تانىمال ءانشى ۆيتاس قازاق تىلىندە مالىمدەمە جاسادى، – دەپ حابارلايدى Tengrinews.kz تىلشىسى.

ءوزىنىڭ Instagram جەلىسىندەگى پاراقشاسىندا ءانشى قازاقتىلدى اۋديتورياعا ارنالعان پوست جازدى. ايتا كەتەيىك، مالىمدەمەنىڭ قاتەلەرى بار، بىراق قازاق ءتىلىن تۇسىنەتىن ادام رەسەي ءانشىسىنىڭ نە ايتقىسى كەلگەنىن بىردەن اڭعارادى.

سوڭعى بەس كۇن بويى، مەن كۇن قازاقستاننان دوستارى كوپ قاراڭىز! مەن وسى شۋاقتى ەلگە سۇيەمىن! ءسىزدى، قازاقستاننان، قىمباتتى دوستار كورۋگە قۋانىشتى!

عالامتورداعى translate.google.com سايتىنىڭ اۋدارماسى بويىنشا، تۋرا وسى سويلەمدەر ورىس تىلىنە بىلاي اۋدارىلادى ەكەن: زا پوسلەدنيە پيات دنەي، يا ۆيجۋ منوگو درۋزەي يز كازاحستانا! يا ليۋبليۋ ەتۋ سولنەچنۋيۋ سترانۋ! ۆى، كازاحستان، دوروگيە درۋزيا، رادى ۆيدەت ۆاس!

ەسكە سالايىق، بىرنەشە كۇن بۇرىن رەسەيلىك ءانشى ۆيتاس رەسمي تۇردە مالىمدەمە جاساعان بولاتىن. “قىمباتتى دوستار! رەسمي مالىمدەيمىن: سوڭعى ءتورت كۇندە مەنىڭ تاراپىما الەۋمەتتىك جەلىلەردە جاعىمسىز پىكىرلەر تىم كوپ ايتىلا باستادى. مەن كەز كەلگەن شىعارماشىلىققا، ءاربىر شىعارماشىلىق ادامع قۇرمەتپەن قارايتىنىمدى ايتقىم كەلەدى. سوت ورگاندارىنا جۇگىنۋگە نەمەسە ساراپتاما جاساۋعا، بوتەننىڭ مۇلكىنە تالاسۋعا، باسقا ارتىستەردىڭ شىعارماشىلىق ومىرىنە يا ونەرىنە ارالاسۋعا بەيىم ادام ەمەسپىن. ەشقاشان بۇلاي جاسامايمىن دا”، – دەپ جازدى ۆيتاس.

سونىمەن قاتار، ول كەز كەلگەن ءارتىستىڭ اينالاسىنداعى قۇقىقتار قايشىلىعى جايلى ماسەلەنىڭ بەلگىلى ءبىر ەلدىڭ مۇددەسىن قورعايتىن پروديۋسەردىڭ جانە كومپانيانىڭ قۇزىرەتى ەكەنىن ايتىپ وتىر.

“زاڭ بويىنشا داۋلار بولعان دا، بولادى دا جانە تانىمال ورىنداۋشىلارعا قاتىستى مۇنداي ماسەلەلەردىڭ شىعۋى- قالىپتى جاعداي، بىراق بۇل جاعىمسىز پىكىرگە، قاقتىعىسقا، اسىرەسە قورلاۋعا سەبەپ بولماۋى كەرەك”، – دەپ جازدى ۆيتاس پاراقشاسىندا.

ايتا كەتەيىك، رەسەيلىك ءانشى بۇل جازباسىندا ەشكىمنىڭ اتى-ءجونىن اتاماعاندىقتان، ناقتى قانداي وقيعا جايلى ايتىپ وتىرعانى انىق ەمەس. الايدا، وسىنىڭ الدىندا ونىڭ پروديۋسەرى سەرگەي پۋدوۆكين قازاقستاندىق ءانشى ديماش قۇدايبەرگەنوۆتىڭ قىتايداعى I am a Singer جوباسىندا ۆيتاستىڭ “وپەرا №2″ ءانىن رۇقساتسىز ورىنداعانىنا نارازىلىق بىلدىرگەن بولاتىن. ال مۇنىڭ الدىندا قىتايداعى ادۆوكاتتار كونتوراسىنا اۆتورلىق قۇقىق ءىسى بويىنشا شاعىم تۇسىرىلگەن دە بولاتىن.

جاقىندا اۆتورلىق قۇقىقتار جونىندەگى ساراپشى تەمىرلان تولەگەنوۆ ۆيتاستىڭ “وپەرا №2″ كومپوزيتسياسىن ورىنداعان ديماش قۇدايبەرگەنوۆكە شاعىم ايتا المايتىنى جايلى ايتقان ەدى. ماماننىڭ ايتۋىنشا، ۆيتاس ءوز اندەرىنىڭ بايقاۋلاردا ورىندالۋىنا تىيىم سالا المايدى. سونداي-اق، تولەگەنوۆتىڭ ايتۋىنشا، اۆتورلىق قۇقىقتى قورعاۋ تۋرالى شاعىمدار ادەتتە سوتقا جەتە بەرمەيدى.

سونداي-اق، وسىعان دەيىن لاكي كەسوگلۋ ۆيتاس پەن ديماش قۇدايبەرگەنوۆتىڭ “وپەرا №2″ ءانىن ورىنداۋىن سالىستىرعان بولاتىن. حالقى ءارتىسى ديماشتىڭ داۋسى مۋزىكا تىلىندە قالاي اتالاتىنىن ايتتى. “ديماشتىڭ داۋسى سيرەك. ونىڭ داۋىس ءتۇرى تەنور التينو نەمەسە كونترتەنور دەپ اتالادى. ول كلاسسيكا جانرىندا دامي الادى. بىراق ول مۇنى قالامايدى. الەمدە كونترتەنورلار ساۋساقپەن سانارلىق. ولار تانىمال ەمەس، بىراق بار”، – دەگەن ەدى لاكي كەسوگلۋ.

ەسكە سالا كەتەيىك، ديماش قۇدايبەرگەنوۆ 28 قاڭتاردا قىتايدا ءوتىپ جاتقان I Am a Singer مۋزىكالىق كونكۋرسىنىڭ ەكىنشى كەزەڭىندە دە جەڭىمپاز اتانعان بولاتىن. انشى رەسەيلىك اتاقتى ۆيتاستىڭ “وپەرا 2″ اتتى تۋىندىسىن ورىنداعان ەدى. ۆيدەونى مىنا جەردەن كورۋگە بولادى.

ال تەلەشوۋدىڭ ءبىرىنشى كەزەڭىندە ءانشى SOS d’un terrien en détresse ءانىن فرانتسۋز تىلىندە ورىنداپ، جەڭىمپاز اتانعان بولاتىن. ايتا كەتەيىك، ديماش قۇدايبەرگەنوۆ قاتىسىپ جاتقان كونكۋرستا 14 كەزەڭ بار. كونكۋرس قىتايدىڭ چانشا قالاسىندا ءوتىپ جاتىر.                        Kaz.tengrinews.kz