Bügin kenşiler şaharında üyqamaqta otırğan  eks-prem'er Serik Ahmetovke qatıstı sot processi bastaldı.

«İri kölemde byudjet aqşasın jımqırdı»,  «milliardttap para aldı» dep ayıptalğan Ahmetovpen birge Qarağandı oblısı men qalasınıñ bwrınğı äkimderi, basqa da ondağan şeneunik pen käsipker de sot aldında jauap berude dep habarlaydı KTK.

Täuelsiz Qazaqstannıñ tarihında ükimet basşısına qatıstı osınday aşıq process eşqaşan ötip körmegen. Sondıqtan öz tuğan jerinde  şatılıp jatqan elimizdiñ 8-inşi prem'er-ministriniñ atışulı isi nağız sensaciya bop twr.

Tañ ata Qarağandıdağı oblıstıq sot mañayında qapılıs. Qauipsizdik şaraları küşeytilip, tipti onıñ aldındağı şwrıq tesik jol jamalıp,asfal't töselipti. Jolaqtar jañarıp, aynala dereu tazartılıp jatır.

Qarağandıdağı Serik Ahmetovtiñ zäulim kottedjiniñ aldında da tañ atqalı qızu qarbalas. Qırağı küzetiletin üyge qızmettik kiimi joq adamdar qayta-qayta kirip jatır. Sälden soñ astanalıq nömir taqqan djip qaqpağa kirip, 8 ay dalağa şıqpağan bastı küdiktini sotqa äkeldi.

Femida ğimaratı eks-prem'erdiñ üyine irgeles ornalasqan eken. Condıqtan 2 minutta jetti.  Al Ahmetovtiñ jüzinen, jüris twrısınan, özine senimdilik bayqaladı. Eks-prem'er jasırın emes, köppen birge aldıñğı esikten kirip, halıqpen amandastı.

Ahmetov üyinen djippen kelse, basqa ayıptaluşılar izolyatordan avtozakpen jetkizildi. Sotqa qatısuğa kelgenderdiñ köp bolğanı sonşa, ğimaratta ine şanşar jer joq. Tar zalğa sıymağan tilşiler men isti bolğandardıñ tuıstarı otırıstı tikeley ekrannan köruge mäjbür boldı.

Eks-prem'er 5 advokatımen zaldıñ qaq ortasına jayğassa, Qarağandı oblısı men qalasınıñ bwrınğı äkimderi Bauırjan Äbdişev  pen Meyram Smağwlov bastağan bir top lauazımdı şeneunik torğa qamalğan.

Al qılmıstıq toptı twtqındağan Jemqorlıqqa qarsı agenttik bwrınğı prem'erge 6 bap boyınşa, onıñ işindegi eñ auırı qızmet babın asıra paydalanıp 1 milliard 100 million teñge byudjet aqşası jedi, jartı milliard teñge para aldı degen ayıp tağıp otır.

Tergeu materialdarına süyensek, Ahmetovtiñ sözin eki etpeytin, kezinde qaramağında istegen   Qarağandınıñ 20 atqamineri tenderdi böliske salıp, alayaqtıq jasağan. Biraq, küdiktilerdiñ biriniñ advokatı qılmıstıq ispen tanısıp ülgermeuine baylanıstı 338 tomğa jük bolğan alğaşqı processi bar-joğı 15 minutqa sozıldı.

Üzilis kezinde 57 jastağı Serik Ahmetovten densaulığı men ayıpqa qatıstı oyın swrağan edik, ol  sözin öte qısqa qayırdı.

— Densaulığıñız qalay

— Jaqsı.

— Tağılğan ayıppen kelisesiz be?

— Äzirşe, eşteñe aytpaymın.

Ahmetov sözge sarañ bolğanımen advokatı onıñ wstanımın bildirdi.

«Serik Ahmetov tağılğan ayıptardıñ birimen kelispeydi. Kinäsizdigin däleldeytin ayğaqtarımızdı sot barısında körsetemiz», — deydi Serik Ahmetovtiñ advokatı Georgiy Matveenkov.

Üziliske baylanıstı eks-prem'er üyine qaytqanımen 4 sağattan soñ qaytıp keldi. Endi aldağı birneşe ay boyı ayıptalıp jatqan şeneunikter osılay top-tobımen sotqa sabılatın boladı. Al bügingi otırıstan keybir küdiktilerdiñ tuıstarı jılap şıqtı.

Memleketke keltirildi degen şığınnıñ jartısına juığın Ahmetovtıñ ağası qaytarıp beripti. Berik Ahmetovtıñ özi de qazir sotqa kuäger retinde qatısuda. Al basqaratın «Stal'-Cink» kompaniyası osı tom-tom qılmıstıq iste birneşe ret atalğan.

YAğni, Qarağandı köşelerin jarıqtandıruğa bölingen tenderdi sol kezdegi bilik «barmaq bastı, köz qıstımen» eks-prem'erdiñ ağasına wttırıp bergen deydi tergeuşiler.

Otırıs erteñ de jalğasadı. Jalpı 338 tom qılmıstıq isti qarap, ondağan ayıptaluşı men jüzdegen kuägerden jauap alu birer aptanıñ şaruası emesi  anıq.