ورتالىق ازياداعى جەرلەۋ كوميسسياسى
kerey.kz
سوۆەتتەن قالعان ءداستۇر بويىنشا جەرلەۋ كوميسسياسىن كىم باسقارسا، ەلدى دە سول ادام باسقارادى. جەرلەۋ كوميسسياسىنىڭ توراعاسى كىم بولاتىنى پرەزيدەنتتىڭ قايتىس بولعانى جاريالاناردان بۇرىن بيلىكتەگى ىقپالدى توپتار اراسىندا شەشىلەدى. ەڭ ىقپالدى توپ – پرەزيدەنتتىڭ كۇزەت قىزمەتىنىڭ جەتەكشىسى، قاۋىپسىزدىك كوميتەتىنىڭ توراعاسى، پرەمەر-مينيستر، ىشكى ىستەر ءمينيسترى، قورعانىس ءمينيسترى جانە وسىلاردى سول ورىنعا تاعايىنداۋعا ىقپال ەتكەن بيزنەسمەندەر. استىرتىن اتىسىپ-شابىسۋى، حالىق اراسىندا بەدەلىم بار دەپ سانايتىن كەيبىرەۋلەرى دەرەۋ قاماۋعا الىنۋى دا مۇمكىن. بۇل ماسەلە شەشىلمەيىنشە پرەزيدەنت سالقىن سارايدىڭ قۇپيا بولمەسىندە توبەگە قاراپ جاتا تۇرادى. تەلەديداردا كونتسەرت، توك-شوۋلار كوبەيەدى. مىسالى، حاباردا دەگەندەي. حالىق پرەزيدەنتىنىڭ ءولىپ قالعانىن بۇكىل تەلەارنا لەبەدينوە وزەرونى قويعاندا ءبىر-اق بىلەدى. ماسەلەن، تۇرىكمەنباشىنىڭ ولگەنى كەم دەگەندە ءۇش كۇننەن كەيىن حابارلانعان. ىقپالدى توپ ءماجىلىس توراعاسى اتاەۆتى (قازاقستان جاعدايىندا – توقاەۆ) شۇعىل قاماۋعا الىپ، تۇرىكمەندەردىڭ قازىرگى اسقار تاۋىن “جەرلەۋ كوميسسياسىنىڭ جەتەكشىسى” ەتكەن.
ىقپالدى توپ تاعايىنداعان جەرلەۋ كوميسسياسىنىڭ جەتەكشىسىنە بۇكىل بيلىك پەن بيزنەس وتە تەز بەيىمدەلەدى، پالەندەي قارسىلىق بولمايدى، سايلاۋ 95 پايىزبەن ىڭ-شىڭسىز وتەدى. اۆتوريتارلىق جۇيەنى جالعاستىراتىنى ايدان انىق كانديداتۋراعا رەسەي دە، قىتاي دا قارسى بولمايدى. شامامەن التى ايدان كەيىن بۇرىنعى پرەزيدەنتتىڭ ەسكەرتكىشتەرى الىنا باستايدى. اقىندار، اسىرەسە ارتەزيان سىقىلدى توكپە، سۋىرىپ سالمالارى الەم ادەبيەتىنە جاڭا ودا ۇلگىلەرىن ءبىر اپتادا قوسادى. جاڭا پرەزيدەنت كەلسە دۇنيە وزگەرەدى دەپ ۇمىتتەنەتىن فەيسبۋكتەگى ءبىراز ادام ءبىرجولا تۇڭىلەدى. ەسكى وپپوزيتسيا نەمەرە باعىپ، نامازعا جىعىلۋدان وزگە تۇرلاۋلى جول جوعىن تۇسىنەدى.
ورتالىق ازياداعى قىرعىزستاننان وزگە ساياسي جۇيەسى ۇقساس اۆتوريتارلى مەملەكەتتەردە پرەزيدەنت كەنەتتەن و دۇنيەلىك بولا قالسا شامامەن وسىلاي بولادى). مۇنى ساراي توڭكەرىسى دەيدى.
كەشە توتەن اۋرۋدان جىعىلعان يسلام كارىموۆكە قۇداي ءومىر بەرسىن، بىراق 78 جاس دەگەنىڭىز و دۇنيەگە الجىماي ءسان-سالتاناتپەن تاق ۇستىندە ءبىرجولا اتتانىپ كەتۋگە بارىنشا قولايلى جاس قوي. جەرلەۋ كوميسسياسىنىڭ جەتەكشىسىن تاعايىنداۋشىلار مۇنداي ءساتتى قۇر جىبەرمەي، كومەكتەسۋى əبدەن مۇمكىن.
facebook پاراقشاسىنان الىندى
پىكىر قالدىرۋ