilde 2015 jıl.

Jergilikti bilik ökilderiniñ aytuınşa, saldarınan Almatıdağı Naurızbay, Äuezov jäne Alatau audanında ornalasqan birqatar twrğın üylerdi su basqan. Äsirese Naurızbay audanı köbirek zardap şekken.

2014 jılı qırküyekte Almatınıñ qwramında jañadan segizinşi audan bolıp qwrılğan, qalanıñ batıs böligin qamtitın bwl audan aumağındağı twrğın-jaydıñ deni – jer üyler.

«Qarğalı özeninde su deñgeyi tüsken soñ tasqınnan qattı zardap şekken Naurızbay audanındağı twrğın üylerdi aralap, kelgen şığın kölemi esepteledi» dedi Almatı qalası äkiminiñ orınbasarı YUriy Il'in şildeniñ 23-i küngi brifingte.

Onıñ sözinşe, Almatıda selge Qarğalı özenindegi bögettiñ joğarı jağında, yağni tau işindegi erigen mwzdıq pen jañbırdan jinalğan kölşik suınıñ köterilui sebep bolğan.

Sel ötken Qarağaylı eldi mekeni twrğındarı. Almatı, 23 şilde 2015 jıl.

«Künniñ qattı ısuınan Qarğalı mwzdığınıñ astındağı atı joq kölşik suı köbeyip, kölemi 40 mıñ tekşe metrge jetken. Saldarınan köl tabanın bwzıp aqqan sudıñ negizgi massasın Qarğalı özeniniñ su bögeti wstap qalğan. Böget bwzılğan joq. Qazir sudı eki şlyuz arqılı tömen qaray ağızıp jatır» degen YUriy Il'in.

Ol qazir Qarğalı özeninde su deñgeyi joğarı qalıp otırğanın, su sekundına 10-12 metr jıldamdıqpen ağıp jatqanın habarladı.

Azattıq radioı