اقساق قاسقىردىڭ ايلاسى
kerey.kz
اتاقتى زۋقا باتىردى بىلەسىڭدەر عوي. باتىر اتامىز بۇكىل التايدى ۋىسىندا ۇستاپ تۇردى. سول جىلدارى باتىردىڭ جىلقىشىلارى قوس-قوس جىلقىسىن قىستا جوڭعار ويپاتىنا، قۇمعا وتارلاتىپ قايتادى ەكەن. وندا جابايى جىلقى – تارپاڭدار كوپ بولادى. تارپاڭدار جىلقىدان كىشىلەۋ، قۇلاننان ءىرى بولادى. ونىڭ ايعىرى ءۇيىرىن قاسقىرعا الدىرمايدى. تىپتەن، كەز كەلگەن قۇيىندى، قارلى بوراندا ىققان جىلقىنى الىپ شىعا الادى.
سونى بىلەتىن جىلقىشىلار جىلقى ۇيىرلەرىن تارپاڭدارعا جاقىنداتىپ، قوسىپ، الىستان قاراۋىلداپ باعادى ەكەن. وسىلايشا تارپاڭدارمەن قان ارالاسىپتى. تىپتەن ءبىر تارپاڭ ايعىرى جىلقىعا ۇيىرلەسىپتى.
سونىمەن كوكتەمدە وتاردان قايتقاندا الگى تارپاڭنىڭ ايعىرىن دا قوسا قايىرىپ، التايعا ورالىپتى. بىردە جىلقىشىلار تارپاڭ ايعىردى قولعا ۇيرەتۋ ءۇشىن ۇستاماق بولادى. الايدا تارپاڭ وتە قاندەس، جانسەبىل ەكەن. جىلقىشىلار ۇلكەن سايداعى ورمان اراسىنا قاماپ، قولدارىنا قۇرىقتارى مەن شالمالارىن ۇستاپ، قاۋمالاي باستايدى.
سول ماڭعا جەر شالىپ جۇرگەن زۋقا باتىر دا كەلىپ قالىپتى. اساۋدى ۇستاۋعا باتىر دا قاسىنداعى سەرىكتەرىمەن قوسا جان سالىپ كىرە كەتەدى. بەلى جۋان مىقتى اتتارىمەن سايلانىپ كەلگەن جىلقىشىلاردان قاشىپ قۇتىلماسىن بىلگەن تارپاڭ ايعىر زۋقا باتىرعا قاراي تاپ بەرىپتى. باتىردىڭ استىنداعى سىرالعى ايعىر دا تارپاڭعا قارسى شاپقان. ەكى ايعىر ءبىر-بىرىنە قارسى كەلىپ، شايناسا كەتكەندە زۋقانىڭ قولى تارپاڭنىڭ كەكىلىنە ىلىنگەن ەكەن. قارۋلى باتىر تارپاڭدى باستان باسىپ، تۇقىرتىپ اكەتكەندە اككى جىلقىشىلار قاپتاپ كەلىپ، بايلاپ الىپتى.
سول تارپاڭنىڭ ايعىرى قولعا دا ۇيرەنگەن. ەڭ كەرەمەتى – ءۇيىرىن قاسقىرعا دا الدىرماي، بوراننان دا ىڭعايلى جەرگە ىقتاتىپ، الىپ شىعادى ەكەن.
ءبىر جولى، ءۇيىرلى كوكجالدىڭ ايتاعىنا ءتۇسىپتى. اسىلىندە، قاسقىر ءۇيىرى تارپاڭدى اڭدىپ، بايقاپ جۇرەدى ەكەن. بىردە اقساق اق قاسقىر قيرالاڭداي قاشىپ قۇلىنعا تاپ بەرگەن عوي. تارپاڭ قۋىپ بەرىپتى. اق قاسقىر اقساڭداي قاشىپ، ايعىردى قۇزدىڭ باسىنا شىرعالاپ اكەتكەن. ءدال سول كەزدە اڭدىعان قاسقىرلار جان-جاقتان جابىلعاندا تارپاڭ قۇزدان ءبىر-اق سەكىرىپتى.
مىنە، بولعان وقيعا. “قۇلىننىڭ تاڭىن دا تارتتىرماعان” تارپاڭ ايعىردان ايلاسىن وسىلاي اسىرعان ءبورىنى قالاي اقىلسىز دەۋگە بولادى. مارقۇم زۋقا باتىردىڭ تاعدىرى دا سول تارپاڭنىڭ تاعدىرىنداي بولدى. ەلدىڭ قامى ءۇشىن ءوزىن جاۋعا بايلاپ بەردى، – دەپ ەسكىنى ەسكە تۇسىرگەن اقساقال كوزىنە ىستىق جاس الدى.
پىكىر قالدىرۋ