ءتور التاي قارىمدى قالامگەرىمەن قوشتاستى
kerey.kz
بۇكىل سانالى عۇمىرىن شىعارماشىلىققا ارناعان قارىمدى قالامگەر ديداحمەت ءاشىمحانۇلىنىڭ ءومىرى 65 جاسىندا ءۇزىلىپ، ءمايىتى الماتىدان تۋعان توپىراعى ءتور التايعا اكەلىنىپ، جەر بەسىككە بەرىلدى.
الماتى مەن استانادان، تاعى باسقا وڭىرلەردەن كەلگەن مارقۇمنىڭ جاقىن دوستارى، قالامداستارى، ەت جاقىن تۋىستارى، اۋدان جۇرتشىلىعى قاتىسقان قارالى جيىندى جۇرگىزگەن جازۋشى الىبەك قاڭتارباەۆتىڭ سوزىمەن ايتقاندا، قازاقتىڭ ءسوز ونەرى الامانىنا كىلەڭ ءبىر سۇلەيلەرىن قوسقان كاتونقاراعاي حالقى تاعى ءبىر اسىل ۇلىنان، جىرشىسىنان ايىرىلدى. ورالحان بوكەيدى ەلۋىنە جەتكىزبەي اياقتان شالعان سۇم اجال ءبىراز ەنتىگىن باسقانداي بولىپ ەدى، ەندى كەلىپ التايدىڭ الىپ بايتەرەكتەرىن سۇلاتا باستادى. قاليحان ىسقاقتاي ونەر ساڭلاعىنىڭ ومىردەن وزعانى كەشە عانا ەدى، مىنە، بۇگىن ديداحمەت سىندى اردا ۇلىمىزدى، ارىسىمىزدى ارامىزدان الىپ كەتتى. ءتور التاي الاتاۋعا قالاعاڭدى دا، ورالحاندى دا، ديداحمەتتى دە كەۋدەلەرى ارمانعا، جۇرەكتەرى جالىنعا تولى كۇيلەرىندە اتتاندىرعان ەدى، ەندى، مىنە، ەلگە قۇرىش تابىتپەن ورالتىپ جاتىر. بۇدان اسقان قاسىرەت بار ما؟..
از جازسا دا، ساز جازاتىن، قالامداستارىنىڭ اراسىندا جيىرماسىنشى عاسىردىڭ بەيىمبەت ءمايلينى دەپ مويىندالعان، ادامدىقتان اسپاعان، ارامدىققا باسپاعان ديداحمەت ءاشىمحانۇلىن سوڭعى ساپارعا شىعارىپ سالۋعا ارنالعان جيىندا ءسوز العان وبلىس اكىمىنىڭ ورىنباسارى نۇرىمبەت ساقتاعانوۆ شىعىستىڭ شامشىراعى بولعان قالامگەردىڭ قازاسى بۇكىل ەلىمىزدىڭ، التى الاشتىڭ قايعىسى ەكەندىگىن بىلدىرە كەلە، مارقۇمنىڭ وتباسىنا، تۋعانتۋىسقاندارىنا، بۇكىل اۋدان جۇرتىنا كوڭىل ايتىپ، ايماق باسشىسى دانيال احمەتوۆ پەن پرەمەرمينيستردىڭ ورىنباسارى بەردىبەك ساپارباەۆتىڭ قايعىعا ورتاقتاسقان سالەمدەرىن جەتكىزدى. ديداحمەت ءاشىمحانۇلىنىڭ دوسى، «جۇلدىز» جۋرنالىنىڭ باس رەداكتورى، مەملەكەتتىك سىيلىقتىڭ يەگەرى ۇلىقبەك ەسداۋلەت ەكەۋىنىڭ بىرگە باستالعان ستۋدەنتتىك كەزدەرى، ديداحمەتتىڭ دارىندىلىعى، شىعارماشىلىققا، دوستىققا دەگەن ادالدىعى مەن تازالىعى، جازۋشىلار اراسىنداعى بەدەلى جونىندە ايتىپ، قالامگەر قازاسىنا وراي جازعان جىرىن وقىدى.
جازۋشى جەرلەسىمىز، مەملەكەتتىك سىيلىقتىڭ يەگەرى الىبەك اسقاروۆتىڭ ءسوزى دە قالىڭ جۇرتشىلىقتى تولقىتىپ، كوزگە جاس الدىردى. سىڭارىنان ايىرىلعان اققۋدىڭ كۇيىن كەشىپ تۇرىپ، ول تالانتتى جازۋشىپۋبليتسيست ديداحمەت دوسىنىڭ ەكىنشى ءومىرىنىڭ وسى ساعاتتان باستالعانىن، ونىڭ وقىرمانى، حالقى باردا ولمەيتىنىن ايتىپ، جەرلەستەرىن رۋحتاندىرىپ، قىتايداعى قانداستارىمىز بەن تۇركياداعى دوستارىنان، پرەزيدەنت اكىمشىلىگىنىڭ باسشىسى نۇرلان نىعماتۋللين مەن «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەكتەن كەلگەن كوڭىل ايتۋلاردى جەتكىزدى، كورنەكتى مەملەكەت قايراتكەرى مۇحتار قۇلمۇحاممەدتىڭ جەدەلحاتىن وقىپ بەردى. كاتونقاراعاي اۋدانىنىڭ اكىمى قاليحان بايعونىسوۆ ديداحمەت ءاشىمحانۇلىنىڭ كەرەمەت جازۋشىلىعىن، ونىڭ ازاماتتىعىن، اۋداننىڭ ماقتانىشى ەكەندىگىن تىلگە تيەك ەتىپ، مارقۇمنىڭ وتباسىنىڭ، تۋعانتۋىسقاندارىنىڭ قايعىسىمەن ءبولىستى، ونىڭ جارقىن بەينەسى حالقىمىزدىڭ جۇرەگىندە ماڭگى ساقتالادى دەپ ءسوزىن قورىتىندىلادى. كورنەكتى جازۋشى ديداحمەت ءاشىمحانۇلىن جەرلەگەن سوڭ، قۇرانقاتىم باعىشتالدى.
جانىبەك قىزىر كاتونقاراعاي اۋدانى.
ۇلىقبەك ەسداۋلەت،
مەملەكەتتىك سىيلىقتىڭ يەگەرى
قاراعاي
(ديداحمەت ءاشىمحانۇلىنا)
التاي تاۋى اڭىراسا اسپان جۇتىپ داۋىسىن،
كۇڭگىركۇڭگىر تاس قۇلاسا كۇڭىرەنتىپ تاۋ ءىشىن.
تال بەسىك پەن جەر بەسىكتىڭ اراسىندا سامعاعان
تاۋ قوينىنا تابىستادىق التى الاشتىڭ ارىسىن.
جىرشىسىنان ايىرىلعان اق قابانىڭ تولقىنى،
جارتاستى ۇرىپ بىتشىت بولدى كوبىك شاشىپ سول كۇنى.
قايعىدان قارس ايرىلماعان قايران جۇرەكجۇرەك پە،
ماڭگىلىككە مەكەن بولسا تۋعان تاۋدىڭ قولتىعى.
نە بار ەكەن ءبىزدىڭ ولمەس ساعىنىشتى باسارداي؟
تاريح؟ ۋاقىت؟
قويسا نەتتى شاش ال دەسە – باس الماي؟
قازاعىمنىڭ اۋىر جۇگىن ارقالاعان تولاعاي،
قاپيادا ءسۇرىندىڭ بە، سوڭعى بەلدەن اسا الماي؟
جەر اڭساعان سارى اتانداي الدىارتىڭا قاراماي،
اسۋ اسىپ كەتە باردىڭ ءوز ولكەڭدى ارالاي.
تۋعان جەرگە تۇلعا بولىپ، ەڭسە بولىپ تۇرارسىڭ،
التايىڭنىڭ ورمانىنا قايتا ورالعان قاراعاي…
25 مامىر، 2015 جىل
الماتى – كاتونقاراعاي.
ديدار گازەتى
پىكىر قالدىرۋ