2016 жылы 10 наурызда Астанада «Қазақстан Республикасы-Еуропалық Одақ» ынтымақтастық комитетінің 15-ші отырысы өтті. Қазақстандық делегацияға - Сыртқы істер министрінің орынбасары Роман Василенко, ал Еуропалық Одақ делегациясына - Еуропа сыртқы іс-қимылдар қызметі Орталық Азиялық басқарманың басшысы Тойво Клаар жетекшілік етті. Іс-шараға Қазақстанның бірқатар мемлекеттік органдары мен ұйымдарының өкілдері, соның ішінде Ұлттық экономика, Инвестициялар және даму, Қорғаныс және Мемлекеттік қызмет істері министрліктерінің, Жоғарғы соттың, Бас прокуратура мен Адам құқықтары жөніндегі ұлттық орталықтың өкілдері қатысты.
Ынтымақтастық комитетінің отырысына қатысушылар сауда, өзара инвестициялар, энергетика мен көлік саласын дамыту, қоршаған ортаны қорғауды қамтамасыз ету және өңірлік ынтымақтастық сияқты өзекті мәселелерді талқылады. Тараптар жаңа қатерлерге қарсы бірлескен іс-қимылды күшейту және адам құқығын қорғауды қамтамасыз ету мәселелеріне де назар аударды. ЕО-тың Орталық Азия бойынша жаңартылған Стратегиясын іске асыру және Астанада өткен жылдың желтоқсан айында өткен ЕО-ОА Конференциясының қорытындылары жеке мәселе ретінде талқыланды.
2015 жылғы 21 желтоқсанда Астана қаласында қол қойылған ҚР мен ЕО арасындағы кеңейтілген әріптестік пен ынтымақтастық туралы келісімді (КӘЫК) іске асыру перспективаларын талқылауға ерекше назар аударылды.
«Жақында дипломатиялық корпус өкілдері алдында сөз сөйлеген Қазақстан Республикасының Президенті Нұрсұлтан Әбішұлы Назарбаев ірі инвестициялық және сауда әріптесі ЕО-мен кеңейтілген әріптестік пен ынтымақтастық туралы келісім –- тауар айналымын арттыруға және еуропалық инвестицияны тартуға негіз болатынын атап өткен еді. Сондықтан да, біз бүгін Келісімнің сауда-экономикалық және басқа да салалардағы әлеуетін іске асыру перспективасына ерекше мән бердік», –- дей келе Р. Василенко КӘЫК-нің күшіне енуі Қазақстан мен ЕО арасындағы жаңа келісім өзара қатынастардың дамуын жаңа деңгейге шығаратынын атап өтті.
Осы тарихи құжаттың іске асыруы екі тараптың екіжақты әріптестігінің жаңа кезеңін айғақтап, өзара қызығушылық тудыратын барлық салаларда ынтымақтастықтың жаңа мүмкіндіктерін ашуға және өзара іс-қимылдың ауқымын анағұрлым кеңейтуге ықпал ететіні аталды.
«Біз экономика, инвестиция, энергетика, қоршаған ортаны қорғау, көлік, жаңа технологиялар салаларындағы өзара іс-қимылды нығайту сондай-ақ екі жақты сауданы дамыту нығайту жөнінде уағдаластық. Күн тәртібіндегі ерекше тақырып Қазақстан азаматтары үшін ЕО елдеріне визалық режимді жеңілдету келешегін талқылау, содай-ақ Қазақстанға нарықтық экономикасы бар ел мәртебесін беру мәселесін талқылауға ерекше көңіл аударылды», –- деді сыртқы саясат ведомство басшысының орынбасары.
«ҚР мен ЕО арасындағы Кеңейтілген әріптестік пен ынтымақтастық туралы келісім Еуропалық Одақ пен Орталық Азия мемлекеті арасында жасалған қазіргі кезеңнің жаңа және ерекшелігібойынша алғашқы құжат болып табылады», – деп айтты Тойво Клаар. Келісімде қамтылатын өзара іс-қимыл бағыттарына экономика мен қаржы, көлік, энергетика, қоршаған ортаны қорғау, білім беру мен зерттеу, деректерді қорғау, көші-қон, заң үстемдігі мен сыбайлас жемқорлыққа қарсы күрес, халықаралық қауіпсіздікке және тұрақтылыққа жәрдемдесу салалары кірді.
Ескерту: Еуропалық Одақ Қазақстанның ірі сауда және инвестиция әріптесі болып табылады. Қазақстанның сыртқы сауда айналымының 51,4% ЕО үлесіне тиесілі. ҚР мен ЕО арасындағы сауда айналымы 2015 жылдың қорытындысы бойынша 31 млрд. АҚШ долларынан асқан.
Пікір қалдыру