قانى بولەك تۇركىنىڭ،جانى بولەك،
جاماماق بوپ جاۋدان قالعان جىرتىعىن.
التاي تاۋدا جورتتىڭ ۇزاق اق تۇندە،
اي تۇبىندە ءبىر ايقاسپاي كىرپىگىڭ.
تالاي قىران تۋ تۇبىنەن ۇشتى اعات،
قازاق رۋحىن ءور بولماي كىم ۇستاماق؟
تويات الدىڭ كەلگەن جاۋدىڭ توسىنەن،
جانىبەكتەن قالعان جۇرتقا سۇق قاداپ.
دالەلدەگەن كوكجالدىعىن تالاستا،
قايسار ەر ەڭ،
قايراتى اسقان،
باعى اسقان…
جۇرەگىڭە باتىپ ەلدىڭ شەمەنى،
قارا قوستان كوز ساپ تۇردىڭ الاشقا.
اڭدىسقانعا ەتەك-جەڭىن اشتىرماي،
ايعىر ءمىنىپ، اتا جاۋىن ساستىرماي.
سەن سياقتى ءولۋ ارمان جىگىتكە،
قاسيەتتى جەرىن جاتقا باستىرماي.
ءبىر كوزى جوق سوقىر اتان پىشىندە،
تاريح بۇل –
ۋ قايناعان ىشىندە،
قانىڭ جۇققان قاراكوپىر* ۇستىنەن،
الاش كوشىن كورىپ قالام تۇسىمدە.
التاي ءۇشىن الاقانىن قانداعان،
قانداي قايسار، كوكجال ەدىڭ ەر بابام!
سەن باتىر بوپ قورعاپ كەتكەن التايدىڭ
اقىن بولىپ قالعان وتىن مەن جاعام!
كوك پەن جەردىڭ اراسىندا ويتكەنى،
امانات بوپ سەنەن قالدى ەل ماعان،
امانات بوپ سەنەن قالدى جەر ماعان!
وڭاشادا جالاپ جازىپ جاراسىن،
اسپان جاققا بوي تۇزەدى الاشىم!
كوپىرلەر مەن شەكارالارعا شەكتەلمەي،
كوش وتۋدە جالعاپ تاۋلار اراسىن.
كەسىر كۇننىڭ كورىن تەرەڭ قازعامىن،
كەككە قايراپ وتكەنىمدى جازعامىن.
ۇشىپ شىعىپ، قاراكوپىر ۇستىنەن،
قونىس قاراپ جۇرگەن بولار ءاز جانىڭ!
ءابجىل ۋاقىت ماڭدايعا سور قۇيعاسىن،
اڭىراعان التاي قالدى،
قيماسىم…
اتان قومداپ،
ۇستايدى ۇلىم ءبىر كۇنى،
سول كوپىردەن وتكەن كوشتىڭ بۇيداسىن…
قاراكوپىر* – زۋقا باتىردى ولتىرگەن سوڭ قىتايلار زۋقانىڭ باسىن التاي قالاسىنداعى قاراكوپىرگە ىلگەن.
پىكىر قالدىرۋ