– اللو!
– اللو! بۇل كىم؟
– كىمدى ىزدەدىڭ؟
– تانىدىڭ با؟
– جۇلدىز با ەدىڭ؟
– يə، سەنىڭ جۇلدىزىڭمىن،
جان اشپاعان سىردى ىزدەدىم.
– كەشىرىڭىز! كىم ەدىڭىز؟
– ءبىر سۇلۋدىڭ تىرەگىمىز،
ءƏزىر بويداق، باسىمىز بوس…
– بوس ورىنعا گۇل ەگىڭىز!
سوڭعى كەزدە تۇسىرىلگەن كليپتەردىڭ ىشىندە ءازىلى دە، ءمانى دە، ادەمى سيۋجەتى دە بار «اللو» كوپتىڭ كوڭىلىنەن شىققانى داۋسىز. ءبىر جاعىنان اقبوز اتتى حانزاداسىن كۇتكەن بويجەتكەن تۋرالى ەرتەگىگە دە ۇقسايتىن بەينەباياندا ءبارى بار. اۋىلدىڭ ارۋى مەن قالاداعى جۇلدىز جىگىتتىڭ ۇيالى تەلەفونداعى ءان-ديالوگىنان جاستىق، سۇلۋلىق، ارماندار مەن ماحاببات تا تابىلادى. كوزگە وتتاي باسىلاتىن تانىس سۋرەتتەر انشىلەرىمەن قوسىلىپ، قازىرگى بوزبالا مەن بويجەتكەندەردىڭ بۇكىل تىلەكتەرىن الديلەيدى. قىسقاسى، قازىرگى زاماننىڭ ەرتەگىسى.
نە دەسەك تە اياقتالعان جىلدا سەرىك يبراگيموۆتىڭ ورىنداۋىنداعى «جاياۋ»، قايرات نۇرتاس پەن جانار دۇعالوۆا سالعان «سەن مەنى تۇسىنبەدىڭ»، بەيبىت كوشقاليەۆ ايتاتىن «قايتەسىڭ وزگەنى»، «مۇزارت» توبىنىڭ «جەڭەشەم» اندەرىمەن قاتار «اللو» دا وپ-وڭاي حيتقا اينالدى. نەگە؟
ويتكەنى، ماعىناسىز جىلاۋىق اندەردەن جالىققان تىڭدارمانعا سوزدەرى قۇلاققا قوناتىن، سازى ويناقى «اللو» ۇناپ تۇر. اتالمىش انگە كوپ ۇزاماي تۇسىرىلگەن كليپ تە شىندىققا جاناسادى. رومانتيكا بار. انايىلىقتان ادا.
سونىمەن، كليپ تىڭدارماندارىنا جول تارتا سالىسىمەن الەۋمەتتىك جەلىدەگى بەلسەندى قاۋىمنىڭ پىكىرلەرى كوبىنەسە «ءاننىڭ اۆتورلارى كىم ەكەن؟ جىلاۋىق اندەردەن شارشاعان، ەستىگىسى كەلمەيتىن ادامدارعا جاقسى ەكەن». «بەينەباياننىڭ ءوزى دە قانداي جاقسى! ومىردەن ويىپ العان ءبىر كورىنىستەي ەكەن شىنىمەن». «ءانى دە، ءسوزى دە ۇنادى. تەك «كەل، سىرلاسايىق، كەل، سىرلاسايىق، قوسىلعان سولاي كوپ ەگىز» دەگەن جەرىن تەك جىگىت ايتۋى كەرەك پە ەدى دەپ ويلايمىن» دەگەندەي تۇرعىدا ءوربىدى.
«بۇكىل قازاقستان «اللو» دەپ «ازان» شاقىرىپ تۇرعانداي… ءتۇننىڭ جارىمى… الىستان «اللو» جەتىپ جاتىر»، دەپ جازدى فەيسبۋكتەگى ءوز پاراقشاسىندا ءومىر شىنىبەكۇلى. وزگەلەر كەلىستى.
– بۇل ءاننىڭ ەلەڭدەتەتىن ەرەكشە ءبىر تاريحى جوق. بىراق قازىرگى ەسترادادا ورىندالىپ جۇرگەن اندەردەن باسقاشا ءبىر شىعارما جاساعىمىز كەلدى. قاراپ وتىرساق، ماحاببات جايلى اندەردىڭ ءبارى ءبىر بىرىنە ۇقساس بولىپ بارادى. ءبىز سولارعا ۇقسامايتىن تىڭ تاقىرىپقا بارىپ، سول باعىتتا جۇمىس جاسادىق. انشىلەردىڭ اراسىنان قازاقى اندەر ايتاتىن ەركە ەسماحاندى تاڭداپ الدىق. ءسوزى مەن سازى جازىلعاندا ورىنداۋشىلاردىڭ داۋىسى، ءيميدجى ەسكەرىلدى، – دەيدى تورەعالي تورەالى.
«ءبىزدىڭ «اللو» ءانى مەن وعان تۇسىرىلگەن بەينەبايان xالىقتان «جاقسى» دەگەن باعا الىپ جاتىر! وسى باعانى الۋ ءۇشىن ەڭبەك ەتتىك، دەمەك ماقساتقا قول جەتكىزدىك!» دەپ جازدى ەركە ەسماحان ءوزىنىڭ جەكە الەۋمەتتىك پاراقشاسىندا.
ال كليپ تانىمال پروديۋسەر بايان ەسەنتاەۆا مەن تورەعالي تورەالىنىڭ اكەسى ءتورالى تولەپوۆتىڭ يدەياسىمەن تۇسىرىلگەن. ءاننىڭ ءسوزىن جازعان ايتىس اقىنى قاينار الاكوزوۆ، ءانىن جازعان قۇرال مولجانوۆ. وسى ارادا وسى ەكى تالانتتىڭ تاندەمىنەن، ياعني قاينار الاكوزوۆ پەن قۇرال مولجانوۆتىڭ شىعارماشىلىق وداعىنان وزگە دە تانىمال اندەر تۋعانىن ايتۋ كەرەك. ماسەلەن، تورەعالي تورەالى ورىنداپ جۇرگەن «بول جانىمدا»، نۇربولات ابدۋللين شىرقايتىن «سۇيگەنىڭ قايدا؟» اندەرى وسى كۇندەرى ەڭ تانىمال حيت اندەردىڭ قاتارىندا.
وسىلايشا ءانشى ەركە ەسماحاننىڭ ەركەلىگى، تۇساۋىن ايتىس كەسكەن تالانت تورەعالي تورەالىنىڭ جاڭا دۋەتى كوپشىلىككە ۇنادى. ونەر ايدىنىنداعى جاڭالىقتاردان قۇلاعى تۇرىك جاندار سوڭعى ۋاقىتتا بۇل دارىندار دۋەت تۇرىندە ساحناعا كوبىرەك شىعىپ جۇرگەنىن بايقاعان دا بولار.
ءوزى دە ايتىستا حيت بولعان ءاندەرگە پاروديا جاساپ ءجۇرىپ، از ۋاقىتتا ەسترادا تورىنەن ورىن العان تورەعالي تورەالىنىڭ ايتۋىنشا، ول بار بولعانى 4 جاسىندا العاش رەت ناۋرىز مەرەكەسىندە كوپتىڭ الدىندا ونەر كورسەتكەن. بايقوڭىردىڭ بالاسى، تورەتامنىڭ تۋماسى ونەرپاز اكەسىنە ەرىپ ءجۇرىپ، تۇڭعىش رەت 7 سىنىپتا «اكە مەن بالا» كليپىنە ءتۇسىپتى. قىزىلوردا وڭىرىندە تانىمال اۋلەتتەن شىققان ءانشىنىڭ تىڭدارماندارىنا ءالى دە ايتارى كوپ. ول جاي ورىنداۋشى ەمەس، اقىن جىگىت. قۇداي بەرگەن ساحنالىق كەلبەتى مەن امبيتسياسى بار.
ال «جەكە ءومىرىم تۋرالى مۇنان بىلاي ەشكىمگە ايتپايمىن» دەپ وزىنە ءوزى تالاپ قويعان ءانشى ەركە ەسماحان بايان ەسەنتاەۆانىڭ «Shine Stars Production» پروديۋسەرلىك ورتالىعىنداعى ارۋلاردىڭ ءبىرى. «ىڭكار» توبىنىڭ قۇرامىنان شىققان ءانشى قازىر ءوزى ساحناعا جەكە شىعىپ ءجۇر. ەركەنىڭ داۋىسى مەن كەلبەتىنە تىڭدارماندارى داۋ ايتا المايدى.
اتىما زاتىم ساي بولسىن دەيتىن قاعيدانى ۇستاناتىن ەركە ەسماحاننىڭ جەكە شىعارماشىلىعى «ىڭكار» توبىنان كەيىن باستالدى. بايان ەسەنتاەۆانىڭ قولداۋىمەن «ايشا ءبيبى» ءانىنە تۇسىرىلگەن بەينەبايان ونى تىڭدارماندارىنا كادىمگىدەي تانىتتى.
«ءانشى بولماسام، ءانشى بولار ەدىم» دەيتىن ەركە ەسماحان ومىردە اقىلدى، بايسالدى ادام، باقىتتى انا بولۋعا تىرىسادى.
ايناش ەسالي،
«ەگەمەن قازاقستان».
الماتى.
پىكىر قالدىرۋ