Tanımal änşi Vitas qazaq tilinde mälimdeme jasadı, – dep habarlaydı Tengrinews.kz tilşisi.

Öziniñ Instagram jelisindegi paraqşasında änşi qazaqtildi auditoriyağa arnalğan post jazdı. Ayta keteyik, mälimdemeniñ qateleri bar, biraq qazaq tilin tüsinetin adam Resey änşisiniñ ne aytqısı kelgenin birden añğaradı.

Soñğı bes kün boyı, Men kün Qazaqstannan dostarı köp qarañız! Men osı şuaqtı elge süyemin! Sizdi, Qazaqstannan, qımbattı dostar köruge quanıştı!

Ğalamtordağı translate.google.com saytınıñ audarması boyınşa, tura osı söylemder orıs tiline bılay audarıladı eken: Za poslednie pyat' dney, ya viju mnogo druzey iz Kazahstana! YA lyublyu etu solneçnuyu stranu! Vı, Kazahstan, dorogie druz'ya, radı videt' Vas!

Eske salayıq, birneşe kün bwrın reseylik änşi Vitas resmi türde mälimdeme jasağan bolatın. “Qımbattı dostar! Resmi mälimdeymin: soñğı tört künde meniñ tarapıma äleumettik jelilerde jağımsız pikirler tım köp aytıla bastadı. Men kez kelgen şığarmaşılıqqa, ärbir şığarmaşılıq adamğ qwrmetpen qaraytınımdı aytqım keledi. Sot organdarına jüginuge nemese saraptama jasauğa, bötenniñ mülkine talasuğa, basqa ärtisterdiñ şığarmaşılıq ömirine ya önerine aralasuğa beyim adam emespin. Eşqaşan bwlay jasamaymın da”, – dep jazdı Vitas.

Sonımen qatar, ol kez kelgen ärtistiñ aynalasındağı qwqıqtar qayşılığı jaylı mäseleniñ belgili bir eldiñ müddesin qorğaytın prodyuserdiñ jäne kompaniyanıñ qwzıreti ekenin aytıp otır.

“Zañ boyınşa daular bolğan da, boladı da jäne tanımal orındauşılarğa qatıstı mwnday mäselelerdiñ şığuı- qalıptı jağday, biraq bwl jağımsız pikirge, qaqtığısqa, äsirese qorlauğa sebep bolmauı kerek”, – dep jazdı Vitas paraqşasında.

Ayta keteyik, reseylik änşi bwl jazbasında eşkimniñ atı-jönin atamağandıqtan, naqtı qanday oqiğa jaylı aytıp otırğanı anıq emes. Alayda, osınıñ aldında onıñ prodyuseri Sergey Pudovkin qazaqstandıq änşi Dimaş Qwdaybergenovtiñ Qıtaydağı I am a Singer jobasında Vitastıñ “Opera №2″ änin rwqsatsız orındağanına narazılıq bildirgen bolatın. Al mwnıñ aldında Qıtaydağı advokattar kontorasına avtorlıq qwqıq isi boyınşa şağım tüsirilgen de bolatın.

Jaqında avtorlıq qwqıqtar jönindegi sarapşı Temirlan Tölegenov Vitastıñ “Opera №2″ kompoziciyasın orındağan Dimaş Qwdaybergenovke şağım ayta almaytını jaylı aytqan edi. Mamannıñ aytuınşa, Vitas öz änderiniñ bayqaularda orındaluına tıyım sala almaydı. Sonday-aq, Tölegenovtiñ aytuınşa, avtorlıq qwqıqtı qorğau turalı şağımdar ädette sotqa jete bermeydi.

Sonday-aq, osığan deyin Laki Kesoglu Vitas pen Dimaş Qwdaybergenovtiñ “Opera №2″ änin orındauın salıstırğan bolatın. Halqı ärtisi Dimaştıñ dausı muzıka tilinde qalay atalatının ayttı. “Dimaştıñ dausı sirek. Onıñ dauıs türi tenor al'tino nemese kontrtenor dep ataladı. Ol klassika janrında dami aladı. Biraq ol mwnı qalamaydı. Älemde kontrtenorlar sausaqpen sanarlıq. Olar tanımal emes, biraq bar”, – degen edi Laki Kesoglu.

Eske sala keteyik, Dimaş Qwdaybergenov 28 qañtarda Qıtayda ötip jatqan I Am a Singer muzıkalıq konkursınıñ ekinşi kezeñinde de jeñimpaz atanğan bolatın. Änşi reseylik ataqtı Vitastıñ “Opera 2″ attı tuındısın orındağan edi. Videonı mına jerden köruge boladı.

Al teleşoudıñ birinşi kezeñinde änşi SOS d’un terrien en détresse änin francuz tilinde orındap, jeñimpaz atanğan bolatın. Ayta keteyik, Dimaş Qwdaybergenov qatısıp jatqan konkursta 14 kezeñ bar. Konkurs Qıtaydıñ Çanşa qalasında ötip jatır.                        Kaz.tengrinews.kz