ФОТО: NUR.KZ
Қытайдан келген 3-ші дəрежелі қызметкерлерін ұстап, қазақстандық жұмысшыларды қысқартқан Чжан Цзюнь жауап бере алмай састы. Бүгін Ақтөбе облысының əкімі Бердібек Сапарбаев “Ұлы Қабырға” мұнай компаниясының бас директоры Чжан Цзюнь жасаған жұмыс есебін тыңдауға барды. Өткен жылы құрдымға кеткелі тұрғандығы айтылған компания тағы бір жыл ішінде ештеңе жасамаған болып шықты.
Əкім еш жұмыс жасамай, қызметкерлерін қаңғытып жіберген компания басшысын сынға алды.
“Жұмысты жақсарту, жұмысшылар жалақысын көтеруге қатысты келісімшартқа отырдық. Келісімдегі 10 бөлімнің 6-уы орындалмаған. Компания басшысына бірнеше рет ескерту жасалынды. Өткен жылғы шығын 1 миллиардтан асқан. Шығындарды талдау керек. Келісім-шартты орындамаса, онда мойнына неге алады? Үш жақты келісімнің 60 пайызы орындалмаған. Бізде “дағдарыс” деген жақсы сылтау бар. Дағдарыс тек сіздерге келді ме? Қалған мекемелер жолын тауып жатыр. Бұрғылау жұмысына қарап отыруға болмайды.
ФОТО: NUR.KZ
Егер бұл компания осындай қиындықтар туғызатын болса, бізге керек емес. Ақтөбе бұл компаниясыз құлап қалмайды. Экономикалық жағдайын жақсартпаса, жабу керек. Біз жылда осы компаниядан қысқарған адамдарды жұмыспен қамтамасыз етіп отырмыз. Компания жұмысшы жағдайын жақсартпаса, бізге керек емес”, – деді облыс əкімі.
Облыс əкімі нақты сұрақтарға жауап бере алмай сасқалақтап, күмілжіп қалған қытай компаниясының басшысына ескерту жасады. Компанияда жұмысшыларды қысқарту екі есеге азайған. Мыңдаған қазақстандық мұнайшылар қысқартуға ұшырап жатқанда, компанияда үшінші дəрежелі қытайлар əлі жұмыс жасап жүрген болып шықты.
“Қазақстандық жұмысшылар қысқартылып жатқанда, неге шетелден үшінші, төртінші дəрежелі жұмысшылар əкелінеді? Мұны қою керек. Егер Ақтөбеде жұмыс жасағыларың келсе, жұмысшыларды қысқартуды қойыңыздар”, – деді облыс басшысы.
Мұнай компаниясының басшысы да, экономикалық жағдайына жауап беретін мамандары да əкім қойған сұрақтарға нақты жауап бере алмай бастарын қасып, күмілжіп қалды.
ФОТО: NUR.KZ
“Жұмысшылар жалақысы 7 пайызға төмендеген, əлеуметтік төлемақы азайған. Өткен жылдың 12 айында 6 рет осы компания мəселесі қаралған. Компания басшысының жұмысында еш нəтиже жоқ.
“Жұмысшыларды қысқарту тоқтатылсын” деген талабымыз да орындалмай отыр. Соңғы екі жылда жұмысшылар саны екі есеге қысқартылған. Бұлай болмайды”, – деді Сапарбаев.
Естеріңізге салсақ, “Ұлы Қабырға” мұнай компаниясының басшысы өткен жылы Бердібек Сапарбаевтан қазақ тілінде аудармашы ұстамағаны үшін сөз естіген болатын.
Бүгінгі жиында қытай компаниясының басшысы сөз алдында баяндамасын орыс жəне қазақ тілінде жасай алатынын айтты.
“Қазақша сөйлейін деп тұрсыз ба?”, – деген Бердібек Сапарбаев таңданысын жасыра алған жоқ. Чжан Цзюнь екі тілде де аудармашы дайындап қойғанын айтып, қызметкерлерінің алдында күлкіге қалды.
NUR.KZ
Пікір қалдыру