الماتى قالاسىنىڭ جاڭا اكىمى باۋىرجان بايبەك قالقامان-2 ىقشاماۋدانىندا ورنالاسقان نازارباەۆ زياتكەرلىك مەكتەبىنىڭ وقۋشىلارىنا ولاردىڭ بولاشاعى جايلى ايتىپ بەردى، – دەپ حابارلايدىTengrinews.kz ءتىلشىسى. حيميا-بيولوگيا باعىتىنداعى مەكەمە 960 وقۋشىعا ارنالعان. ونىڭ قۇرىلىسىنا 5,7 ميلليارد تەڭگە جاراتىلدى.

جاڭا نازارباەۆ زياتكەرلىك مەكتەبىندە 300 ورىندىق جاتاقحانا بار، وندا قازاقستاننىڭ تۇكپىر-تۇكپىرىنەن كەلگەن بالالار وقيدى. قۇرىلىسشىنىڭ مالىمەتىنشە، ءبىلىم بەرۋ مەكەمەسى قازاقستانداعى ەڭ ءىرىسى. ونىڭ تەرريتورياسى – 5,7 گەكتاردان اسادى. مەكتەپتە ەكى ۇلكەن سپورت زالى بار، فۋتبول جانە باسكەتول الاڭدارى، سونىمەن قاتار، بالالاردىڭ اۋىلشارۋاشىلىق وسىمدىكتەرىن ەگۋىنە مۇمكىندىك بەرەتىن باقشا بار. قۇرىلىس جۇمىستارى ءۇش جىل ءجۇردى. عيماراتتىڭ جالپى اۋدانى 103 مىڭ شارشى مەتر.

© الىشەر احمەتوۆ

الماتىنىڭ اكىمى عيماراتتى قاراپ شىعىپ، جاڭا نازارباەۆ زياتكەرلىك مەكتەبىنە ءتۇسۋ كونكۋرسىندا ءبىر ورىنعا 7-8 ادامنىڭ تالاساتىنىن اتاپ ءوتتى. “سەندەر ۇزدىكسىڭدەر. سوندىقتان جاقسى وقۋ كەرەك. سەندەرگە مول جاۋاپكەرشىلىك ارتىلىپ وتىر. الماتى ءبىلىم بەرۋ سالاسىندا كوش باستاپ تۇرعان قالا. مۇندا ايتارلىقتاي باسەكە بار. ءتورت جىل بويى ۇبت-دا ەڭ جوعارعى كورسەتكىش بولدى. قالادا مامانداندىرىلعان التى مەكتەپ بار. فيزمات بار، وتە جاقسى مەكتەپ. بۇگىندە مينيسترلىكتەردىڭ، مەملەكەتتىك ورگانداردىڭ باسشىلارى فيزماتتان شىققاندار. سونىمەن قاتار، قتل بار، وندا دا ايتارلىقتاي باسەكە بار. ءاربىر مەكتەپ – بۇل رۋح، مادەنيەت، اتا-انالارىڭنىڭ قاتىسۋى. سىزدەرگە ەڭ باستىسى ساتتىلىك. وقۋ، وقۋ جانە ەشتەڭەدەن قورىقپاۋ، پرەزيدەنتىمىز سياقتى. ءبىلىم – بۇل وتە جاقسى، بىراق تاربيەسىز ءبىلىم ەشتەڭەگە دە جەتكىزبەيدى. ءوز ەلدەرىڭنىڭ پاتريوتى بولىڭدار. ءتارتىپتى بولىڭدار. ءبىر جاعىنان الىپ قاراعاندا بارلىعىڭ باسەكەلەسسىڭدەر، ال ەكىنشى جاعىنان سەندەر دوسسىڭدار، ءبىر كومانداسىڭدار. 2050 جىلدارى سەندەر 48-دە بولاسىڭدار. ەگەر جاقسى وقيتىن بولساڭدار، سول قازاقستاندى سەندەر قۇراسىڭدار. بالالارىڭ مەن نەمەرەلەرىڭ بولىپ، قۋاناسىڭدار، ءوز ەلدەرىڭ ءۇشىن ەڭبەكتەنەسىڭدەر. ەلدى قۇرۋ ءۇشىن فيزيكتەر، حيميكتەر، ماتەماتيكتەر، بيولوگتار قاجەت. بارلىعى سەندەردىڭ قولدا. وسى اسۋدان وتۋلەرىڭ ءۇشىن بارلىق جاعداي جاسالعان”، – دەدى بايبەك.

ول نازارباەۆ زياتكەرلىك مەكتەبىنىڭ قانداي قۇرىلعىلارمەن جابدىقتالعانىن جانە ونىڭ باتىس ەلدەرىندە دە جوق ەكەنىن اتاپ ءوتتى. “مۇنداي جاعداي ول جاقتاردا جاسالمايدى. بارلىق اتا-انانى، اجەلەر مەن اتالاردى قۇتتىقتاعىم كەلەدى. بارلىق بالانى دامىتۋ كەرەك. ءبىلىم عانا ەمەس، تاربيە دە بولۋى كەرەك. جاستار پاتريوت بولۋى ءۇشىن الدارىنا سەنىمدى ماقساتتار قويۋى ءۇشىن، ءوز حالقىن ءسۇيۋى ءۇشىن. مۇعالىمدەر وتە مۇقيات كونكۋرستان ءوتتى. مۇندا جالاقى الماتى بويىنشا دەڭگەيدەن ەكى ەسە كوپ”، – دەدى ول.

ەسكە سالا كەتەيىك، الماتىداعى 864 ورىندىق ءبىرىنشى نازارباەۆ زياتكەرلىك مەكتەبى 2014 جىلدىڭ 4 شىلدەسىندە اشىلعان بولاتىن. فيزيكا-ماتەماتيكا باعىتىنداعى مەكەمەگە ءبىلىم الۋعا 672 وقۋشى قابىلداندى. ايتا كەتەيىك، ال ءبىرىنشى نازارباەۆ زياتكەرلىك مەكتەبى استانادا 5 جىل بۇرىن سالىنعان ەدى. مەكەمەدە روبوتتار تەحنيكاسى، جىلىجاي جانە تەلەستۋديا بار. وقۋشىلار مەكتەپكە قابىلدانار الدىندا تەستىلەۋدەن ءوتتى، تەستىلەۋلەر شەتەل ماماندارىنىڭ قاتىسۋىمەن ءوتتى. مۇعالىمدەر دە مەكتەپكە ارنايى كونكۋرستان وتكەننەن كەيىن عانا جۇمىسقا تۇردى. جۇمىسقا شەتەلدىڭ 22 مۇعالىمى قابىلدانادى دەلىندى. ءبىلىم بەرۋ مەكەمەسىنىڭ باسشىلىعى تۇلەكتەردىڭ شەتەل جوعارى وقۋ ورىندارىنا تۇسە الاتىنىن جانە ەمتيحانداردى اعىلشىن تىلىندە تاپسىرا الاتىنىن ايتتى.

tengrinews.kz