قازاقتار – مەملەكەت قۇرۋشى ۇلت!
kerey.kz
قوعام ءوز ەركىن، تىلەگىن، ماقساتى مەن تالابىن ەمىن ەركىن ءبىلدىرىپ قالىپتاسقانى دۇرىس. بۇل بيلىك پەن قوعام اراسىنداعى شىنايى ديالوگقا ۇلاستىرادى. بىراق بىزدە وسى مەملەكەتتىك ينستيتۋتتار مەن قوعامدىق ينستيتۋتتار اراسىنداعى قاباتتار تەوريالىق دەڭگەيدە قۇجاتتىق بولسىن، قۇقىقتىق ساياسي بولمىستار بار دەپ بىلەمىز. مىسالى كەشە عانا سايلاۋدا ءماجىلىستىڭ 82 پايىز داۋىسىن العان “نۇروتان” پارتياسى قوعام مەن بيلىك اراسىندا كوپىر بولۋى ءتيىس ەدى. نەگە الاڭعا توگىلگەن حالىق اراسىندا وسى پارتيا كورىنبەيدى؟ نەگە حالىق ەركى پارلامەنتتە وكىلدىگىمەن تانىلمايدى؟ سوندا پارلامەنتتەگىلەردى حالىق سايلاماسا كىم سايلاعان؟ جەكە كوزقاراسىم، نۇروتان پارتياسى ءىشى قۋىس، مازمۇنى جوق، ساياسي قۇرىلىم. ەگەمەن ەل بولعالى بەرى بيلىك قوعامدىق سانانى تۇنشىقتىرۋمەن اينالىستى. قوعامدى ساياسي بولمىستىق جاۋاپكەرشىلىكتەن ماقۇرىم قىلدى. ناتيجەسىندە ەل تاعدىرىن بيلىك ەشكىممەن اقىلداسپاي اق ءوزى شەشىپ ۇيرەندى. ەل شىن مانىندە ءوز ەلىنىڭ قوجايىنى سەزىنە المادى. حالىق تا سابىر ساقتادى، ياكي شىندىعىندا ساياسي ساناسى دا بيلىككە ىقپال ەتەر الەۋەتى دە دامىمادى. شيرەك عاسىر بويى نە پرەزيدەنتتىك نە پارلامەنتتىك باسقارۋ جۇيەسى قوعام مەن بيلىك اراسىنداعى بىرلىك پەن تۇتاستىقتى قالىپتاستىرا المادى. قولدان جاسالعان پارتيالار مەن ماجىلىستەگى ورىندار، اتى مەن زاتى بولەك بولسا دا، ءبىر عانا بيلىكتىڭ قولشوقپارى بولدى ءالى دە سولاي. مەملەكەتتى قۇرۋشى مادەنيەتپەن ونىڭ تۇعىرلىق بولمىسىمەن بيلىك ساناسپادى. مادەنيەتى دە ءتىلى دە الەۋمەتى دە قۇقى دا ەسكەرىلمەدى. ۇلت قۇندىلىقتارى تۋرالى كەشەندى ساياسات جاسالمادى. ۇلتتىق سويلەمدەر مەن سەزىمدەر تاپتالدى، سىنالدى. كونستيتۋتسيادا دا ورىن المادى. ياعني قازاقستان مەملەكەتتىك قۇرىلىمى جاعىنان ءداستۇرسىز ەل سياقتى نەگىزدەرمەن ءتۇسىندىرىلدى. قازاقتىڭ ۇلتتىق وركەنيەتتىك نامىسى مەن تاجىريبەسىن ەسكەرمەۋ قالىپتى جاعدايعا اينالدى.
بيلىك بۇگىنگى قوعامدىق سانانىڭ تۇنشىعىپ قالۋىندا ەڭ باستى ءرولدى اتقاردى. توتاليتارلىق، كوررۋپتسيالىق كەشەن قازاقتى قازاققا دۇشپان قىلىپ كورسەتتى. بۇرىنعى كەڭەستىك قالا بەردى رەسەيدىڭ شوۆينيستىك ساياساتى سول قالپى جالعاسىن تاپتى. ۇلى ءجۇز ورتا ءجۇز كىشى ءجۇز اراسىنداعى “تەپە-تەڭدىك تەورياسى” ۇلتتىق تۇعىردىڭ دامۋىن تەجەدى. ۇلت ءسوزىن ايتقاندار “ەشتەڭە كورمەگەن، قولىنا ەشتەڭە تيمەگەن” بيشارالار رەتىندە انىقتالدى.
راس، ەل مۇددەسى بولاشاعى ءۇشىن تىنىشتىقتان اسقان قۇندىلىق جوق. قازاق مۇنى وتە جاقسى سەزىنىپ، تانيتىن ۇلت. سوندىقتان بارلىق بايلىعى ساتىلىپ جاتسا دا، ساياسي بولمىستىق تۇعىردا ءۇن شىعارمادى. ەندى ەڭ سوڭعى ۇلت تۇعىرى تۋرالى ءوزىنىڭ قاسيەتتى تۋعان جەرىنىڭ تاعى دا سول ەگەسىمەن ساناسپاي تالانعا سالىنۋى قازاق دەگەن ۇلتتىڭ شىن مانىندە، ونتولوگيالىق تۇرعىدان بار ەكەندىگىن پاش ەتتى. دەمەك قازاق دەگەن ۇلت ءتىرى ەكەن.
ۇسىنىسىم، بيلىك وسى اقيقاتتى بۇدان بىلاي ەسكەرسە، باياندىلىعى مەن ابىرويىن جيناپ الارى حاق. ال ەگەر ەسكەرمەي وزدەرى سىرتقى قوعامدىق ينجەنەرلەردىڭ شابلونىمەن كەتە بەرەتىن بولسا، قازاق بۇعان ەندى كونبەيدى.
قازاقتىڭ بيلىگى مەن ەلى تۇتاس بولعاندا عانا مىنا مەملەكەتتىلىگىمىز باياندى ۇستانىمدارىنا قاۋىشادى.
دوساي كەنجەتاي
facebook پاراقشاسىنان الىندى
پىكىر قالدىرۋ