الماتىداعى اتىس نەنى بايقاتتى.
kerey.kz
بۇگىن الماتىدا وقىس وقيعا ورىن الدى. قۇقىق قورعاۋ مەكەمەسىنە باسا-كوكتەپ كەلگەن بوگدە ادام كىرە بەرىستە وتىرعان كەزەكشى پوليتسەيدى جاراقاتتاپ، اۆتوماتىن تارتىپ الىپ كەتكەنى حابارلاندى. الەۋمەتتىك جەلى ارقىلى تاراعان العاشقى اقپاراتتان كەيىن وقيعا ورنىنا شۇعىل جەتكەنىمىزدە المالى اۋداندىق ىشكى ىستەر ءبولىمىنىڭ قورشاۋعا الىنعانىن كوردىك. ونان كەيىن نيكولسك بازارىنىڭ الدىندا ماشيناسىنا وق تيگەن كۋاگەرمەن جولىقتىق. كۋاگەر جىگىتتىڭ ايتۋىنشا وقيعا بولعانىنا بىرنەشە ساعات بولعانىمەن بىردە-ءبىر قۇقىق قورعاۋ قىزمەتكەرى كەلمەپتى. وقيعانى كوزىمەن كورگەن سول جەردە تۇرعان ساتۋشىلاردا بىردەڭە دەۋگە قورقادى. «بايقا، ەرتەڭ كەلىپ الىپ كەتەدى» دەگەن ءوزارا اڭگىمەلەرىنە قاراپ ولاردىڭ الدەكىمدەردەن قاتتى سەسكەنەتىنىن بىردەن اڭعارۋعا بولادى.
وقيعادان كەيىن ءۇش ساعات وتكەندە بارىپ رەسمي اقپاراتتار جاريا بولا باستادى. بىراق سول مەزەتتە، ياعني وقيعا ورنىندا جۇرگەن الماتى قالالىق ىشكى ىستەر ءبولىمى ءباسپاسوز قىزمەتىنىڭ وكىلدەرىن كوزىمىزى شالدى. اقپارات بەرمەك تۇگىلى مويىن بۇرۋعا مۇرشالارى كەلمەي كەتىپ قالدى. تەك قارۋلى كۇش وكىلدەرىنىڭ ءبىر-بىرىنە حابارلاۋىنان» ۇستاۋ وپەراتسياسىنىڭ» جالعاسىپ جاتقانىن تۇسىندىك. ال الەۋمەتتىك جەلىنى كەزگەن «سايراندا قىرعىن بولىپ جاتىر ەكەن»، «ءبىرىنشى الماتى ۆوكزالىنا جارىلعىش زات قويىلىپتى» «ساۋدا ۇيىندە پالەن ادامدى كەپىلگە الىپتى» ىسپەتتى جالعان اقپاراتتار ونسىز دا كوڭىلىنە قورقىنىش ۇيالاعان الماتى جۇرتىن ودان ءارى قورقىتا ءتۇستى. الماتى جۇرتى كىمگە سەنەرىن بىلمەي دال بولدى. تەلەارانالار مەن راديولاردىڭ پروفيلاكتيكالىق جۇمىس كۇنى ەكەنىن ەسكەرسەك، اقپاراتتى الەۋمەتتىك جەلى نەمەسە سايتتار ارقىلى تاراتىپ حالىقتى تىنىشتاندىرۋعا، ساقتىق شاراسىن جاساۋعا شاقىرۋعا بولار ەدى. ماسەلەن، سول ساتتە ازاتتىق سايتىنىڭ فب-پاراقشاسىندا تىكەلەي ترانسلاتسيا ءجۇرىپ جاتقان بولاتىن. سول ارقىلى اق، الماتى جۇرتتشىلىعىن تىنىشتاندىرۋعا بولار ەدى. بۇعان قاراپ قۇقىق قورعاۋ سالاسىنداعى اقپارات قىزمەتىنىڭ دۇرىس جۇمىس ىتەي المايتىندىعىن، وقىس وقيعا ورىن العان جاعدايدا حالىقپەن بايلانىس ورناتۋعا ءالسىز ەكەندىگىن اڭعارۋعا بولادى.
ءبىر مەزەتتە ءۇش جەردە ورىن العان، بىرنەشە ادام زارداپ شەككەن وقيعا بۇعان دەيىن الماتىدا ورىن الماعانى بەلگىلى. بۇعان دەيىن بولعان اقكەنتتەگى اتىس نەمەسە قارعالداعى جارىلىس باسقا بولاتىن. ول كەزدە ءبىزدىڭ قۇقىق قورعاۋ قىزمەتكەرلەرى ولاردى ۇستاۋعا بارعان ەدى. ال بۇلى جولى ولار وزدەرى كەلدى. تاپا-تال تۇستە، الماتىنىڭ ورتاسىندا ورنالاسقان مەكەمەگە باسىپ كىرىپ، قارۋدى الىپ كەتىپ قالدى. كۋاگەردىڭ ايتۋىنشا، اۆتوماتىن يىعىنا اسىنىپ العان 20-25 جاس مولشەرىندەگى ازامات وتە سالقىنقاندى. اسىقپاي، قورىقپايدى.بازار ماڭىنداعىلارعا مىلتىق كەزەنىپ، جولدى ەمىن-ەركىن كەسىپ ءوتىپ ءجۇر. سونىمەن قاتار مۇقانوۆ كوشەسىنىڭ ابايمەن قيىلىسار تۇسىندا دا ەكىنشى جىگىتتىڭ قارۋ كەزەنىپ، كوشەدەگى كولىككە كەزەنىپ جۇرگەنىن ۆيدەودان كوزىمىز شالدى. اينالدىرعان ەكى جىگىتتىڭ الىپ مەگاپوليس تۇرعىندارىن وسىنشاما اۋرەگە سالۋى – ءبىزدىڭ قۇقىق قورعاۋ سالاسىنىڭ ءالى دە جەتىلمەگەنىن اڭعارۋعا بولادى.
پىسى: تاڭەرتەڭگى 11:00-دە اتىس باستالدى. كەشكى 17:00 مولشەرىندە ەكىنشى شابۋىلشىنىڭ ۇستالعانى تۋرالى بەيرەسمي اقپارات تارادى.
پىكىر قالدىرۋ