Qazaqstan Senatınıñ törağası Qasım-Jomart Toqaev wlıbritaniyalıq VVS telearnasınıñ Hard Talk bağdarlamasına swhbat berip, Nazarbaevtıñ biligi jäne eldegi jemqorlıqpen küres turalı ayttı. Swhbat 20 mausımda VVS News telearnasına jäne BBC radiosına şıqtı.

“Nazarbaevtıñ bilikte wzaq otıruı – twraqtılıqtıñ belgisi. 2020 jılğa deyin bilikte boladı. Keyin saylauğa tüsem dese özine baylanıstı” dedi Toqaev swhbatında.

Osı sätte habar jürgizuşisi Stiven Sakur “Eger meniñ matematikalıq esebim dwrıs bolsa, 2020 jılı Nazarbaev 80 jasqa toladı ğoy?” dep swradı.

Bwl swraqqa Toqaev “Iä, Iä. Malayziyada 92 jasqa tolğan Mahathir Mohamad prem'er-ministr boldı ğoy. Aşığın aytqanda, 2020 jılı Nazarbaev prezident saylauına tüsedi dep oylamaymın. Ol öte aqıldı adam. Mümkin 2020 jılğı saylau basqa kandidattarmen öter. Saylauğa tüsedi dep oylamaymın. Bwl – meniñ jeke oyım. Ärine bäri Nazarbaevtıñ özine baylanıstı” dep jauap qattı.

Hard Talk jürgizuşisi Toqaevtan “Siz Qazaqstan biligindegi ekinşi adamsız. 2020 jılğı saylauğa tüsesiz be?” dep swradı.

Toqaev bwl swraqqa “Olay aytpas edim. Bäri jağdayğa baylanıstı. Nazarbaev bilikten ketse de Qazaqstandağı işki jäne sırtqı sayasatqa ıqpalı boladı. Bizde kelesi saylauğa deyin uaqıt bar. Bastısı Qazaqstanğa qazirgidey twraqtılıq kerek” dep jauap berdi.

Habar jürgizuşisi Stiven Sakurdıñ Qazaqstandağı jemqorlıq turalı swrağına Toqaev:

“Adamdar jemqorlıqqa qatıstı köp sın aytadı. Biraq Qazaqstan korrupciyamen küreste basqalarğa ülgi boladı. Qazir 400-ge juıq memlekettik qızmetker korrupciya ayıbımen sottaldı. Aytıñızşı qay elde, onıñ işinde possovettik elderdiñ qaysında osınşama şeneunik korrupciyamen jauapqa tartıldı? Jüyeni kez kelgen adam sınay aladı. Biraq korrupciyamen küresu jüyemiz jaqsı jwmıs istep jatır” dep jauap bere kele “Qazaqstanda biliktiñ mañında, Nazarbaevtıñ mañında oligarh joq. Oligarh degen kim? Oligarh degen – bilikke, prezidentke jaqın bolıp, prezident ornına şeşim qabıldağısı keletin adam. Bizde onday adamdar joq” dedi.

Osı twsta VVS jurnalisi Stiven Sakur Toqaevtan Nazarbaev otbasınıñ baylığı turalı dep swradı. Ol swraqqa Toqaev “Bwl – şındıq emes. Bwl – spekulyaciya. Ärine keybiriniñ jağdayı jaqsı. Sebebi olar öte bilimdi, şetelde, sonıñ işinde Wlıbritaniyada oqığan” dep jauap berdi.

Toqaev swhbat kezinde “Qazaqstannıñ demokratiyalıq tañdauı” partiya emes, zañsız qwrılğan wyım” dedi.

Biıl 13 naurızda Astananıñ Esil audandıq sotı tirkelmegen QDT-nı ekstremistik wyım dep tanıp, el aumağında jwmıs isteuine tıyım salğan. QDT-nı bwrınğı bankir, 2009 jıldan beri şetelde twratın Mwhtar Äblyazov qwrğan.

Azat Europa / Azattıq radiosı