“قوش كەلدىڭ، ءاز ناۋرىز”
kerey.kz
El Amanaty” قوعامدىق بىرلەستىگىنىڭ ۇيىمداستىرۋىمەن 21.03.2019ج. “قوش كەلدىڭ، ءاز ناۋرىز” اتتى بەرەكە-بىرلىككە، اۋىزبىرشىلىككە شاقىرۋ ماقساتىنداعى مەرەكەلىك ءىس شارا الماتى قالاسى، الاتاۋ مەيرامحاناسىندا كۇندىزگى ۋاقىت11:00~15:00 ارالىعىندا، بۇكىل قازاقستانعا تانىمال ۇلت زيالىلارى-قابىرعالى قالامگەرلەر مەن قوعام قايراتكەرلەرى، ساياساتكەرلەردىڭ، قوعامدىق بىرلەستىك وكىلدەرىنىڭ، قوعام بەلسەندىلەرىنىڭ، ونەرپازداردىڭ قاتىسۋىمەن جوعارى دەڭگەيدە ءوتتى.
“El Amanaty” قوعامدىق بىرلەستىگى بۇل مەرەكەلىك ءىس شارانى قىتاي قىسىمىنان زارداپ شەگىپ وتىرعان قانداستارعا اراشا ءتۇسۋدىڭ ۇتىمدى جولدارىن ەل اعالارىنىڭ تالقىسىنا سالۋ، بۇل كۇندەرى بۇل ماسەلە جونىندە جاق-جاق بولىپ ايتىسىپ، ءبىرىن-ءبىرى كەلسە-كەلمەس قارالاپ، التىباقان الاۋىز بولىپ جۇرگەن اعايىنداردى بەرەكە-بىرلىككە شاقىرۋ، سونداي-اق، وسى ۋاقىتقا دەيىن “El Amanaty” قوعامدىق بىرلەستىگىنىڭ اتقارعان ءىس شارالارىن جانە الداعى جوسپارلارىن حالىققا تانىستىرۋ ماقساتىندا وتكىزدى.
ءبىرىنشى ءبولىپ ءسوز العان اق يىق اقىن، ۇلت جاناشىرى وسى ءاز ناۋىرىزدى حالقىمەن قايتا قاۋىشتىرعان قايراتكەر اعامىز مۇحتار شاحانوۆ كەڭەس كەزىندە ءاز ناۋرىزدى 62 جىل ەل ومىرىنەن شەتتەتىپ، مۇلدە تىيىپ تاستاعانىن، ونى ومىرگە قايتا اكەلۋ ءۇشىن ءوزىنىڭ قانداي قادامدارعا بارعانىن، اقىرى حالىقتىڭ قولداۋىمەن قولدانىسقا ەنگىزگەنىن ەرەكشە تەبىرەنىسپەن ايتا كەلىپ، ۇلتتىق، ەلدىك مۇددە اياسىندا اراز اشتىلىقتى قويىپ، قاشاندا شىندىق بيىگىنەن بىرگە تابىلىپ، بەرەكە بىرلىكپەن جۇمىلا جۇمىس جاساۋدى اماناتتادى. ودان كەيىن قابىرعالى قالامگەر، قازاق كوشىن باستاۋشى حالىق جازۋشىسى قابدەش ءجۇمادىلوۆ اعامىز تاۋەلسىزدىك قادىرىنە جەتىپ، ونى كوزدىڭ قاراشىعىنداي قورعاۋ كەرەكتىگىن ايتا كەلىپ، قانداستار ماسەلەسىن حالىق بولىپ، بيلىك بولىپ مەمىلەكەتتىك دەڭگەيدە كوتەرۋ كەرەكتىگىن ايتىپ، داستارقانعا اق باتاسىن بەردى.
ساياساتكەر اعالارىمىزدان ىرىسبەك سارسەنبايۇلى، ءامىرجان قوسانوۆ قاتارلى اعالارمىز “El Amanaty” قوعامدىق بىرلەستىگىنىڭ تىندىرعان ىستەرىنە العىستارىن ايتا كەلىپ، وزدەرىنىڭ قۇندى ۇسىنىس پىكىرلەرىمەن ءبولىستى.
اقىن، جازۋشى، اعالارىمزدان جاركەن بودەشۇلى، ءجادي شاكەنۇلى، مۇرات ءشايمارانۇلى اعالارىمىز اق جارما تىلەكتەرىن جەتكىزسە، بەلگىلى كينو رەجيسسەرى ەركىن راقىشوۆ اعامىز بەركەنى تۋ ەتە وتىرىپ، ۇلت مۇددەسى توڭىرەگىندە بولىنبەي-جارىلماي توپتاسۋ كەرەكتىگىن قاداپ ايتتى.
بۇرىن “اتاجۇرت” ەركىتىلەرىن العاش قۇرۋشىلاردىڭ ءبىرى بولعان، بۇل كۇندەرى قىتايتانۋ ينستيتۋتىنىڭ نەگىزگى مۇشەسى، شيپاگەرلىك باياندى زەرتتەۋشى شاياقىمەت قاليۇلى اعامىز دا بىرلىكتى تۋ ەتپەيىنشە ەشتەڭە وندىرۋگە بولمايتىنىن باسا دارىپتەي كەلىپ، “El Amanaty” قوعامدىق بىرلەستىگىنىڭ جۇمىسىن قاشاندا قولدايتىنىن ايتتى.
“قايسار جۇرەك” جەلتوقسانشىلار بىلەستىگىنىڭ ءتورايىمى شارا بولەگەنوۆا بىرنەشە ارىپتەستەرىمەن قانداستار ماسەلەسىندە قاشاندا قولداۋشى ەكەندىكتەرىن جەتكىزدى. بۇرىن “اتاجۇرت” ەركىتىلەرىندە ەڭبەك ەتكەن، بۇگىنگى تاڭدا “باۋىرمال” قورىن قۇرۋشى جەتەكشىلەرىنىڭ ءبىرى جارقىن يساقاندا العىستى تىلەگىن ارناپ، ءوز ويلارىمەن ءبولىستى.
“El Amanaty” قوعامدىق بىرلەستىگىنىڭ توراعاسى ىرىسبەك توقتاسىنۇلى مەرەكەلىك ءىس شاراعا قاتىسقان قوناقتارعا بىرلەستىك قۇرىلعالى بەرى قىتايدان كوشىپ كەلگەن قانداستاردىڭ ورالمان كۋالىكتەرىنىڭ ۋاقىتى ءوتىپ كەتۋىنە بايلانىستى ازاماتتىق الا الماي جۇرگەن ماسەلەسى مەن قىتاي تولقۇجاتتارىنىڭ ۋاقىتى ءوتىپ كەتكەن اعايىندار ماسەلەسىن كوتەرىپ بىرنەشە رەت دوڭگەلەك ۇستەل، ءباسپاسوز ءماسليحاتىن وتكىزىپ، ارناۋلى قارار قابىلداپ، زيالى قاۋىم وكىلدەرىنىڭ قولىن قويدىرىپ، سىرتقى ىستەر مينيستىرلگىنە، ىشكى ىستەر مينيستىرلىگىنە، ەڭبەك جانە حالىقتى الەۋمەتتىك قورعاۋ مينيسترلىگىنە، نۇر وتان پارتياسىنا، پرەمەر مينيسترگە جولداعانىن، “وتانداستار” قورىنىڭ ۇيىمداستىرۋىمەن رەسپۋبليكالىق دەڭگەيدە وتكىزىلگەن دوڭگەلەك ۇستەلدە بۇل ماسەلەلەردى بۇگە-شىگەسىنە دەيىن جەتكىزىپ، وڭتايلى شەشۋدىڭ قۇندى ۇسىنىستارىن ورتاعا سالعانىن، سونىڭ ناتيجەسىندە ەلگە ورالعان قانداستاردىڭ قۇجاتتىق ماسەلەلەرىنىڭ تولىق شەشىم تاپقانىن شۇيىنشىلەي جەتكىزدى. سونداي اق، قىتايدا تۋىستارى ساياسي ۇيرەنۋ لاگەرىندە قاماۋدا وتىرعان، تولقۇجاتتارى جينالىپ الىنىپ قايتا الماي وتىرعان، زەينەت اقىسى توقتاتىلعان قانداستاردىڭ ارىزدارى مەن تولىق تىزىمدىكتەرىن سىرتقى ىستەر مينيسترلىگىنە وتكىزگەندىگىن، سونىمەن بىرگە قيىنشىلىعى بار وتباسىلارعا كومەك كورسەتىپ، قايىرىمدىلىق ءىس-شارالارىن دا قوسا جۇرگىزگەندىگىن،
الداعى ۋاقىتتا بىرلەستىگىمىز وسى ماسەلەلەر بويىنشا جۇمىسىن ونان ارى جالعاستىرا بەرەتىندىگىن جانە بارلىق قانداستاردىڭ بەركە-بىرلىكپەن جۇمىلا جۇمىس جاساۋ كەرەكتىگىن قاداپ ايتتى.
سونىمەن “El Amanaty” قوعامدىق بىرلەستىگى وتكىزگەن اراز-اشتى بولىپ جۇرگەن اعايىنداردى بەرەكە-بىرلىككە شاقىرۋ شاراسى زيالى اعالارىمىزدىڭ قولداۋىمەن وتە جوعارى دەڭگەيدە ءوتتى.
پىكىر قالدىرۋ