– ەلميرا، الدىمەن تۇماندى البيونعا قالاي بارىپ ءجۇرسىز؟
– الماتىداعى ت.رىسقۇلوۆ اتىن­داعى جوعارى وقۋ ورنىن ەكو­نوميكا ماماندىعى بويىنشا قىزىل ديپلوممەن ءبىتىرىپ، قارجى مامانى بولىپ شىققان سوڭ دا، ارى قاراي وقۋىمدى جالعاس­تىر­عىم كەلدى. سەبەبى بۇگىنگى زاماندا ءبىلىمسىز ەشقايدا اتتاپ باسا ال­مايسىڭ. ءسويتىپ، لوندون بيزنەس-مەكتەبىندە ازاماتتىق قۇقىق بوي­ىنشا باكالاۆردى ءبىتىردىم جانە قارجى ماگيسترىنىڭ ديپلومىن الىپ شىقتىم.
ءوزىمنىڭ كاسىبي ەڭبەك جو­لىم­دى اۋەلى تۋعان قازاقستانىمدا، قارجى مينيسترلىگىنىڭ سالىق كو­ميتەتىندە جۇمىس ىستەۋدەن باستا­دىم. سالىق سالۋ مەن ونى جي­ناۋدىڭ ءادىسناماسىن، ءنورماتيۆتى اكتىلەرىن تۇزۋگە قاتىستىم. سالىق سالاسىنداعى الەمدىك تارتىپتەردى تولىق مەڭگەرۋ ءۇشىن قوسىمشا امەريكاعا بارىپ وقىپ، سايكە­سىنشە سەرتيفيكاتقا يە بولدىم. قازىر انگليادا وسى تاقىرىپپەن بەلسەندى تۇردە شۇعىلدانۋدامىن.
امەريكادا جولداسىم ەكەۋمىز ءتورت جىل تۇردىق. لوندوندا تۇ­رىپ جاتقانىما بەس جىل بولدى. لوندون ورتالىعىنداعى ينۆەستي­تسيا بويىنشا ەڭ ۇزدىك كونسال­تينگتىك كومپانيالاردىڭ بىرىندە انگليا زاڭدىلىقتارىنىڭ قاتاڭ تالابىنا سايكەس كليەنتتەرمەن قالاي جۇمىس ىستەۋ بويىنشا باعا جەتكىزگىسىز تاجىريبە جيناقتادىم دەسەم بولادى. ناتيجەسىندە وسىن­­دا ءوزىمنىڭ جەكە كومپانيا­م­نىڭ نەگىزىن قالادىم.
– ءسىز باسقاراتىن فيرما نەمەن اينالىسادى؟ 
– فيرمامىز اعىلشىنشا Regal Oak International LTD دەپ اتا­لادى، قازاقشا ايتساق «كورولدىك ەمەن». ءبىلىم، جىلجىمايتىن ءمۇ­لىك، قارجى جانە سالىق، ت.ب. سالا­لار بويىنشا ساراپشىلىقپەن اينالىسامىز. قۇدايعا شۇكىر، ساپالى ەڭبەكتىڭ ارقاسىندا تا­بىستى جۇمىس جۇرگىزۋدەمىز، ءوزىمىز دە، كليەنتتەرىمىز دە ءدان ريزا. امە­ريكادان جيناعان ءتاجىري­بەم­نىڭ ارقاسىندا انگلياعا قونىس اۋدارعان نەمەسە قونىس اۋدارماق تالاي ادامنىڭ جات جەرگە تەزىرەك ءسىڭىسىپ كەتۋىنە، ءۇي الۋىنا، جۇمىس تابۋىنا، ءبىلىم الۋىنا كوپ كو­مە­گىم تيۋدە. الماتىدا، استانادا، اقتوبەدە دە وفيستەرىمىز بار. سون­داي-اق كومپانيامىز قازاق­ستان­نان بولەك ارمەنيا، ءازىرباي­جان، قىرعىزستان، مولدوۆا، ءتا­جىك­ستان، وزبەكستان جانە گرۋزيا ەلدەرىندە دە قىزمەت كورسەتەدى.
ءبىز لوندون، ۇلىبريتانيا بو­يىنشا ءبىلىم بەرۋ سالاسى، سو­نى­مەن قوسا تۇرعىن ءۇي، ساياحات جانە ستۋدەنتتەردى، ماگيسترانت­تاردى، تۋريستەر مەن يمميگرانتتاردى قىزىقتىراتىن باسقا دا كوپتەگەن ماسەلەلەردىڭ، سۇراقتاردىڭ ءار­كىمگە دە ءتيىمدى، قولايلى، ۋاقىتتى ۇنەمدەيتىن جاقتارىن قاراستى­رۋعا ءاردايىم دايىنبىز.ماسە­لەن، جەكە كلينيكالار، ساۋىقتىرۋ باعدارلامالارى، بوسانۋ، اۋرۋ­حانا، ليزينگ، ونەر مەن ءسان، توي وتكىزۋ، تاعى دا باسقا دا كوپتەگەن  سۇراقتار بويىنشا ساپالى قىزمەت كورسەتەمىز. ءتۇرلى قۇجاتتار بويىنشا كومەكتەسەمىز. اركىمنىڭ جەكە قالاۋى بويىنشا، تۇرىپ جاتقان اۋدانىن ەسكەرە وتىرىپ، مەكتەپ جاعدايىن قاراس­تى­رىپ، جىلجىمايتىن مۇلىك تاڭ­داۋعا، ۇلىبريتانيادا اۆتوكولىكتى جالعا نەمەسە ساتىپ الۋىنا قىز­مەت كورسەتەمىز. ءبىز، قاجەت بولعان جاعدايدا، اۆتوكولىك ساقتاندىرۋ بويىنشا دا قىزمەت كورسەتۋگە، ديلەرلەر تۋرالى اۋقىمدى اق­پاراتتى ۇسىنۋعا دا زور ۇلەس قو­سۋ­دامىز.
سونداي-اق لوندون، ۇلىبري­تانيا جەرىنە قادام باسقانداردىڭ جوسپارلاپ كەلگەن قىزىقتى دە­ما­لىستارىنىڭ كوڭىلدى ءوتۋىن قا­راس­تىرامىز. تۋريستەردىڭ اۆتوبۋسپەن نەمەسە جەكە تۋرمەن، گيدپەن تاري­حي قالالارمەن (لوندونعا، Warwick Castle, وكسفورد، كەمبريدج، Windsdor Castle, ليدس، ستوۋن­حەندجا، Bath, Stratford, Cotswolds) تانىسۋعا، ساياحاتقا بايلانىستى بيلەتتەرىن ءتيىمدى باعاعا ساتىپ الۋعا، برون جاساۋعا، قوناقۇي، مەيمانحانا، حوستەل جالعا الۋعا قىزمەتىمىزدى ۇسىنامىز.بالاباق­شادان باستاپ، مەكتەپ (جەكە، مەم­لەكەتتىك), لينگۆيستيكالىق (اعىل­شىن ءتىلىن مەڭگەرەتىن) جانە باسقا دا كاسىبي كۋرستارعا ، جوعارى وقۋ ورىندارىنا (باكالاۆريات، ماگيس­تراتۋرا، دوكتارانتۋرا) تۇسۋگە باي­لانىستى تولىق ساپالى اق­پاراتتار ۇسىنامىز. ستۋدەنتتەرگە جاتاقحانا تاڭداۋدىڭ ءتيىمدى جو­لىن ۇسىنامىز. بىزدە جىلجى­ماي­تىن مۇلىك نارىعىنداعى دەرەكتەر ۇنەمى جاڭارتىلىپ تۇرادى. قىس­قاسى، ساتتىلىكتىڭ كىلتىن لوندون، ۇلىبريتانيا مەملەكەتىنەن ىزدە­گەندەرگە كورولدىك ەمەن قاشان دا ساپالى قىزمەت كورسەتۋگە دايار.
– وتباسىڭىز جونىندە بىرەر ءسوز ايتساڭىز؟
– جولداسىم ەرمەك تە قارجى سالاسىنىڭ قىزمەتكەرى. الماتى­نىڭ «اقساي» شاعىن اۋدانىندا كورشى تۇردىق. ول مەكتەپتە ورىس­شا وقىعان. ءوزىم قازاق بالاباق­شاسىندا تاربيەلەنىپ، الماتى­داعى 147-قازاق مەكتەبىن 16 جا­سىمدا ۇزدىك بىتىرگەنمىن. جول­داسىم ەكەۋمىز دە ۋنيۆەرسيتەتتە بىرگە وقىدىق. وقي ءجۇرىپ باس قوس­تىق. ەكى قىزىمىز بار، بولسا دا اعىلشىن مەكتەبىندە وقيدى. ۇيدە تەك قازاقشا سويلەسەمىز. اكە-شە­شەم الماتىدا تۇرادى. اكەمنىڭ ەسىمى – يسلام، پوليتسيا قىزمەت­كەرى بولىپ ءجۇرىپ زەينەت دەما­لى­سىنا شىققان. قازىر دە قول قۋ­سىرىپ وتىرعان جوق، باسقا سا­لادا ەڭبەكتەنۋدە. انام ايگۇل شا­عىن بيزنەسپەن اينالىسادى. كۋ­لي­نا­ريا مامانى. ءوزىم ءۇيدىڭ تۇڭ­عى­شىمىن. ءسىڭلىم مەن ءىنىم بار.
– ەۋروپاداعى قازاقتار تۋرالى نە دەيسىز؟
–بۇرىننان تۇراتىن، ياعني تۇركيادان 80-جىلدارى كوشىپ بارعان 400-دەي جەرگىلىكتى قازاق­تار تۋرالى ايتسام، وكىنىشكە قاراي، ولاردىڭ كوبىسى انا ءتىلىن ۇمىتىپ بارا جاتىر. جاستار جا­عىن ايتام. بۇگىنگى ۇرپاقتىڭ انا تىلىنەن اجىراپ بارا جاتقان­دى­عىنا اتا-انالارى الاڭداۋشىلىق بىلدىرەدى. بالالارىمەن اعىلشىن­شا سويلەسەدى. ولاردى قويشى، ءوزى­مىزدىڭ قازاقستاننان وقۋعا بارعان تالاي جاستىڭ قازاقشا بىلمەيتىندىگىن كورگەندە ەرىكسىز قارنىڭ اشادى. امال جوق، قازاق بالالارىمەن ورىسشا تۇسىنىسۋگە تۋرا كەلەدى. لوندوندا تۇراتىن قازاقتاردىڭ نەگىزىن وسى ەلدەن كەلگەن ستۋدەنتتەر قۇرايدى. دە­گەن­مەن، اعىلشىندار قازاق با­لالارىنىڭ تالانتتىلىعىنا تاڭ­عالادى. لوندوندا تۇراتىن جاڭا قازاقتار قالانىڭ ەڭ اۋقاتتى اۋ­دانىندا تۇرادى.وندا دا ءتىل ءما­سە­لەسى الدىڭنان شىعادى. بولا­شاق­تا قاجەتتى شارالار قول­دا­نىلماسا جاڭا بۋىن قازاقتار، تۇرعان ەلدە­رىنىڭ مادەنيەتىن جانە سالت-ءداس­تۇرلەرىن قابىلداپ، اسسيميلياتسيا بولىپ كەتەتىنى انىق. ماسەلە بالاعا بەرىلەتىن ۇلتتىق ءتىل مەن ءما­دەنيەتتە. انگلياداعى اتا-انا­لارعا جۇكتەلەتىن جاۋاپكەر­شىلىك وتە كوپ. بىراق سول اتا-انالاردىڭ وزدەرى دە انا تىلدەن ماقۇرىم. ولارعا قول ۇشىن بەرۋ ەڭ الدىمەن قازاقستانداعى ءتيىستى ورىنداردىڭ الدىندا تۇرعان مىندەت. ارينە، ەۋروپاداعى قازاق مادەنيەت ور­تالىقتارى جاستارعا قازاق ءتىلىنىڭ وقىتىلۋ جۇمىستارىمەن شۇعىل­دانىپ جاتقانى انىق. لوندون­داعى قازاقستان ەلشىلىگى، ونداعى قازاق مادەنيەت ورتالىعى دەگەن­دەي. دەگەنمەن، قازاقستاننىڭ دا اتسالىسقانى دۇرىس. ال وزىمىزگە كەلسەك، الىستا جۇرسەك تە جۇرە­گىمىز تەك «قازاعىم» دەپ سوعادى.
– لوندون مەن الماتىنىڭ ەرەكشەلىگى نەدە؟ 
– مۇندا بىزدەگىمەن سالىستىر­عاندا تاماق قىمبات تا، كيىم وتە ارزان. قالا وتە تازا. شاھاردى قاق جارىپ تەمزا وزەنى اعادى. بىراق كوشەلەرى تار. كونەنىڭ كوزى سانالاتىن ساۋلەتتى عيماراتتارى كوپ. ساياباقتار دا جەتەدى. تۇر­عىندار ىڭعايلى كەز كەلگەن جەرگە وتىرا بەرەدى. وزدەرىنە ىڭعايلى كيىم كيىنەدى. ول جاقتىڭ حالقى كوبىنە ۇيدەن گورى مەيرام­حانا­لاردان تاماقتانعاندى قۇپ كورەدى. قالادا تۋريستەر وتە كوپ. لوندون تۋرالى ءسوز ايتا بەرسەڭ تاۋ­سىلمايدى.