Шетелдік барлаушылар Қазақстан туралы барлық ақпаратты орталыққа жіберіп отырған. Онда қазақтардың қандай тамақ жеп, қандай іспен шұғылданатыны толықтай айтылған.

“Мықты, қаһарлы, сақалды қазақтардың келбеті бірден көзге түседі. Олар моңғолоидтық бет-әлпетке ие, бойлары қысқа, толық келген. Терісі қоңырқай, шаштары қара әрі тік, денелерін түк басқан”, – деп америкалықтар қазақтарды сипаттаған.

Тыңшыларды қазақтардың бет-әлпетінен бөлек, әдет-ғұрыптары да қызықтырған.

“Қазақтар жабайы бола тұра қарапайым, сыпайы, қонақжай, қолы ашық адамдар”, – делінген құжатта.

Барлаушылар қазақтардың тағамына да тоқталып өткен.

“Қазақ тайпаларының күнделікті ас-ауқаты келесідегідей: 50% сүт, 40 % ет, 10 % астық. Олар мүлде көкөністерді қолданбайды. Қазақтар етті жақсы жейді, оны қуырып жегенді ұнатады. Жылқы етінен жасалған шұжық – олардың басты тағамы. Кедей адамдар сүт пен ірімшік жейді. Олардың, тіпті қой етін жеуге мүмкіндігі жоқ”, – дейді америкалықтар.

Қазақтар – өте мықты, әрі төзімді көшпенділер

“Қазақтар күн сайын сүтпен шай ішіп, көп қымыз ішеді. Қымыз оларда шараптың орнында, ондағы алкоголь үлесі екі-үш пайызды құрайды. Қазақтар – өте мықты, әрі төзімді көшпенділер. Дегенмен арасында жалқаулықтары басым адамдар да болып жатады. Олар қой, сиыр, жылқы, түйе бағады, одан басқаға көбіне икемі жоқ», - деп жалғастырды тыңшылар.

Жолаушыларды өлтіріп, тонап кетеді

“Олардың кейбірі қыста үлкен жолға шығып, қарақшыға айналады. Жолаушыларды өлтіріп, тонап кетеді. Кей кездері жабайы аңдарды аулап, терісін сатады”, – делінген құжатта.

“Қазақтар шабандоздықты өте шебер меңгерген – балалары бес-алты жасынан аттың құлағында ойнайды. Ал он жасар балалар жылқының сырқатын бірден анықтай алады. Олар жылқының үстінен түспей жердегі затты оңай көтереді”, – деп таңданыстарын жасырмады барлаушылар.

ҚазАқпарат мәліметіне сәйкес, АҚШ Орталық барлау басқармасы (ОББ) 1995 жылы Билл Клинтонның президенттік жарлығымен құпиялылығын жоғалтқан 775 мың құжатты (13 млн. беттен тұрады) жария етті.