«وردا» توبىنىڭ مۇشەسى ەربولات بەدەلحان جەلىدە تاراپ كەتكەن گەيلەرگە قاتىستى مالىمدەمەنىڭ وعان ەش قاتىسى جوقتىعىن ايتىپ، NUR.KZ پورتالىنا سۇحبات بەردى. رەداكتسيا ەربولات بەدەلحاننىڭ “گەيلەردى قولدايتىنى” تۋرالى اقپارات بۇعان دەيىن پورتالدا شىقپاعانىنا باسا نازار اۋدارتادى.

فوتو اسىل بەدەلحاننىڭ INSTAGRAM پاراقشاسىنان الىندى

جەلىدە «وردا» توبىنىڭ مۇشەسى ەربولات بەدەلحان گەيلەردى قولدايتىنى تۋرالى مالىمدەمە جاسادى دەگەن قاڭقۋ ءسوز تاراۋدا. جەلى قولدانۋشىلارى Instagram جەلىسىندەگى shyndykz دەپ اتالاتىن پاراقشادا جاريالانعان ەربولات بەدەلحاننىڭ «مالىمدەمەسىن» قىزۋ تالقىلاپ جاتىر.

اتالعان پاراقشا اۆتورى بەلگىسىز سەبەپتەرمەن وسىعان قاتىستى ماتەريال NUR.KZ پورتالىندا جاريالاندى دەگەن جالعان اقپارات تاراتقان. NUR.KZ پورتالى بۇل تۇرعىدا سايتتا ەشقانداي ماتەريال جاريالانباعانىن ەسكەرتەدى.

جالعان اقپاراتتىڭ تاقىرىبىنان باستاپ، ونە-بويىندا قاتەلەردىڭ ءورىپ جۇرگەنىن بايقاۋعا بولادى. بۇل ماسەلەگە قاتىستى ەشقانداي مالىمدەمە جاساماعانىن جانە تارالىپ كەتكەن اقپاراتتىڭ جالعان ەكەنىن ءانشىنىڭ ءوزى دە راستاپ وتىر. ول ءوزىنىڭ جەلىدەگى پاراقشاسىنا: «وتىرىك ەشقاشان جەردە جاتپايدى اعايىن. امال بار ما، كەشىرەمىن! ءسىرا، ءوز قازاعىم»، – دەپ جازدى.

ەربولاتتىڭ مۇنداي مالىمدەمە جاساعانىنا ونىڭ تىڭدارماندارى دا سەنبەي وتىر.

«ەشقانداي دəلەلىڭىز بولماعاسىن وسىنداي نəرسەمەن جالا جاپقىڭىز كەلە مە؟ اعاتاي، سىپسىڭ وسەككە ەرە بەرمەڭىز، ۇيات بولادى. بىرەۋدىڭ سىرتىنان ەركەك باسىڭىزبەن عايبات ايتۋ ۇلكەن كۇنə بولىپ سانالادى»، «ادمين! ەلدى ءبىر-بىرىنە ايداپ سالماي، الدىمەن ساۋاتتى جازىپ ۇيرەن!»، «سەنگەن دە جوقپىن» – دەپ جازدى قولدانۋشىلار.

وسى ورايدا NUR.KZ پورتالىنىڭ ءتىلشىسى ەربولات بەدەلحاننىڭ وزىنەن بۇل جايتقا قاتىستى پىكىرىن سۇراپ، حابارلاستى.

- سوڭعى تارالىپ جاتقان اقپاراتتارعا قاتىستى ءسىزدىڭ پىكىرىڭىزدى بىلەيىك دەپ ەدىك…

- مەن بۇعان قاتىستى ەشقانداي اگرەسسيا بىلدىرگىم كەلمەيدى. كىم دە كىم بولماسىن، مەن ولاردى كەشىرەم. سەبەبى، ول جەكەلەگەن ادامداردىڭ ويى بولۋى مۇمكىن. پاراقشامدا دا ولاردى كەشىرگەنىمدى جازعانمىن. مەن بۇدان 17 جىل بۇرىن جۇمىس ىستەي باستاعاندا، تەك قانا جاستارعا جۇمىس ىستەيتىنىمدى ايتقانمىن. بۇل قيىن با؟ ارينە قيىن. ماتەريالدىق جاعىنان دا، مورالدىق جاعىنان دا. ويىن-ساۋىق يندۋسترياسى دەپ جاتامىز، ول كىمگە كەرەك؟ ۇلكەن كىسىلەرگە كەرەك پە؟ الدە جاستارعا كەرەك پە؟ بۇكىل الەمدىك ويىن-ساۋىق يندۋسترياسى اۋديتورياسى – جاس بالالار.

جاستارعا ۇكىمەت تاراپىنان بولسىن، حالىق تاراپىنان بولسىن، كىم نە ىستەپ جاتىر؟ ال ەندى سونى دامىتۋعا كەلگەن كەزدە، مىنە، وسىنداي كەدەرگىلەر شىعادى الدىڭنان. بۇدان “نەگە ءبىزدىڭ شوۋ-بيزنەس دامىمايدى؟” دەگەن سۇراق تۋىندايدى. شوۋ بيزنەستى دامىتاتىن – جاستار. تەك قانا جاستار. ال، قازىرگى تاڭدا، بىزدىڭ شوۋ-بيزنەس تويعا ارنالعاندىقتان، ءبىز تەك لوكالدىك، ياعني جەرگىلىكتى تۇرعىدا عانا دامىپ جاتىرمىز.

سودان كەلەمىز دە، ءبىز تاڭ قالامىز، نەگە بىزدە ساپاسىز مۋزىكا كوپ،  جاقسى مۋزىكا جوق دەپ. جاستار شارشادىق دەپ ايتادى. ال جاڭاعى وقيعاعا بايلانىستى ايتارىم، مەن ولارعا ەشنارسە دەمەيمىن. ونداي ادامداردىڭ 21-عاسىرعا ساي ەمەس ءومىر ءسۇرۋ سالتىنا بايلانىستى مەن ولاردىڭ پىكىرىنە ەشنارسە ايتا المايمىن. ەگەر مەن ايتاتىن بولسام، وندا مەن اقتالعانداي بولامىن. سوندا مەن گەيلەردى قولداپ وتىرعانداي بولىپ شىعامىن.

- ءسىز قانداي دا ءبىر باق كوزىنە وسىعان قاتىستى پىكىر ايتتىڭىز با؟

- ەشقاشان. مەنىڭ گەيلەرگە ەشقاشان ەشقانداي قاتىسىم بولماعان. ولاردى قولداعان ەمەسپىن. مەن ەشقانداي باق-قا بۇعان قاتىستى مالىمدەمە جاساعان جوقپىن. ەشقاشان. بۇنى مەن اقتالىپ وتىرمىن دەپ تۇسىنبەڭىزدەر، مەن اقتالمايمىن. سەبەبى، مەن اقتالاتىنداي ەشكىمگە ەشنارسە ايتقان دا جوقپىن، جاساعان دا جوقپىن.

ەستەرىڭىزگە سالساق، ەربولات بەدەلحان جاقىندا عانا ءۇشىنشى بالانىڭ اكەسى اتاندى. ونىڭ جارى –  تانىمال ءانشى، بۇرىنعى “داۋىس International” توبىنىڭ مۇشەسى اسىل بەدەلحان. بۇل ءسۇيىنشى حاباردى ەستىگەن جەلى قولدانۋشىلارى ولاردىڭ وتباسىن بۇل قۋانىشپەن قۇتتىقتاپ جاتىر.