شەتەلدىك بارلاۋشىلار قازاقستان تۋرالى بارلىق اقپاراتتى ورتالىققا جىبەرىپ وتىرعان. وندا قازاقتاردىڭ قانداي تاماق جەپ، قانداي ىسپەن شۇعىلداناتىنى تولىقتاي ايتىلعان.

“مىقتى، قاھارلى، ساقالدى قازاقتاردىڭ كەلبەتى بىردەن كوزگە تۇسەدى. ولار موڭعولويدتىق بەت-الپەتكە يە، بويلارى قىسقا، تولىق كەلگەن. تەرىسى قوڭىرقاي، شاشتارى قارا ءارى تىك، دەنەلەرىن تۇك باسقان”، – دەپ امەريكالىقتار قازاقتاردى سيپاتتاعان.

تىڭشىلاردى قازاقتاردىڭ بەت-الپەتىنەن بولەك، ادەت-عۇرىپتارى دا قىزىقتىرعان.

“قازاقتار جابايى بولا تۇرا قاراپايىم، سىپايى، قوناقجاي، قولى اشىق ادامدار”، – دەلىنگەن قۇجاتتا.

بارلاۋشىلار قازاقتاردىڭ تاعامىنا دا توقتالىپ وتكەن.

“قازاق تايپالارىنىڭ كۇندەلىكتى اس-اۋقاتى كەلەسىدەگىدەي: 50% ءسۇت، 40 % ەت، 10 % استىق. ولار مۇلدە كوكونىستەردى قولدانبايدى. قازاقتار ەتتى جاقسى جەيدى، ونى قۋىرىپ جەگەندى ۇناتادى. جىلقى ەتىنەن جاسالعان شۇجىق – ولاردىڭ باستى تاعامى. كەدەي ادامدار ءسۇت پەن ىرىمشىك جەيدى. ولاردىڭ، ءتىپتى قوي ەتىن جەۋگە مۇمكىندىگى جوق”، – دەيدى امەريكالىقتار.

قازاقتار – وتە مىقتى، ءارى ءتوزىمدى كوشپەندىلەر

“قازاقتار كۇن سايىن سۇتپەن شاي ءىشىپ، كوپ قىمىز ىشەدى. قىمىز ولاردا شاراپتىڭ ورنىندا، ونداعى الكوگول ۇلەسى ەكى-ءۇش پايىزدى قۇرايدى. قازاقتار – وتە مىقتى، ءارى ءتوزىمدى كوشپەندىلەر. دەگەنمەن اراسىندا جالقاۋلىقتارى باسىم ادامدار دا بولىپ جاتادى. ولار قوي، سيىر، جىلقى، تۇيە باعادى، ودان باسقاعا كوبىنە يكەمى جوق»، - دەپ جالعاستىردى تىڭشىلار.

جولاۋشىلاردى ءولتىرىپ، توناپ كەتەدى

“ولاردىڭ كەيبىرى قىستا ۇلكەن جولعا شىعىپ، قاراقشىعا اينالادى. جولاۋشىلاردى ءولتىرىپ، توناپ كەتەدى. كەي كەزدەرى جابايى اڭداردى اۋلاپ، تەرىسىن ساتادى”، – دەلىنگەن قۇجاتتا.

“قازاقتار شاباندوزدىقتى وتە شەبەر مەڭگەرگەن – بالالارى بەس-التى جاسىنان اتتىڭ قۇلاعىندا وينايدى. ال ون جاسار بالالار جىلقىنىڭ سىرقاتىن بىردەن انىقتاي الادى. ولار جىلقىنىڭ ۇستىنەن تۇسپەي جەردەگى زاتتى وڭاي كوتەرەدى”، – دەپ تاڭدانىستارىن جاسىرمادى بارلاۋشىلار.

قازاقپارات مالىمەتىنە سايكەس، اقش ورتالىق بارلاۋ باسقارماسى (وبب) 1995 جىلى بيلل كلينتوننىڭ پرەزيدەنتتىك جارلىعىمەن قۇپيالىلىعىن جوعالتقان 775 مىڭ قۇجاتتى (13 ملن. بەتتەن تۇرادى) جاريا ەتتى.