فۋتبولدان قازاقستان قۇراماسى ليۋبليانادا سلوۆەنيا قۇراماسىنان 1:2 ەسەبىمەن جەڭىلىپ، 2024 جىلى گەرمانيادا وتەتىن ەۋروپا چەمپيوناتىنا تىكەلەي جولداما الا المادى. بىراق قازاقستان كەلەسى جىلى ناۋرىزدا ەۋرو-2024 دوداسىنا ليتسەنزيا الۋعا تاعى ءبىر رەت تالپىنىپ كورمەك. سلوۆەنياداعى ويىن قالاي ءوتتى؟ قازاقستان قۇراماسىنىڭ باس باپكەرى جەڭىلىس جايلى نە دەدى؟ ليۋبلياناداعى ماتچقا بارعان ازاتتىق ءتىلشىسىنىڭ رەپورتاجى.
ماتچ قالاي ءوتتى؟
ويىن باستالا سالا سلوۆەنيا قۇراماسى شابۋىلعا كوشىپ، ماتچتاعى باسىمدىقتى ءوز قولىنا الۋعا تىرىستى. ماتچتىڭ 26-مينۋتىنا دەيىن سلوۆەنيا ويىنشىلارى قازاقستان قاقپاسىنا ءتورت رەت قاۋىپتى سوققى جاساپ ۇلگەردى. ويىننىڭ 40-مينۋتىندا قازاقستاندىق قورعاۋشى يان ۆوروگوۆسكي پەتار ءستويانوۆيچتى قاقپا ماڭىندا شالىپ شىعىپ، پولشالىق تورەشى شيمون مارچينياك قازاقستان قاقپاسىنا پەنالتي بەلگىلەدى. بۇل 11-مەترلىك پەنالتيدەن بەنيامين شەشكو ءمۇلت كەتكەن جوق. ال ەكىنشى تايم باستالا سالا قازاقستان قۇراماسىنىڭ جىلدام شابۋىلى ناتيجە بەرىپ، رامازان ورازوۆ (سلوۆەنيالىق “كوپەر” كومانداسىندا وينايدى) ەسەپتى تەڭەستىرىپ كەتتى.
ەكىنشى تايمدا قازاقستان فۋتبولشىلارى ءبىرىنشى تايمعا قاراعاندا جيناقى ويناپ، قارىمتا شابۋىلدار ۇيىمداستىرا باستاعان. بىراق 86-مينۋتتا بەنيامين ۆەرۆيچتىڭ وڭ قاپتالدان تەپكەن دوبى قازاقستان قاقپاسىنا ءدوپ ءتۇستى. ويىن سوڭىنا دەيىن 1:2 ەسەبى وزگەرگەن جوق.
تورەشى ماتچ اياقتالعانىن جاريالاعان سوڭ سلوۆەنيا قۇراماسى مەن ستاديونعا جينالعان 15 مىڭنان اسا جەرگىلىكتى جانكۇيەر جەڭىستى تويلاپ جاتتى. ال قازاقستان ويىنشىلارىنىڭ ءبىرازى وكىنىشىن جاسىرا الماي، الاڭعا جاتا كەتتى. كەيىن ولار ستاديونداعى قازاقستاندىق جانكۇيەرلەر وتىرعان سەكتورعا كەلىپ، فاناتتارعا العىس ءبىلدىردى. ليۋبلياناداعى ويىنعا مىڭعا جۋىق قازاقستاندىق جانكۇيەر كەلگەنى ايتىلدى.
ماتچتان سوڭ قازاقستان قۇراماسىنىڭ باس باپكەرى، رەسەيلىك مامان ماگومەد اديەۆ ىرىكتەۋدە “لايىقتى ويىن كورسەتكەن فۋتبولشىلارعا” العىس ءبىلدىردى.
– كيىم شەشەتىن بولمەدە مۇلگىگەن تىنىشتىق. جىگىتتەرگە جەڭىلىس اۋىر ءتيدى، سەبەبى ءبىز جەڭىستى قاتتى ارماندادىق، ءبىزدى وسى جولدا قولداعان قازاقستاندى قۋانتقىمىز كەلدى. وكىنىشكە قاراي، بولمادى. جىگىتتەر ناعىز باتىرلار دەپ ويلايمىن. سەبەبى ولار ىرىكتەۋ تۋرنيرىندە بارىن سالدى، جاتتىعۋدا ايتقانىمدى جۇزەگە اسىرىپ كەلدى. بالكىم، باپكەر رەتىندە مەن ءبىر نارسەلەردى دۇرىس ىستەمەگەن بولارمىن. ونىڭ نە ەكەنىن ۋاقىت كورسەتەدى، – دەدى ول.
باس باپكەر بۇل ىرىكتەۋ ءتۋرنيرى قازاقستان تاريحىندا ەڭ ۇزدىك تسيكل بولعانىن ايتقانىمەن، سلوۆەنيامەن ويىنداعى جەڭىلىستىڭ جاۋاپكەرشىلىگىن ءوز موينىنا الدى.
– ويىننان كەيىن جىگىتتەرگە العىس ايتتىم. مەنىڭشە، ولار وتە ۇلكەن قادام جاسادى. ءبىز العان ۇپايلاردىڭ ءبارى قۇردان قۇر كەلگەن جوق. ويىنشىلاردا ءوسۋ بار ەكەنىن كورىپ وتىرسىزدار، – دەدى جاتتىقتىرۋشى.
ال ۇلتتىق قۇراما ويىنشىسى رامازان ورازوۆ ماتچتان سوڭ “جەڭىلىستى قابىلداۋ اۋىر، بىراق ىرىكتەۋدە جاقسى ويىن كورسەتكەن كومانداعا ريزامىن. قازىر نە ايتارىمدى بىلمەيمىن، ەموتسيام دا جوق. بولاشاقتا ىرىكتەۋدەن شىعىپ قانا قويماي، ۇلكەن ناتيجەلەرگە ۇمتىلارمىز. بۇل ناتيجە ەل فۋتبولىنا ۇلكەن سەرپىلىس بەرەدى دەپ ۇمىتتەنەمىن” دەپ قىسقا قايىردى.
قازاقستان جولداما الۋدان ءۇمىت ۇزبەيدى
قازاقستان 2024 جىلعى ەۋروپا چەمپيوناتىنىڭ ەكى جولداماسىنا دانيا، سلوۆەنيا، فينليانديا، سولتۇستىك يرلانديا جانە سان-مارينومەن تالاستى. بۇل توپتان دانيا 25 ۇپايمەن، سلوۆەنيا 22 ۇپايمەن جولداماعا يە بولدى.
ال قازاقستاننىڭ ەندى الداعى جىلى ناۋرىزدا ۇلتتار ليگاسىنىڭ پلەي-وفف كەزەڭى ارقىلى ءبىر جولداماعا تالاسۋعا مۇمكىندىگى بار. قازاقستان 2022 جىلى ۇلتتار ليگاسى تۋرنيرىندە (UEFA ۇيىمداستىراتىن ۇلتتىق قۇرامالار اراسىنداعى جارىس) س ديۆيزيونىندا ءوز توبىندا ازەربايجان، سلوۆاكيا، بەلارۋستان وزىپ، ءبىرىنشى ورىن العان ەدى. ەرەجە بويىنشا، ۇلتتار ليگاسىندا ءوز توبىندا ءبىرىنشى بولعان قۇراما ەۋروپا چەمپيوناتىنا ىرىكتەۋ ارقىلى جولداما الا الماسا، ۇلتتار ليگاسىنىڭ پلەي-وففى ارقىلى ليتسەنزياعا تالاسا الادى.
قازاقستان ناۋرىزدىڭ اياعىندا گرەكيامەن وينايدى، ەگەر گرەكيانى جەڭسە، گرۋزيا-ليۋكسەمبۋرگ اراسىنداعى ماتچتىڭ جەڭىمپازىمەن جولداماعا تالاسادى.
2024 جىلعى ەۋروپا چەمپيوناتى 14 ماۋسىم – 14 شىلدە ارالىعىندا گەرمانيادا وتەدى. قازىر ىرىكتەۋ ءتۋرنيرى ارقىلى جولداما يەلەنگەن 20 ەل بەلگىلى، ال قالعان ءتورت جولداما ۇلتتار ليگاسىنىڭ پلەي-وفف كەزەڭى ارقىلى ساراپقا سالىنادى.
ۇلتتىق قۇرامانىڭ باپكەرى ماگومەد اديەۆپەن كەلىسىم-شارتتىڭ مەرزىمى بيىلعى جىلدىڭ اياعىندا بىتەدى. جاتتىقتىرۋشى قازاقستان فۋتبول فەدەراتسياسى (قفف) كەلىسىم-شارتتى سوزىپ، مۇمكىندىك بەرسە، ۇلتتار ليگاسى ارقىلى جولداماعا تالاسىپ كورۋگە دايىن ەكەنىن مەڭزەدى.
– ەگەر قفف پرەزيدەنتى سەنىم ارتىپ، باستاعان ءىستى اياعىنا دەيىن جەتكىز دەسە، شىنىمەن، باستاعان ءىستى سوڭىنا دەيىن اپارىپ، ەكىنشى مۇمكىندىگىمدى پايدالانعىم كەلەدى، – دەدى اديەۆ.
ليۋبلياناداعى قازاق جانكۇيەرلەرى
سلوۆەنياداعى ويىنعا كەلگەن قازاقستاندىقتاردىڭ كوبى – ەۋروپادا وقيتىن ستۋدەنتتار يا جۇمىس ىستەپ جۇرگەندەر. بۇدان بولەك، ەلدەن دە وننان اسا جانكۇيەر كەلگەن. ليۋبليانادا استانادان، الماتىدان، پاۆلوداردان ماتچقا ارنايى كەلگەن قازاقستاندىقتاردى، شۆەيتساريادان، ليحتەنشتەيننەن، اۆستريادان، حورۆاتيادان، ۆەنگريادان، دانيادان، كيپردان، پولشادان، چەحيادا جەتكەن قازاقستاندىقتاردى جولىقتىردىم.
19-20 قاراشادا ليۋبليانانىڭ ورتالىعىندا قازاقستان تۋى مەن فۋتبول قۇراماسىنىڭ جەيدەسىن كيگەن جانكۇيەرلەر ءجيى كەزدەستى. يتاليادا دوكتورانتۋرادا وقيتىن نۇرجىگىت ەكىباەۆ ناتيجەگە قاراماستان ۇلتتىق قۇراماعا ريزاشىلىعىن ءبىلدىردى.
– قانداي ناتيجە كورسەتسەك تە، قۇراماعا رازىمىز. وسى جەتىستىك ءۇشىن فۋتبولشىلارعا راقمەت ايتامىز، – دەدى ول.
azattyq.org
پىكىر قالدىرۋ