Ädebi älem

Tör Altay qarımdı qalamgerimen qoştastı

kerey.kz

 |  May 27, 2015

 Bükil sanalı ğwmırın şığarmaşılıqqa arnağan qarımdı qalamger Didahmet Äşimhanwlınıñ ömiri 65 jasında üzilip, mäyiti Almatıdan tuğan topırağı Tör Altayğa äkelinip, jer besikke berildi.

Almatı men Astanadan, tağı basqa öñirlerden kelgen marqwmnıñ jaqın dostarı, qalamdastarı, et jaqın tuıstarı, audan jwrtşılığı qatısqan qaralı jiındı jürgizgen jazuşı Älibek Qañtarbaevtıñ sözimen aytqanda, qazaqtıñ söz öneri alamanına kileñ bir süleylerin qosqan Katonqarağay halqı tağı bir asıl wlınan, jırşısınan ayırıldı. Oralhan Bökeydi eluine jetkizbey ayaqtan şalğan swm ajal biraz entigin basqanday bolıp edi, endi kelip Altaydıñ alıp bäyterekterin swlata bastadı. Qalihan Isqaqtay öner sañlağınıñ ömirden ozğanı keşe ğana edi, mine, bügin Didahmet sındı arda wlımızdı, arısımızdı aramızdan alıp ketti. Tör Altay Alatauğa Qal­ağañdı da, Oralhandı da, Didahmetti de keudeleri armanğa, jürekteri jalınğa tolı küylerinde attandırğan edi, endi, mine, elge qwrış tabıtpen oraltıp jatır. Bwdan asqan qasiret bar ma?..

Az jazsa da, saz jazatın, qalamdastarınıñ arasında jiırmasınşı ğasırdıñ Beyimbet Maylini dep moyındalğan, adamdıqtan aspağan, aramdıqqa baspağan Didahmet Äşimhanwlın soñğı saparğa şığarıp saluğa arnalğan jiında söz alğan oblıs äkiminiñ orınbasarı Nwrımbet Saqtağanov Şığıstıñ şamşırağı bolğan qalamgerdiñ qazası bükil elimizdiñ, altı alaştıñ qayğısı ekendigin bildire kele, marqwmnıñ otbasına, tuğan­tuısqandarına, bükil audan jwrtına köñil aytıp, aymaq basşısı Danial AHMETOV pen Prem'er­ministrdiñ orınbasarı Berdibek SAPARBAEVTIÑ qayğığa ortaqtasqan sälemderin jetkizdi. Didahmet Äşimhanwlınıñ dosı, «Jwldız» jurnalınıñ bas redaktorı, Memlekettik sıylıqtıñ iegeri Wlıqbek Esdäulet ekeuiniñ birge bastalğan studenttik kezderi, Didahmettiñ darındılığı, şığarmaşılıqqa, dostıqqa degen adaldığı men tazalığı, jazuşılar arasındağı bedeli jöninde aytıp, qalamger qazasına oray jazğan jırın oqıdı.

Jazuşı jerlesimiz, Memlekettik sıylıqtıñ iegeri Älibek Asqarovtıñ sözi de qalıñ jwrtşılıqtı tolqıtıp, közge jas aldırdı. Sıñarınan ayırılğan aqqudıñ küyin keşip twrıp, ol talanttı jazuşı­publicist Didahmet dosınıñ ekinşi ömiriniñ osı sağattan bastalğanın, onıñ oqırmanı, halqı barda ölmeytinin aytıp, jerlesterin ruhtandırıp, Qıtaydağı qandastarımız ben Türkiyadağı dostarınan, Prezident Äkimşiliginiñ basşısı Nwrlan Nığmatullin men «Nwr Otan» partiyası Törağasınıñ birinşi orınbasarı Bauırjan Baybekten kelgen köñil aytulardı jetkizdi, körnekti memleket qayratkeri Mwhtar Qwl­Mwhammedtiñ jedelhatın oqıp berdi. Katonqarağay audanınıñ äkimi Qalihan Bayğonısov Didahmet Äşimhanwlınıñ keremet jazuşılığın, onıñ azamattığın, audannıñ maqtanışı ekendigin tilge tiek etip, marqwmnıñ otbasınıñ, tuğan­tuısqandarınıñ qayğısımen bölisti, onıñ jarqın beynesi halqımızdıñ jüreginde mäñgi saqtaladı dep sözin qorıtındıladı. Körnekti jazuşı Didahmet Äşimhanwlın jerlegen soñ, qwran­qatım bağıştaldı.

Jänibek Qızır Katonqarağay audanı.

Wlıqbek Esdäulet,

Memlekettik sıylıqtıñ iegeri

Qarağay

(Didahmet Äşimhanwlına)

Altay tauı añırasa aspan jwtıp dauısın,

Küñgir­küñgir tas qwlasa küñirentip tau işin.

Tal besik pen jer besiktiñ arasında samğağan

Tau qoynına tabıstadıq altı alaştıñ arısın.

Jırşısınan ayırılğan Aq Qabanıñ tolqını,

Jartastı wrıp bıt­şıt boldı köbik şaşıp sol küni.

Qayğıdan qars ayrılmağan qayran jürek­jürek pe,

Mäñgilikke meken bolsa tuğan taudıñ qoltığı.

Ne bar eken bizdiñ ölmes sağınıştı basarday?

Tarih? Uaqıt?

Qoysa netti şaş al dese – bas almay?

Qazağımnıñ auır jügin arqalağan Tolağay,

Qapiyada sürindiñ be, soñğı belden asa almay?

Jer añsağan sarı atanday aldı­artıña qaramay,

Asu asıp kete bardıñ öz ölkeñdi aralay.

Tuğan jerge twlğa bolıp, eñse bolıp twrarsıñ,

Altayıñnıñ ormanına qayta oralğan qarağay…

25 mamır, 2015 jıl

Almatı – Katonqarağay.

Didar gazeti