Жер комиссиясының бүгінгі отырысынан байқағаным。。。
kerey.kz
Жер комиссиясының бүгінгі отырысынан байқағаным:
1. Рұқсат етілмеген митингінің әсері.
Отызға жуық белсендінің тұтқындалғаны, кейбіріне қылмыстық іс қозғалғаны, шеруге беттегендердің жаппай қамалғаны текке кетпеген. Алдыңғы митингілердің жалғасы, мамырдың 21-індегі оқиға комиссиядағы халықшылдардың позициясын нығайтқан. Бүгінгі жиынның белсендісі Мұқтар Тайжан “мамырдың 21-інде шеруге шығудың қажеті шамалы, мәселені былай да шешуге тырысамыз” дегені есте. Меніңше халықшылдар комиссияда көзірге айналатын оқиғаға шақырмаса да үндемей қалуы керек еді. Саясаттың заңы солай). Арқасы қозып отырған біраз жұрт Мұқтар Тайжан мен тағы да басқа азаматтар әсіре сақ ұстанымдарын жариялаған соң бәсеңсіді. Соның өзінде комиссиядағы халықшылдар соңғы митингінің ықпалын сезді деп ойлаймын.
Билікті төңкермек болды, пәлен-түген дегенді ішкі істер министрінің өкілі осы жиында тағы қайталады. Мұқтар Тайжан дереу сұрақ қойып еді, өзіңе былай шығып жауап берейін деп жалтарды. Халықшылдар осы мүмкіндікті пайдаланып, мамырдың 21-індегі оқиғаны жақсылап талқыға сала алмады. Тақырыптан ауытқымау үшін митингілер мәселесі мен оған Бас прокуратура берген бағаны комиссия отырысының күн тәртібіне жеке енгізуі керек. 1986 жылғы Желтоқсан оқиғасынан кейін қазақ ұлтшылдығы туралы Мәскеудегі орталық комитет арнайы қаулы алып, кейін оны арнайы комиссияның күшімен зорға жойғызған. Сол комиссияның басы-қасында жүрген Мұқтар Шаханов отыр ғой комиссияда. Бас прокуратура өз құзыретінен асып, 21 мамырдағы митингке заңи баға емес, тарихта қалатын саяси қаулы шығарды. Сондықтан комиссия бұл мәселені әлі де болса жеке қарауы тиіс. Содан соң, комиссия құрылған кезде мүшелердің қатарында аталған Макс Боқаев пен бір отырыстан кейін шығып кеткен Мақсат Нұрыпбаев комиссияға қайта қосылуы керек. Жігіттерге абақтыда біраз тың ой келген болар.
2. Сәтсіз реформаны мойындау.
Меніңше, бүгінгі отырыста Қазақстанның ауыл шаруашылығы реформасының сәтсіз болғаны алғаш рет жоғары комиссия деңгейінде мойындалды. “Жеңіл мәшине шығарып несіне тыраштандық, неге соқа шығармадық, сол ақшаны ауыл шаруашылығына неге құймадық” деген Айтаханов пен Косаревтердің сөзі болар іс болып кеткеннен кейін “к-тімізге неге қарамадық” дегенді еске түсірді. Автомобиль жасаумен шұғылданып жүрген топ-менеджерлердің «Қазақстан мәшине шығаруды он жылға кеш бастады, ендігісі бос әуре, ақша жеуден өзге түк емес» дегенін өз құлағымен естіген, кезінде дәуірлеген, бүгінде тұралаған ауылда өскен біз сияқтыларға мұндай мойындау өте ауыр естіледі екен. Жиырма бес жыл жазықсыз түрмеде отырып, енді ақталғандай сезімде болдым). Басқа да билікшіл бірнеше спикер “өзіміз де жерді ұқсатар едік” дегенді іліп әкетті. Яғни, өкімет ақшаны рәсуа қылмағанда жер сатамыз ба, жоқ па деп отырмас едік дегенді анық аңғартты. Меніңше бұл, президент Назарбаевтың ауыл шаруашылығына жасаған реформасына өзі құрған комиссияның амалсыздан берген алғашқы ашық бағасы, мойындауы. Енді ауылдан тек кешірім сұрау қалды))
Жалпы бүгінгі отырыста әншейінде шеңберден шыға алмайтын біраз спикерлердің екі ойлы боп, былқылдап қалғанын байқадым. Қанша дегенмен отырыс тікелей эфирден кетіп жатыр дегендей. Елге қарауға да бет керек. Айтпақшы, Азаттықтан өзгелер неге тіке таратпайды осыны, комиссия әмериканыкі емес еді ғой?)).
3. Парламент.
Әншейінде оппозиция мен қоғам белсенділерімен сөйлеспейтін билік Жер комиссиясын құру арқылы өзі құрған парламенттің де түкке тұрмайтынын мойындады. Бүгінгі отырыс – дайын парламент қой. Парламентте жер үшін қып-қызыл айтыс, талас-тартыс, тіпті төбелес болуы керек еді. Депутаттары төбелесетін елдер қырылып қалған жоқ)). Меніңше билік тым болмаса осы Жер комиссиясындағы «халықшылдар» секілді конструктивті саясаткерлер мен белсенділерді парламентке әлі де болса кіргізуі керек. Көрініп тұр, Макс Боқаевтан өзге радикалдары жоқ)). Бұл енді басқа әңгіме, бітпейтін жыр.
Ең бастысы Жер комиссиясындағы халықшылдар «НұрОтанның» дөкейлерімен жиын үстінде, тікелей эфирде тіке сөйлесіп, қаржасып, шайнасса дейміз. Билік дегеніміз – күш. Күшті күштіні ғана сыйлайды. Мұқтар Тайжан сөйлеп отырып, министрлерге қарап «солай ма?» дегенде залда біртүрлі ыңғайсыздық пайда болатынын байқадым. Ешкім бұлай наглый сөйлемеген ғой оларға)).
Асылхан Мамашұлының facebook парақшасынан алынды
Пікір қалдыру